جازدىڭ ىستىق ماۋسىمى باستالىسىمەن قالالىقتار جاعاجايعا اسىعادى. جىل سايىن قالا ايماعىندا جانە اينالاسىنداعى وزەن-كولدەردە قاراپايىم قاۋىپسىزدىك ەرەجەلەرىن ساقتاماي شومىلعاندار سۋعا باتىپ, قازا تابادى. ەلوردالىق تجد ازاماتتىق قورعانىس باسقارماسىنىڭ باستىعى ازامات قۇسايىنوۆ قاۋىپسىزدىك ەرەجەسىن قالاي ساقتاۋ كەرەكتىگى تۋرالى ونلاين-بريفينگتە اڭگىمەلەپ بەردى.
كۇن سايىن قۇتقارۋشىلار, پوليتسەيلەر, ەرىكتىلەر جانە جۇمىسپەن قامتۋ ورتالىعىنىڭ قوعامدىق قىزمەتكەرلەرى تۇرعىندارعا شومىلۋعا رۇقسات ەتىلگەن ورىندار تۋرالى حاباردار ەتەدى. سۋداعى قاراپايىم قاۋىپسىزدىك ەرەجەلەرىن ساقتاۋ ارقىلى شومىلۋ كەزەڭىن قاۋىپسىز وتكىزۋدى بەلسەندى جۇرگىزەتىن رەيدتىك ءىس-شارالار وتكىزەدى.
«رەيدتىك ءىس-شارالاردىڭ بارىسىندا پوليتسيا دەپارتامەنتىمەن بىرلەسىپ, 14 اكىمشىلىك حاتتاما جاسالدى. ەلوردالىق قۇتقارۋشىلاردىڭ كۇشىمەن شومىلۋ ماۋسىمى باستالعاننان بەرى شومىلۋعا رۇقسات ەتىلمەگەن ۋچاسكەلەردە 3 ادام امان-ەسەن قۇتقارىلدى, ونىڭ ىشىندە 1 بالا بار» دەدى ا.قۇسايىنوۆ.
ول ءوز سوزىندە رەسمي تۇردە شومىلۋعا ارنالعان 4 ورىن بار ەكەنىن ايرىقشا اتاپ ءوتتى. ولار: ورتالىق جاعاجاي, «تري پەسكاريا» دەمالىس ايماعى, «ستوليچنىي دۆور» جانە ش.بەيسەكوۆا كوپىرى اۋدانىنداعى كوممۋنالدىق جاعاجاي.
سۋ ايدىندارىنىڭ رۇقسات ەتىلگەن جانە تىيىم سالىنعان ۋچاسكەلەرىنىڭ تىزبەسى «2GIS» كارتوگرافيالىق پلاتفورماسىندا ورنالاستىرىلعان.
«شومىلۋ كەزەڭىندە كۇندەلىكتى 40 قۇتقارۋشى, 2 بىرلىك سۇڭگۋىرلىك جاراقتارى بار سۇڭگۋىرلەر, 6 بىرلىك ءجۇزۋ قۇرالدارى جانە جۇمىسپەن قامتۋ ورتالىعىنان 25 قوعامدىق قىزمەتكەرلەر رەيد جۇمىستارىن جۇرگىزەدى» دەدى سپيكەر.
شومىلۋ كەزىندە قاۋىپسىزدىك ەرەجەلەرىن ساقتاۋ كەرەك. شومىلۋدان بۇرىن كولەڭكەدە 5-10 مينۋت كۇتكەن دۇرىس. 20 مينۋتتان ارتىق جۇزۋگە بولمايدى. قاتتى سالقىنداعان كەزدە دەنەنىڭ قۇرىسۋى پايدا بولۋى مۇمكىن, تىنىس الۋدىڭ توقتاۋى, ادامنىڭ ەسىنەن تانۋى دا سالقىنداعاندا بولادى. ارنايى جابدىقتالماعان جەرلەردە سۋعا سەكىرمەۋ كەرەك. باسىڭىزدى سۋ تۇبىندەگى تاسقا نەمەسە باسقا زاتقا سوعىپ الۋىڭىز مۇمكىن. الىسقا جۇزبەڭىز, ويتكەنى ءسىز ءوز كۇشىڭىزدى ەسەپتەي المايسىز. شارشاعانىڭىزدى سەزىنسەڭىز ابدىراپ قالماڭىز جانە جاعاعا تەزىرەك جەتۋگە ۇمتىلماڭىز. سۋدا كىشكەنە دەمالىپ, ارقاڭىزعا بۇرىلىپ, قولدارىڭىز بەن اياقتارىڭىزدىڭ جەڭىل قوزعالىسىمەن ءوزىڭىزدى سۋدىڭ بەتىندە ۇستاڭىز.
ەگەر اعىس الىپ كەتسە, قارسى جۇزۋگە تىرىسپاڭىز. اعىسپەن تومەن قاراي ءجۇزىپ, بىرتىندەپ جاعاعا جاقىنداڭىز. ەگەر اعىس يىرىمىنە تاپ بولساڭىز, تەرەڭ دەم الىپ, سۋعا سۇڭگىپ, ءبىر جاعىڭىزعا قاراي كۇشتى سەرپىلىس جاساپ, سۋ بەتىنە قالقىپ شىعىڭىز. ءسىز ارنايى بەلگىلەنگەن جەرلەردە شومىلۋىڭىز كەرەك, قايىقتارعا جاقىنداۋعا بولمايدى. بويلامايتىن, تەرەڭ سۋدا ويناماڭىز, قاتەر بولماي, جالعان دابىل بەرمەڭىز.
