Елорданың Қоғамдық кеңесі отырысында тұрғын үй көмегін көрсетудің тәртібі мен мөлшерін айқындау, 2023-2025 жылға арналған қоршаған ортаны қорғау іс-шаралар жоспарын бекіту және Жеңіс күніне орай соғыс ардагерлеріне әлеуметтік көмек көрсетудің жайы талқыланды.
– Жеңіс күнінде ардагерлерге қосымша көмек беру жоспарланды. Яғни 12 ардагерге 67 АЕК (231150 теңге) көлемінде жәрдемақы беріледі. Қосымша әлеуметтік көмектің жоспарланған көлемі – 800000 теңге. Төлемнің жалпы сомасы 1031150 теңгені құрайды, – деді Астана қаласы Жұмыспен қамту және әлеуметтік қорғау басқармасының басшысы Илья Скуб.
Сондай-ақ, Жеңіс күніне арналған ереже аясында Ұлы Отан соғысында қаза тапқан жауынгерлердің жесірлеріне 11 АЕК (37950 теңге) көлемінде төленеді, жоспарланған қосымша әлеуметтік көмек 30000 теңгені құрайды. Жоспарланған төлемнің жалпы сомасы – 67950 теңге. Баяндамашы атап өткендей, Астанада Екінші дүниежүзілік соғыста қаза тапқан жауынгердің бір жесірі тұрады.
– Бұл жоба мақұлданса, әлеуметтік көмек көрсетуге жергілікті бюджеттен 9630000 теңге бөлу қажет. 2022 жылы 18 Ұлы Отан соғысының ардагеріне жалпы сомасы 14,4 миллион теңгеге қосымша әлеуметтік көмек көрсетілді, – деп атады басқарма басшысы.
Екінші мәселе – «Нұр-Сұлтан қаласында тұрғын үй көмегін көрсетудің мөлшері мен тәртібін айқындау туралы» мәслихаттың 2021 жылғы 24 қарашадағы №104/15-VII шешімінің жобасына атын өзгертуге байланысты өзгерістер енгізу туралы болды. Яғни Нұр-Сұлтаннан Астанаға.
– Тұрғын үй иелеріне тұрғын үй көмегі коммуналдық қызметтерді төлеу (лимит шегінде) отбасының айлық жиынтық табысының 5 пайызынан асатын жағдайда тағайындалады. Ағымдағы жылдың басынан бері 412 аз қамтылған отбасы 6,3 миллион теңгеге қамтылды. 2022 жылы 531 аз қамтылған отбасы қолдаумен қамтылып, төлем сомасы 18,9 миллион теңгені құрады, – деді спикер.
Жобалар Қазақстан Республикасының қолданыстағы заңнамасына қайшы келмейді және құқықтық актілерге қойылатын талаптарға сәйкес келеді, сондықтан оларды Қоғамдық кеңес мүшелері бірауыздан қолдады.
Нәйла ӘБДУХАЛЫҚОВА
