قازاقستاننىڭ ءوسىپ-وركەندەۋى, بەيبىتشىلىكتە ءومىر ءسۇرۋى – وسى ءبىر ارداقتى دا اياۋلى قارتتارىمىزدىڭ ارقاسى. سانالى عۇمىرىن, تىنىمسىز ەڭبەك ەتە ءجۇرىپ, مەملەكەتىمىزدىڭ نەگىزىن سالۋعا جول اشقان الدىڭعى بۋىن اعا-اپالارىمىزدىڭ 1 قازان – ءتول مەرەكەسى.
شىنىندا دا, قارت زەينەتكەرلەردىڭ ءومىر جولى – بۇگىنگى ۇرپاققا اسىل مۇرا. وسىنى بولاشاق ۇرپاققا جەتكىزۋ ماقساتىندا استانا قالاسى سارىارقا اۋدانىندا ارداگەرلەر كەڭەسى قۇرىلعان.
قارتتار كۇنىنە ارنالعان سالتاناتتى جيىندى اشقان سارىارقا اۋدانى ارداگەرلەر كەڭەسىنىڭ ءتورايىمى ۋلياش قۇسايىنوۆا قارتتار كۇنىنە ارنالعان بۇل مەرەكە ءبىز ءۇشىن ماڭىزدى كۇننىڭ ءبىرى دەي كەلىپ, ارداقتى اتالارىمىز بەن اياۋلى اجەلەرىمىزدى سىيلاۋ, قۇرمەتتەۋ, ولاردى قورعاۋ ءبىزدىڭ جانە كەلەشەك ۇرپاقتىڭ ءبىرىنشى پارىزى ەكەنىنە توقتالدى.
«سانالى ۇرپاعى بار ەلدىڭ قارياسى باقىتتى, اقساقالدى اتاسى بار ەلدىڭ بالالالارى باقىتتى» دەگەن ءسوزى قازاق حالقىنا ارنالعانداي. سەبەبى ولار اتا-بابالارى وسيەت ەتكەن مىنا اسىل ءسوزدى ەشقاشان دا ۇمىتپايدى. بۇدان ءبىز «ادامزات بالاسى ءوسىپ-ونگەن تاربيەلى ۇرپاعىمەن مىڭ جاسايدى» دەگەن اتالى ءسوزدى ەسكە ءتۇسىرىپ وتىرمىز. ءيا, ۇرپاعىنىڭ ءوسىپ, جەتىلىپ, اينالاسىندا وتىرعانىن كورگەن بۇگىنگى قاريالارىمىزدا نە ارمان بار دەيسىزدەر؟! مىنە, بۇگىنگى وسى شارا ەلىنە ەرەن ەڭبەك سىڭىرگەن قارتتارىمىزعا ارنالىپ وتىر» دەدى ول.
العاشقى قۇتتىقتاۋ ءسوز كەزەگى استانا قالالىق ارداگەرلەر كەڭەسىنىڭ توراعاسى سانسىزباي ەسىلوۆكە بەرىلدى.
«ءبىزدىڭ قارتتارىمىزدىڭ باسقالاردان ەرەكشەلىگى سول, ولار ۇرپاق ءۇشىن بۇكىل ءومىرىن بالاعا ارنايدى. بالا شىر ەتىپ دۇنيەگە كەلگەننەن ولاردى عانا قامقورلىعىنا الىپ قويماي, ودان قالدى نەمەرە, شوبەرەگە كومەك كورسەتىپ وتىر. بۇل ءبىزدىڭ اتا-انالارىمىزدىڭ ۇلى قاسيەتى دەر ەدىم. كەرىسىنشە, ءبىزدىڭ ۇرپاعىمىز اتا-انا الدىنداعى بورىشىن وتەۋ ءۇشىن بارىن سالۋدا. ول – قارتتارىمىزدىڭ ولارعا كورسەتكەن ۇلگى-ونەگەسى. ءارى ەلىمىزدە زەينەتكەر ارداگەرلەرگە سىي-سياپات كورسەتىپ, بولاشاق الدىندا پارىزىن وتەۋدى قولعا الىپ وتىر. سوندىقتان دا ءبىزدىڭ قارتتارىمىز قارتايمايدى» دەپ ءسوزىن تۇيىندەدى كەڭەس توراعاسى.
ودان كەيىن وسى شارانىڭ وتۋىنە مۇرىندىق بولعان سارىارقا اۋدانى اكىمدىگى ىشكى ساياسات باسقارماسىنىڭ باسشىسى التىناي زارلىققىزى ءسوز الدى.
«ەل مۇددەسىن بارىنەن بيىك قوياتىن, ۇرپاق تاربيەسىنە ەرەكشە كوڭىل بولەتىن, ەل قامىن ويلايتىن, ادال قىزمەتىمەن ەلىنە قالاۋلى بولعان, ومىرلەرىن جالعاستىرۋشى ۇرپاعىنا ۇلىلىعىن كورسەتىپ, بار قاۋىمعا باس-كوز بولا بىلگەن قارتتارىمىز, مىنا الدىمىزدا وتىرعان سىزدەر اياۋلى جاندارسىزدار. ارالارىڭىز سيرەمەسىن, جاستارىمىزعا ۇلگى-ونەگە بوپ جۇرە بەرىڭىزدەر دەپ تىلەك ايتامىن» دەدى ول قۇتتىقتاۋىندا.
وسى فلەشموبقا قاتىسقان ارداگەر ۇستاز, تىل ەڭبەككەرى ەۆگەني گاليۋك تە قۇتتىقتاۋ ءسوز سويلەپ, ۇيىمداستىرۋشىلارعا قارتتار اتىنان العىسىن ايتتى.
ءىس-شارا بارىسىندا سارىارقا اۋدانى ارداگەرلەر كەڭەسىنە قاراستى كوركەمونەرپازدار جينالعاندار الدىندا ۇلكەن كونتسەرت بەردى. استانا قالاسىنىڭ 4 اۋدانىنان مەرەكەمەن قۇتتىقتاۋعا كەلگەندەر: «ۆەتەران» قورىنىڭ گ.اكسەنوۆا باسقاراتىن «نادەجدا» ءانسامبلى, ك.قوسبارماقوۆا جەتەكشىلىك ەتەتىن «ەتنواۋىل» كومپوزيتسياسى, ا.يسماعامبەتوۆانىڭ «TriADanceStudio»-نىڭ بالالار بي توبى, سول سياقتى د.وستانكوۆيچ باسشىلىق ەتەتىن بەلورۋس ەتنومادەني ورتالىعىنا قاراستى «راديما» ءانسامبلى جانە ۆ.دوستوۆ جەتەكشىلىك ەتەتىن قازاقستان اسسامبلەياسىنىڭ «رادۋگا» اتتى ورىس اندەرى ءانسامبلى ونەر كورسەتتى.
عاليا بالتاباي,
استانا قالالىق ارداگەرلەر كەڭەسى مەديا توبى جەتەكشىسىنىڭ ورىنباسارى
