ەلوردادا اكادەميك قانىش ساتباەۆتىڭ ەڭسەلى ەسكەرتكىشىنىڭ جانىنان عالىمنىڭ زامانداستارىنىڭ ءسوزى جازىلعان ەسكەرتكىش تاقتالار اشىلدى.
ءىس-شاراعا پارلامەنت سەناتىنىڭ دەپۋتاتتارى باقىتجان جۇماعۇلوۆ, التىنبەك نۋحۇلى, دينار نوكەتاەۆا, عىلىم جانە جوعارى ءبىلىم ۆيتسە-ءمينيسترى قۋانىش ەرعاليەۆ, استانا قالاسى ءماسليحاتىنىڭ حاتشىسى ەرلان كاناليموۆ, ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى ەرلان سىدىقوۆ, مەملەكەتتىك سىيلىقتىڭ لاۋرەاتى, نەسىپبەك ايتۇلى, قازاقستاننىڭ ەڭبەك ەرى رىشات امىرەنوۆ, مەملەكەتتىك سىيلىقتىڭ لاۋرەاتى بايماحان ساتباەۆ جانە ت.ب. قاتىستى.
قۋانىش ەرعاليەۆ عىلىم جانە جوعارى وقۋ ءمينيسترى نۇربەك ساياساتتىڭ قۇتتىقتاۋ حاتىن وقىپ بەرسە, اقىن نەسىپبەك ايتۇلى ارناۋ ولەڭىن وقىدى. وزگە قوناقتار ساتباەۆتىڭ وتپەلى كەزەڭدەردە ەلدىڭ دامۋىنا سىڭىرگەن ەڭبەگىن سارالادى.
جالپى ساتباەۆ فەنومەنى اسقاق, ساتباەۆتىڭ تۇلعاسى بيىك! ونىڭ بولمىسىن بيىكتەتىپ, ءبىتىمىن ەرەكشەلەيتىن قۇبىلىس – وتپەلى كەزەڭدەردە قازاقستاندى دامۋدىڭ جاڭا جولىنا ءتۇسىرىپ, ءوزىنىڭ ۇلتىن وزىنەن بيىك ساناعان قاسيەتىندە.
قۇرمەتتى مەيماندار اكادەميكتىڭ تاريحتا قالعان تاڭبالى باستامالارىن سارالاپ, جاستارعا ۇلگى ەتىپ, ءارى وتاندىق عىلىمدى دامىتۋدا ساتباەۆتىڭ تانىم-تالعامىن باعدار ەتۋدىڭ ماڭىزىن ءسوز ەتتى.
ق.ساتباەۆ ينجەنەر-گەولوگ رەتىندە ەلدىڭ شىعىسى مەن باتىسى, سولتۇستىگى مەن وڭتۇستىگى جانە ورتالىعىنداعى ءىرى-ءىرى ءوندىرىس ورىندارىن اشۋعا باستاماشىل بولدى. اسىرەسە جەزقازعان دالاسىن تۇلەتىپ, قاراعاندى وبلىسىنا اياق سۋدىڭ جەتۋىنە سىڭىرگەن ەڭبەگى مول. قازاقستاننىڭ جەراستى قازبا بايلىعىنىڭ كارتاسىن جاسادى.
وقۋ-اعارتۋ سالاسىندا دا بەلسەندى ىسكە كىرىسىپ, العاشقى ماتەماتيكادان وقۋلىق جازدى, قانشاما جاستاردى عىلىمعا تارتىپ, باعىن اشتى. قازاق تاريحىنا, مادەنيەتىنە, رۋحانياتىنا سىڭىرگەن ەڭبەگى وراسان زور. ونىڭ ىشىندە ءداستۇرلى ءان ونەرىنە دەم بەرگەنىن ايتۋ كەرەك.
عىلىم دامىماي, ەل وركەندەمەيدى. ساتپاەۆتىڭ سارا جولىنان وسىنداي تاعىلىم الامىز. ەلدىڭ الدىندا عالىمداردىڭ قۇرامىن جاسارتۋ, زەرتتەلىپ بىتكەن جۇمىستاردى وندىرىسكە ەنگىزۋ جانە ت.ب. مىندەتتەر تۇر.
مىنە, عۇلاما عالىمنىڭ ەڭسەلى ەسكەرتكىشىنىڭ اياسىندا مارتەبەلى مەيماندار وسىنداي وي-تۇجىرىمدارىن ورتاعا سالىپ, جاستارعا ونەگەلى ءسوز ايتتى.
