قر پرەزيدەنتىنىڭ جانىنداعى مەملەكەتتىك باسقارۋ اكادەمياسىندا ەلىمىزدىڭ بارلىق وڭىرلەرىنەن كەلگەن بۇقارالىق اقپارات قۇرالدارى وكىلدەرىنە ارنالعان «قازاقستان رەسپۋبليكاسىنداعى سايلاۋ پروتسەسى: تەوريا جانە پراكتيكا» تاقىرىبىندا ءۇش كۇندىك كۋرس وتكىزىلدى.
ورتالىق سايلاۋ كوميسسياسىنىڭ سپيكەرلەرى جۋرناليستەر الدىندا الداعى سايلاۋ ناۋقاندارىن دايىنداۋ مەن وتكىزۋدىڭ ۇيىمداستىرۋشىلىق جانە قۇقىقتىق اسپەكتىلەرى, سايلاۋ ۇيىمداستىرۋشىلارىن وقىتۋ جۇيەسى, سايلاۋ ناۋقاندارىن قارجىلاندىرۋ تاقىرىبىندا ءدارىس وقىپ, ماڭىزدى سۇراقتاردى بىرگە تالقىلادى.
جيىندا باق-تىڭ سايلاۋ ناۋقانىنداعى ءرولى مەن ماڭىزىن جانە سىني ءتۇسىنۋ قابىلەتىن قالىپتاستىرۋ. باق وكىلدەرىنىڭ ءبىلىم دەڭگەيى مەن ولاردىڭ سايلاۋ ۇدەرىسىن اقپاراتتىق قامتاماسىز ەتۋ ماسەلەلەرى بويىنشا بىلىكتىلىگىن ارتتىرۋ كوزدەلگەن.
«ورتالىق سايلاۋ كوميسسياسى 20 قاراشادا وتەتىن قر پرەزيدەنتى سايلاۋى قارساڭىندا 11 سەمينار وتكىزۋدى جوسپارلاپ وتىر. ءتۇرلى سالا ماماندارى مەن وكىلدەرىن سايلاۋدى ۇيىمداستىرۋ جانە وتكىزۋ پروتسەسىمەن تولىعىراق تانىستىراتىن بولامىز. بۇگىن, مىنە, باق وكىلدەرىنە ارنالعان ەكى كۇندىك سەمينار باستالدى. ودان بولەك, وسىنداي سەمينار قۇقىق قورعاۋ ورگاندارى جانە پروكۋراتۋرا قىزمەتكەرلەرى, ۇكىمەتتىك ەمەس ۇيىم وكىلدەرى جانە Call ورتالىق قىزمەتكەرلەرى ءۇشىن دە وتكىزىلەدى. وقىتۋ ونلاين جانە وفلاين فورماتتا» دەدى ورتالىق سايلاۋ كوميسسياسىنىڭ مۇشەسى سابيلا مۇستافينا.
باق وكىلدەرىنە ارنالعان سەمينارعا ەلىمىزدىڭ بارلىق وڭىرىنەن 70-كە جۋىق ادام قاتىستى. سەمينار قورىتىندىسىندا قاتىسۋشىلارعا ارنايى سەرتيفيكاتتار تابىستالدى.
