سانالى ءومىرىن بۇقارالىق سپورتتىڭ دامۋىنا ارناپ, ءالى دە وسى سالادا ەڭبەك ەتىپ جۇرگەن داۋلەت ءحامزيننىڭ ايتارى انىق, بوياۋى قانىق. بەلبەۋ كۇرەسىنەن ۇلتتىق دارەجەدەگى تورەشىنى اڭگىمەگە تارتىپ, سۇحباتتاسقان ەدىك.
– تسەلينوگراد وبلىسى استراحان اۋدانىنداعى جالتىر ستانساسىندا تۋدىم. اۋىل بالالارىمەن بىرگە دوپ تەۋىپ, فۋتبولعا قاتتى قىزىقتىق. ينستيتۋتتا وقىعان جىلدارى ۇستەل تەننيسىنەن شەبەرلىگىمدى شىڭداپ, ءتۇرلى دەڭگەيدەگى سپورتتىق تۋرنيرلەرگە قاتىستىم. شۇكىر, سپورتتا جولىم بولعان اداممىن. ەكەۋىنەن دە سپورت شەبەرلىگىنە ۇمىتكەر اتاندىم, – دەپ باستادى اڭگىمەسىن ول.
1984 جىلى تسەلينوگراد اۋىل شارۋاشىلىعى ينستيتۋتىن سپورت جانە دەنە شىنىقتىرۋ ماماندىعى بويىنشا ءبىتىرىپ, ينستيتۋت قابىرعاسىندا ەڭبەك جولىن باستاپ, ستۋدەنتتەردى سپورتقا باۋليدى. 1987 جىلى قازاق اگرارلىق تەحنيكالىق ۋنيۆەرسيتەتىندە اعا وقىتۋشى قىزمەتىن اتقارادى.
2009 جىلى, اعارتۋشىلىق قىزمەتىمەن قوسا, استانا قالاسىنىڭ دەنە شىنىقتىرۋ جانە سپورت باسقارماسى جانىنداعى سپورتتىق-بۇقارالىق ءىس-شارالاردى وتكىزۋ ديرەكتسياسىندا بەلسەندى ەڭبەك ەتىپ, ەلوردادا سپورتتىق ءىس-شارالاردى كوپتەپ وتكىزۋگە ۇلەس قوسادى.
– بۇقارالىق سپورتتى دامىتۋدىڭ جولى – سپورتتىق ينفراقۇرىلىمدى دامىتۋ جانە سپورتتىق ءىس-شارالاردى ءجيى وتكىزۋ. ارينە, ءبىرىنشىسى – شاھار اكىمشىلىگىنىڭ قۇزىرىنداعى ءىس. بۇل باعىتتا سپورتتىق كەشەندەر بوي كوتەرىپ, حالىقارالىق, رەسپۋبليكالىق دەڭگەيدە وتەتىن چەمپيوناتتاردى قابىلدايتىن ۆەلوترەك, مۇز سارايى جانە جەڭىل اتلەتيكالىق زالدار ەسىگىن اشتى. سونداي-اق فيتنەس-ورتالىقتار, ترەناجەرلىك زالداردى وڭاي تابۋعا بولادى. الايدا باس شاھاردىڭ ءار اۋدانىندا كوپشىلىككە ارنالعان سپورتتىق عيماراتتار كوبەيسە ارتىقتىق ەتپەيدى.
ال ءتۇرلى دەڭگەيدەگى تۋرنيرلەردى وتكىزۋدە كەنجە قالعان ەمەسپىز. ەلدەگى ءىرى كومپانيالار – «سامۇرىق-قازىنا» اق, «قازاتومونەركاسىپ» ۇاك» اق, «قازترانسويل» اق, «قازمۇنايگاز» ۇك جانە ت. ب. اراسىنداعى تۋرنيرلەردى, جوعارى وقۋ ورىندارى اراسىنداعى سپارتاكيادالاردى وتكىزۋدىڭ ءداستۇرى قالىپتاستى, – دەيدى ءوز ىسىنە بەرىلگەن مامان.
داۋلەت تۇراتۇلىنان وتاندىق سپورتشىلار الەم چەمپيوناتتارىندا چەمپيون بولۋىنا نە جەتىسپەي جۇرگەنىن سۇرادىق.
– چەمپيوندار شىعۋدا. بار. بىراق كوپ دەي المايمىز. وعان ءتۇرلى فاكتور اسەر ەتۋى مۇمكىن. قازىر الەمدىك سپورت قاتتى دامىپ كەتتى. سپورتشىلار دا ەت پەن سۇيەكتەن جارالعان. ولار دا شارشايدى, شالدىعادى. وسىنداي كەزدە ساۋىقتىرۋ-وڭالتۋ ورتالىقتارىندا فيزيكالىق كۇش-قۋاتىن تەكسەرىپ, سپورتشىعا بەرىلەتىن فيزيكالىق جۇكتەمەنى رەتتەپ وتىرۋ وتە ماڭىزدى. بىزدە مۇنداي ورتالىقتار ەل بويىنشا ءبىر-ەكەۋ عانا. سوسىن سپورتشىمەن پسيحولوگتار مەن ارنايى ماسساجشىلار جۇمىس ىستەگەنى ابزال. قىسقاسى, سپورت سالاسىن عىلىممەن ۇشتاستىرىپ دامىتۋ ماڭىزدى, – دەپ ءتۇسىندىردى ارداگەر سپورتشى.
