استانا قالاسىنىڭ «كوكتال-2» جەكە سەكتورىنىڭ تۇرعىندارى Gpon تەحنولوگياسى بويىنشا 500 مبيت/س-كە دەيىن جەتەتىن جىلدامدىقپەن تسيفرلىق تەلەديدار مەن جوعارى جىلدامدىقتى ينتەرنەتكە قوسىلاتىن بولادى. بۇل شارا سارىارقا اۋدانى اكىمدىگىنىڭ قولداۋىمەن تسيفرلاندىرۋ جانە مەملەكەتتىك قىزمەت باسقارماسى مەن «Kazakh Home Networks» جشس (تم Almaline) بىرلەسكەن جوباسىنىڭ ارقاسىندا جۇزەگە اسىرىلادى.
سارىارقا اۋدانى تۇرعىندارىنىڭ ايتۋىنشا, بۇل ماڭداعى ساپاسىز ينتەرنەت ماسەلەسى 8 جىلعا جۋىق ۋاقىت بويى شەشىمىن تاپپاعان. ەندى, مىنە, جەلىلەردى قوسۋ بويىنشا بەلسەندى جۇمىستار جۇرگىزىلۋدە. العاشقى ابونەنتتەر وسى جىلعى قازان ايىنىڭ ورتاسىنا تامان ينتەرنەتكە تولىق قوسىلادى. وسىلايشا, جاقىن كۇندەردە جوعارى جىلدامدىقتى ينتەرنەتكە الدىمەن بارشىن, ۇلىتاۋ, ساۋمالكول, قۇلانوتپەس, ايدارلى كوشەلەرىنىڭ بويىنداعى تۇرعىندار قول جەتكىزەدى.
سودان كەيىن ەلدى مەكەننىڭ شىعىس بولىگى جوعارى جىلدامدىقتى ينتەرنەت جەلىسىنە قوسىلادى. «كوكتال-2» جەكە سەكتورىنىڭ تۇرعىندارىن تالشىقتى-وپتيكالىق بايلانىس جەلىلەرىمەن تولىق قامتۋ قاراشا ايىنىڭ ورتاسىندا اياقتالادى دەپ جوسپارلانۋدا. بۇل جۇمىستار اياقتالعان سوڭ «كوكتال-1» جانە اگروقالاشىق اۋداندارىنىڭ تۇرعىندارى ينتەرنەتكە قول جەتكىزەدى. جەكە سەكتور تۇرعىندارىنا يكەمدى تاريفتىك جوسپارلار جانە جوعارى قىزمەت كورسەتۋ دەڭگەيى ۇسىنىلادى.
