دەنساۋلىق ساقتاۋ ءمينيسترىنىڭ ورىنباسارى – باس مەملەكەتتىك سانيتار دارىگەر ايجان ەسماعامبەتوۆا ورتالىق كوممۋنيكاتسيالار قىزمەتىندە وتكەن بريفينگتە قازاقستاندا تۇماۋدىڭ كوپ تارالاتىن شتامدارىن اتادى. ونىڭ ايتۋىنشا, ەلدە تۇماۋ ۆيرۋسىنىڭ تارالۋى جىل سايىن قاراشا ايىندا باستالىپ, ءساۋىر ايىنىڭ ورتاسىنا دەيىن جالعاسادى. الداعى ەپيدەميالىق ماۋسىمدا ددۇ دەرەكتەرى بويىنشا ۆيرۋستىڭ A (H1N1), A (H3N2) جانە ۆ شتامدارى وزەكتى بولادى, ولار 2022/2023 ەپيدەميالىق ماۋسىمعا ارنالعان ۆاكتسيناعا ەنگىزىلگەن.
ول وتكەن جىلى جرۆي-مەن 3,9 ميلليون ادام اۋىرعانىن جانە 2019-2020 جىلدارداعى ەپيدەميالىق ماۋسىممەن سالىستىرعاندا رەسپۋبليكادا اۋرۋشاڭدىق 1,3 ەسەگە وسكەنىن ايتتى. قاراعاندى وبلىسىنان باسقا بارلىق وڭىرلەردە ءوسىم بايقالدى. 80% جاعداي بالالار مەن جاسوسپىرىمدەردە كەزدەسەدى.
بۇعان قوسا جىل سايىن اينالىمداعى شتامداردىڭ وزگەرۋى بايقالادى, وتكەن ماۋسىمدا تۇماۋ ۆيرۋسىنىڭ 2 شتامى: ا (H3N2) جانە ۆ تارالدى, بارلىعى 915 تۇماۋ جاعدايى انىقتالدى, سەكۆەنيرلەۋ ناتيجەلەرى بويىنشا بۇل شتامدار ۆاكتسينا شتامدارىنا سايكەس كەلدى.
قازاقستاندا تۇماۋدان باسقا, تۇماۋ ۆيرۋسىنا جاتپايتىن ۆيرۋستار دا تارالىپ جاتىر. وتكەن ماۋسىمدا بارلىعى 10 مىڭنان استام سىناما زەرتتەلدى, رينوۆيرۋس, رس ۆيرۋسى, ادەنوۆيرۋستى ينفەكتسيا, پاراگريپپ, مەتاپنەۆموۆيرۋس, بوكاۆيرۋس ينفەكتسياسى انىقتالدى. باس سانيتارلىق دارىگەر اۋرۋدىڭ الدىن الۋدىڭ ەڭ ءتيىمدى جولى ەكپە ەكەنىن اتاپ ءوتتى.
