بولات جولداعى جۇمىسىن قاراپايىم جولشىدان باستاعان قۇرمەتتى تەمىرجولشى بەرىك ايتبەكوۆتىڭ اۋلەتى – وسى سالاداعى تانىمال ديناستيانىڭ ءبىرى. العاشقى تالىمگەرى, اكەسى ساعىندىقتىڭ جولىن تاڭداعان ول دا بۇكىل سانالى ءومىرىن تەمىرجولدىڭ دامۋىنا قىزمەت ەتۋگە ارنادى.
كۇننىڭ ىستىعى مەن سۋىعىنا قاراماي, ايدالادا تەمىرجولدىڭ كۇتىمىن جاسايتىن جولشىلىق جۇمىستان «قتج» ۇك» اق «ماگيسترالدىق جەلى ديرەكتسياسى» فيليالى قوزعالىس قاۋىپسىزدىگى دەپارتامەنتىنىڭ ديرەكتورلىعىنا دەيىن كوتەرىلگەن بەرىك اعا وسى ارالىقتا تەمىرجولعا 50 جىل قىزمەت ەتىپتى.
قاراعاندىداعى اعادىر ستانساسىندا مەكتەپ بىتىرە سالا جولشى بولىپ جۇمىس ىستەپ, كەيىن وتان الدىنداعى بورىشىن وتەگەن سوڭ, تسەلينوگراد تەمىرجول تەحنيكۋمىندا ءبىلىم الادى. سونداي-اق الماتىدا ارنايى جوعارى وقۋ ورنىن دا ءتامامدايدى. بەرىك ساعىندىقۇلى – دوستىق مەملەكەتارالىق شەكارا بەكەتىندە العاشقى جۇك پويىزدارىن وتكىزۋ بارىسىنداعى جۇمىستاردى ۇيىمداستىرۋعا تىكەلەي ارالاسقان باسشى. سونداي-اق ونىڭ جاۋاپكەرشىلىگىنە جۇكتەلىپ, ابىرويمەن جوعارى دەڭگەيدە اتقارىلعان مىندەتتەر قاتارىندا تۇركىستان ستانساسىنداعى كونتەينەرلەر جوندەۋ تسەحىن سەرتيفيكاتتاۋ, «قازتەمىرترانس» اق-تىڭ قاناتقاقتى جوبالارىن ىسكە قوسۋ جۇمىستارى بار.
زەينەت دەمالىسىنا 2015 جىلى شىققان اقساقال سۇيىكتى جۇمىسىنان الشاقتاماي, 2016 جىلدان بەرى كومپانيانىڭ ارداگەرلەر كەڭەسىن باسقارىپ كەلەدى. وسىلايشا قاراپ جاتپاي, سالا ارداگەرلەرىنىڭ مۇڭ-مۇقتاجىن تۇگەندەپ, قامىن كۇيتتەپ ءجۇر. قولى بوساي قالسا, سپورتپەن اينالىسىپ, ۆولەيبول ويناعاندى, تازا اۋادا سەرۋەندەگەندى ۇناتادى. ونىڭ سالاداعى زور تاجىريبەسى مەن قىزمەتىنە ادالدىعى جانە تەمىرجولعا سىڭىرگەن ەڭبەگى ەسكەرۋسىز قالماي, ۇلكەن مەملەكەتتىك جانە سالالىق ناگرادالارعا ۇسىنىلدى. سونىڭ ىشىندە ەڭ بەدەلدى «قۇرمەتتى تەمىرجولشى» اتاعى وعان 1998 جىلى بەرىلدى. ودان بولەك, «ەڭبەك ارداگەرى», «ادال ەڭبەگى ءۇشىن», «ەڭبەك اۋلەتى ءۇشىن» مەدالدارىمەن دە ماراپاتتالعان.
ءوندىرىس سالاسىنىڭ مايتالمانى ونەردەن دە قۇرالاقان ەمەس. «سەزىم يىرىمدەرى», «ءبىر وزەننەن ءنار العان» جىر جيناقتارىنىڭ اۆتورى. تەمىرجول سالاسىنا قاتىستى «پوەزدا وسوبوگو نازناچەنيا» دەگەن كىتاپ جازعان. ماندولينا, گيتارا, دومبىرا تارتىپ, ءان سالعاندى دا جانى سۇيەدى.
بۇگىندە ايتبەكوۆتەر اۋلەتىن تەمىرجولشىلار اراسىندا بىلمەيتىندەر كەمدە-كەم. اۋلەتتىڭ بىرنەشە بۋىن وكىلى الىپ سالانىڭ ەڭبەك قازانىن قايناتىپ, تەمىرجولدىڭ دامۋىنا ۇلەس قوسىپ كەلەدى. بۇل اۋلەتتەن بۇگىنگە دەيىن ءۇش «قۇرمەتتى تەمىرجولشى» اتاعىنىڭ يەگەرى شىققان. ولار – بەرىك اقساقال مەن ونىڭ اكەسى جانە ءىنىسى. التى اعايىندى ازاماتتىڭ بارلىق باۋىرى تەمىرجولدا ىستەگەن. وسىلايشا اۋلەتتىڭ تەمىرجولداعى جيىنتىق ەڭبەك ءوتىلى – 500 جىلعا جەتەدى. ءوزىنىڭ ءبىر ۇل, ءبىر قىزى دا – تەمىرجولشى. بۇگىندە سولاردان 4 نەمەرە ءسۇيىپ, ارداقتى اتا اتانىپ وتىرعان جايى بار.
