Ақпарат және қоғамдық даму министрлігінің қолдауымен Дүниежүзі қазақтары қауымдастығы, «Отандастар қоры» және «Қазақконцерт» ұйымы бірлесіп, «Turan» этно-фольклорлық ансамблінің қатысуымен шеттегі қазақтарға арнап «Ұлы дала елінен» атты онлайн концерт өткізді.
Ұйымдастырушылардың айтуынша, игілікті шараның мақсаты – музыкалық өнер арқылы алыста жүрген ағайынға рухани қолдау көрсету және шет елдегі қандастармен байланысты нығайту.
Онлайн концерт барысында ансамбль мүшелері Серік Нұрмолдаев, Мақсат Медеубек, Бауыржан Бекмұханбетов, Ержігіт Әлиев, Жанту Дадабаев ұлттық аспаптардың дыбысын қазіргі заманға сай лайықтап, бабалар мұрасын жаңғыртып, ұмыт бола бастаған төл аспаптардың сүйемелдеуімен «Ортеке», «Ақсақ құлан», «Керуен», «Көроғлы», «Аққу», «Бүркіт» күйлерін тыңдармандарға шебер жеткізе білді. Сонымен бірге өнерлі ұжым «Қыран далам – Тұран далам», «Қилы заман» секілді туындыларды орындады. Бұл дүниелерден халқымыздың аңшылық, саятшылық дәстүрі көрініс тапса, композитор Ақтоты Райымқұлованың «Шабыт» және «Абай толғауы» атты шығармалары да көрермен көңілін әсем күйге бөледі. Сондай-ақ концертте Нұр-Сұлтан қаласы Astana Ballet театры мен Қазақ ұлттық хореография академиясының әртістері де өнер көрсетті.
