كەشە قازاقتىڭ ۇلى جازۋشىسى, الاش قايراتكەرلەرىنىڭ سوڭعى تۇياعى – مۇحتار اۋەزوۆتىڭ دۇنيەگە كەلگەنىنە 125 جىل تولدى. الەمگە ايگىلى ۇلى تۇلعانىڭ تۋعان كۇنى جوعارى دارەجەدە ۇلىقتالدى دەپ ايتا المايمىز. بۇقارالىق اقپارات قۇرالدارى جارىسا جازعانى بولماسا, قۇزىرلى ورگاندار تاراپىنان اسا بەلسەندىلىك بايقالعان جوق.
مۇحتار اۋەزوۆ – الەمدىك وركەنيەت بيىگىنە كوتەرىلە بىلگەن بىرەگەي تالانت يەسى. ول الەم وركەنيەتىن تەرەڭ يگەرىپ, ونى قازاق توپىراعىنا جەرسىندىرگەن, قازاق رۋحانياتىنىڭ دەڭگەيىن كوتەرگەن تۇلعا. «حح عاسىرداعى ەڭ ۇزدىك شىعارمالاردىڭ ءبىرى» (لۋي اراگون) الەمگە ايگىلى «اباي جولى» رومان-ەپوپەياسىنىڭ اۆتورى, شىعارمالارى الەم حالىقتارىنىڭ 120-دان استام تىلىنە اۋدارىلعان, كەڭەس وداعى كەزىندە ەڭ جوعارى دارەجەلى سىيلىق يەلەنگەن جالعىز قازاق جازۋشىسى.
سوڭعى جىلدارى الاش زيالىلارىن ارداقتاۋ, ولاردى زەرتتەۋ ءىسى ايتارلىقتاي قارقىن الدى. سول قاتاردا ۇلتقا قىزمەت ەتكەن ۇلى تۇلعالاردى ۇلىقتاۋ, ولاردىڭ ەڭبەكتەرىن ەسكەرىپ, اتىنا كوشە بەرىپ, ەسكەرتكىشىن تۇرعىزۋ جۇمىستارىن دا اتاۋعا بولادى. اباي, احمەت سىندى ايتۋلى تۇلعالارىمىزدىڭ مەرەيتويلىق جىلىنا وراي ەسكەرتكىشتەرى تۇرعىزىلىپ, اتى اسپەتتەلىپ جاتقانى – سونىڭ ايعاعى. الايدا ابايدىڭ 175 جىلدىق مەرەيتويىن اتاپ وتكەندە, اقىندى الەمگە تانىتقان ايتۋلى تۇلعا – مۇحتار اۋەزوۆ ەسكەرۋسىز قالدى. ونسىز دا بۇرىن ءىرى قالالاردا ۇلى جازۋشى اتىنا كوشە بەرىلگەنمەن, ەل كولەمىندە ەرەكشە اتاپ وتەتىندەي كەرەمەت ەسكەرتكىش تۇرعىزا المادىق. ەلىمىزدىڭ باس قالاسى – استانادا دا جازۋشى اتىنا كوشە بەرىلگەنى بولماسا, ءمۇسىنى جوق. ەندەشە اباي ەسىمى ارداقتالىپ جاتقاندا, ۇلى اقىندى, قازاق حالقىن الەمگە تانىتقان ۇلتىمىزدىڭ ءبىرتۋار پەرزەنتى مۇحتار اۋەزوۆتى دە ۇلىقتاپ, ەلوردادان ءبىر ەڭسەلى ەسكەرتكىش تۇرعىزۋ كەرەك دەپ ويلايمىز. بۇل ەسكەرتكىش كەڭەس ءداۋىرىنىڭ تار قاپاسىندا قانشاما تاۋقىمەت تارتسا دا, ۇلتىن, ونىڭ تاريحى مەن بولمىسىن سۋرەتتەۋدەن تانباعان ۇلى تۇلعاعا دەگەن قۇرمەتىمىز بولار ەدى.
قۇرمەتپەن,
- اكىم تارازي, جازۋشى, دراماتۋرگ, ستسەناريست, قازاقستاننىڭ ەڭبەك ەرى, قازاقستان رەسپۋبليكاسى مەملەكەتتىك سىيلىعىنىڭ يەگەرى, قازاقستاننىڭ حالىق جازۋشىسى.
- قويشىعارا سالعاراۇلى, جازۋشى, تاريحشى, قر مەملەكەتتىك سىيلىعىنىڭ يەگەرى, قازاقستاننىڭ ەڭبەك سىڭىرگەن قايراتكەرى.
- تۇرسىن جۇرتباي, جازۋشى, فيلولوگيا عىلىمدارىنىڭ دوكتورى, ابايتانۋشى, اۋەزوۆتانۋشى.
- ءۋاليحان قاليجان, فيلولوگيا عىلىمدارىنىڭ دوكتورى, قازاقستاننىڭ ەڭبەك سىڭىرگەن قايراتكەرى, ۇلتتىق عىلىم اكادەمياسىنىڭ اكادەميگى.
- كارىمبەك قۇرماناليەۆ, ۇلتتىق عىلىم اكادەمياسىنىڭ اكادەميگى, فيلولوگيا عىلىمدارىنىڭ دوكتورى, پروفەسسور, استانا قالالىق قوعامدىق كەڭەسىنىڭ مۇشەسى.
- روزا مۇقانوۆا, جازۋشى, دراماتۋرگ, قر مەملەكەتتىك سىيلىعىنىڭ يەگەرى.
- باۋىرجان باباجانۇلى, اقىن, «تۇركىستان» حالىقارالىق گازەتىنىڭ باس رەداكتورى.
- ەسبەرگەن الاۋحانوۆ, زاڭ عىلىمدارىنىڭ دوكتورى, زاڭگەر, استانا قالالىق قوعامدىق كەڭەسىنىڭ مۇشەسى.
- جولتاي ءالماشۇلى, جازۋشى-اۋەزوۆتانۋشى, قازاقستاننىڭ ەڭبەك سىڭىرگەن قايراتكەرى.
- ەركىن قىدىر, «استانا اقشامى» رەسپۋبليكالىق گازەتىنىڭ باس رەداكتورى, قازاقستاننىڭ ەڭبەك سىڭىرگەن قايراتكەرى.
- داۋلەتكەرەي كاپۇلى, اقىن, قازاقستان جازۋشىلار وداعىنىڭ حاتشىسى, استانا قالالىق جازۋشىلار وداعى فيليالىنىڭ ديرەكتورى, قازاقستاننىڭ ەڭبەك سىڭىرگەن قايراتكەرى.
- تولەگەن قۋانىشەۆ, رەسپۋبليكالىق «كۇي اناسى» قورىنىڭ جەتەكشىسى, استانا قالالىق قوعامدىق كەڭەسىنىڭ مۇشەسى.
