Астанадан ауылға дейін…
Алматы облысы
Талдықорған қаласында «Ұлттық музейге сый тарту» атты республикалық шара өтті. Ақындар Үмбетәлі Кәрібаев, Мұқағали Мақатаев, Тұманбай Молдағалиев, Есенқұл Жақыпбек, жазушы Әнуар Әлімжанов, суретші Әбілхан Қастеев, композиторлар Мұқан Төлебаев, Нұрғиса Тілендиев, т.б. тұлғалардан қалған жәдігерлер музей қорын толтырды.
Түркістан облысы
Биыл Түркістан облысында 160 мың тоннаға жуық жеміс-жидек жинау жоспарланып отыр. Оның 50-60 пайызы көрші мемлекеттерге экспортталады. Ресей мен Беларусь республикаларынан сұраныс жоғары екен.
Солтүстік Қазақстан облысы
Петропавл қаласында жылыту маусымы басталды. Биыл жергілікті билік жылуды жылдағыдан екі апта бұрын беру жөнінде шешім шығарды. Қазір қаладағы балабақша, мектеп, аурухана секілді әлеуметтік нысандар жылуға қосылып жатыр.
Шығыс Қазақстан облысы
Аягөз қаласында 600 орындық жаңа мектеп пайдалануға берілді. Мектепті салуға мемлекет қазынадан бір миллиард теңгеден аса қаржы бөлді. Аудан бойынша ашылған 19 ІТ кабинеттің бірі осында болады.
Маңғыстау облысы
Ақтауда Каспий жағалауы елдерінің ІІ халықаралық театр фестивалі ашылды. Шараға қатысуға Қазақстан, Ресей, Әзербайжан, Иран мен Түрікменстаннан 8 театр ұжымы өтініш білдірген. Биылғы фестиваль қазақ киносы мен театрының саңлағы Нұрмұхан Жантөриннің 90 жылдығына арналып отыр.
Жамбыл облысы
Таразда кәсіпқой бокстан әлем чемпионы Фируза Шәріпова әлеуметтік аз қамтылған отбасына су жаңа автокөлікті сыйға тартты. Бұл шаңырақта 4 бала өсіп жатыр. Соның екеуінің мүмкіндігі шектеулі.
Ақтөбе облысы
Ақтөбеде республикада тұңғыш рет аналар жиыны өтеді. Алдағы аптада еліміздің түкпір-түкпіріндегі қоғамда түрлі жетістіктерге жеткен аяулы аналар Ақтөбеде бас қосады.
Қызылорда облысы
Ресей Федерациясы үкіметі есебінен Мәскеу және Санкт-Петербург қалаларының жоғары оқу орындарында оқыған 74 қызылордалық қыз-жігіт дипломдарын алды. Олардың 43-і магистратурада оқуларын жалғастырса, 31-і туған жерге оралды.