استانا قالاسىنىڭ جاستار ساياساتى ماسەلەلەرى باسقارماسىنىڭ «استانا جاستارى» جاستار رەسۋرستىق ورتالىعى» كوممۋنالدىق مەملەكەتتىك مەكەمەسىنىڭ ۇيىمداستىرۋىمەن كونستيتۋتسيا كۇنىنە وراي جاس وتباسىلار اراسىندا «كوڭىلدى ستارت» وتباسىلىق ەستافەتاسى ءوتتى. مەرەكەلىك سايىسقا 37 جاس وتباسى قاتىستى.
«بۇگىنگى تاڭدا, وكىنىشكە قاراي, جاستاردىڭ اراسىندا اجىراسۋ كورسەتكىشى جىل سايىن ارتىپ وتىر. ءدال وسىنداي تۋرنيرلەر ارقىلى جاس وتباسىلار ەموتسياسىن شىعارىپ, ءبىر-بىرىمەن جاقىنداي تۇسەدى دەپ ويلايمىز. سونداي-اق, سالاۋاتتى ءومىر سالتىن ۇستانىپ, سپورتتى جانىنا سەرىك ەتكەن وزگە جانۇيالارمەن جاقىن تانىسۋعا مۇمكىندىك الادى. 2022 جىلى «دەنساۋلىق – زور بايلىق» اتتى 21 كۇن بويى كەمى 1 شاقىرىم جۇگىرەتىن سايىس وتكەن بولاتىن. ءبىز بۇل شارامەن شەكتەلىپ قالمايمىز. الداعى ۋاقىتتا زياتكەرلىك, فوتو-ۆيدەو, ۇلتتىق ءداستۇردى قامتيتىن وزگە دە جارىستاردى وتكىزۋدى جوسپارلاپ وتىرمىز» دەدى سايىستى ۇيىمداستىرۋشى ءارى «قازاقستان جاستارىنىڭ كونۆەنى» جەكە قورى ديرەكتورىنىڭ ورىنباسارى مارات مۇحامەدجانۇلى.
سايىستىڭ ءبىرىنشى كەزەڭىندە كۇيەۋى تۋرنيككە تارتىلسا, ايەلى باسكەتبول دوبىن 5 مارتە ساقيناعا لاقتىردى. ناتيجەسىندە ەڭ ۇزدىك دەپ تانىلعان 15 وتباسى ەكىنشى كەزەڭگە جولداما الدى. ايتا كەتەيىك, باسەكەنىڭ تارتىستى بولعانى سونشالىق, 2 جانۇيانىڭ كورسەتكىشى تەڭ بولىپ, قوسىمشا جاتتىعۋلار ارقىلى مىقتىنى انىقتاۋعا تۋرا كەلدى. ەكىنشى كەزەڭدە قاتىسۋشىلار 10 بولىمنەن تۇراتىن جاتتىعۋدا جارىستى.
جارىس ناتيجەسىندە جەڭىمپازدار رەتىندە مىنا وتباسىلار تانىلدى:
1-ورىن – تىلەۋوۆتەر جانۇياسى (200 000 تەڭگە);
2-ورىن – حۋرمەتبەكوۆتار جانۇياسى (150 000 تەڭگە);
3-ورىن – رومانوۆتار جانۇياسى (100 000 تەڭگە).
قالعان 12 قاتىسۋشى وتباسىعا 20 000 تەڭگەلىك سەرتيفيكات تابىستالدى.
قانات بايۇزاقوۆ
