دۇنيە جۇزىندە حالىقارالىق قارتتار كۇنى جىل سايىن 1-قازاندا اتاپ وتەتىنىن بىلەسىزدەر. وسى ايتۋلى مەرەكەدە ءبىز ابزال اتالارىمىز بەن اياۋلى اق جاۋلىقتى اجەلەرىمىزدى, اتا-انالارىمىزدى قۇرمەتتەپ, سىي-سىياپات جاسايمىز. سونىمەن قاتار اتالعان بۇل مەرەكە دۇنيە ءجۇزىن جايلاعان قاۋىپتى ىندەتكە بايلانىستى ەگدە ادامداردىڭ تۇرمىستىق جاعدايلارىن قولداۋعا, ولاردىڭ دەنساۋلىعىنا نازار اۋدارۋعا ەرەكشە كوڭىل بولۋدە.
قارتتار كۇنى – تەك قانا الدىڭعى بۇگىنگى ۇرپاققا عانا ماڭىزدى ەمەس, سونداي-اق ءاربىر ازاماتقا دا وي سالارى ۇلكەن شارا. سەبەبى ءاربىر قارياعا قولداۋ كورسەتىپ, جاعدايلارىن جاقسارتۋعا باعىتتالعان ماڭىزدى شارا بولعاندىقتان, ونى مەرەكە رەتىندە وتكىزۋدى جوسپارلادىق.
جاسىنىڭ ەگدە تارتۋىنا, دەنساۋلىعىنىڭ سىر بەرۋىنە بايلانىستى قارتتاردىڭ كوپتەگەن شەشىلمەگەن ماسەلەلەرى تۋىندايتىنىن بىلەسىزدەر, سوندىقتان ولارعا قولداۋ كورسەتۋ تۋعان-تۋىستارى مەن بارشا قوعامنىڭ مىندەتى.
استانا قالاسىندا جىلدا قارتتار كۇنى كەڭ اۋقىمدا وتكىزىلەدى.
قالالىق ارداگەرلەر كەڭەسى وكىلەتتى, اتقارۋشى ورگانداردى, جۇمىس بەرۋشىلەردى, بيزنەس قۇرىلىمدارىنىڭ وكىلدەرىن, ەرىكتىلەردى, قوعامدىق ۇيىمداردى قارتتار مەرەكەسى قارساڭىندا جانە سول كۇندەرى ەگدە جاستاعى ازاماتتارعا, اسىرەسە مۇگەدەك ارداگەرلەرگە, جەكە تۇراتىن زەينەتكەرلەرگە, از قامتىلعان قارتتارعا ارنايى كوڭىل بولۋگە شاقىرادى. ولارعا ماتەريالدىق تۇرعىدان كومەك كورسەتۋگە, الەۋمەتتىك-تۇرمىستىق ماسەلەلەرىن شەشۋگە جانە باسقا دا قولداۋ كورسەتۋدى ۇيلەستىرىپ كەلەمىز.
قۇرمەتتى ەڭبەك ۇجىمدارىنىڭ باسشىلارى, بيزنەس قۇرىلىمدارىنىڭ وكىلدەرى, سىزدەردى بۇكىل ءومىرى مەن ەڭبەك جولدارىن ءبىزدىڭ سۇيىكتى قالامىزدىڭ كوركەيۋىنە قوماقتى ۇلەس قوسقان ارداگەرلەرگە قولداۋ كورسەتۋگە شاقىرامىز!
اسىرەسە الەۋمەتتىك – تۇرمىستىق جانە ءدارى-دارمەكپەن قامتاماسىز ەتۋگە كومەك ەتسەڭىزدەر ەكەن. بىردە-ءبىر قارت جالعىز قالماسىن.
قۇرمەتتى اعا بۋىن وكىلدەرى, سوعىس جانە ەڭبەك ارداگەرلەرى! سىزدەردى ءتول مەرەكەلەرىڭىزبەن قۇتتىقتاي وتىرا, ادال دا ەرەن ەڭبەكتەرىڭىز ءۇشىن, جاستارعا جاساعان قامقورلىقتارىڭىز ءۇشىن العىس ايتامىز!
سىزدەردى مەيىرىمدى دە جارقىن مەرەكەمەن قۇتتىقتايمىز. ەگدە جاسىڭىز قيىندىق تۋدىرماسىن, دەنساۋلىقتارىڭىز سىر بەرمەسىن, ۇرپاقتارىڭىز سىزدەردى ماقتان تۇتسىن!
سىزدەرگە باقىتتى دا باياندى ءومىر, شاڭىراقتارىڭىزعا قۇت-بەرەكە تىلەيمىز جانە تۋعان-تۋىستارىڭىز بەن جاقىندارىڭىزدىڭ ىستىق ىقىلاسى مەن جۇرەك جىلۋىنا بولەنە بەرىڭىزدەر!
استانا قالاسىنىڭ ارداگەرلەر كەڭەسى
