«Elorda Aqparat» مەديا-حولدينگىنىڭ ۇجىمى ەكى كۇن بويى سۇلۋ كوكشەنىڭ تورىندە تيمبيلدينگ وتكىزدىك. «Greenwood» دەمالىس ايماعىنداعى كوماندالىق سايىستار ارىپتەستەرىمىزدىڭ كوڭىل-كۇيىن كوتەردى.
ۆولەيبول مەن فۋتبولدان وتكەن سپورتتىق جارىستاردا ەپتىلىكتەن, شەبەرلىكتەن, سەرگەكتىكتەن كۇش سىناستىق. اۋا-رايىنىڭ كۇندىز بۇلتتى ءارى جىپ-جىلى بولعانى سپورتپەن كوبىرەك شۇعىلدانۋىمىزعا مۇمكىندىك بەردى. اسىرەسە, ۆولەيبولدان وتكەن وتە قىزىقتى, تارتىستى ويىندار ارىپتەستەرىمىزدىڭ كوڭىلىن سەرپىلتىپ قانا قويماي, ۇجىمداعى ءوزارا سىيلاستىقتى, جاناشىرلىقتى كورسەتتى. سپورتتىق سايىستارعا ارىپتەسىمىز عالىم قوجابەكوۆ قارا قىلدى قاق جارىپ, ءادىل تورەلىك ەتتى. كۇشى كوپ, بىرلىگى مىقتى كوماندالار جەڭىسكە جەتتى.
تيمبيلدينگتە تەك سپورتپەن, ويىن-ساۋىقپەن شەكتەلگەن جوقپىز. قىلقان جاپىراقتى ورماندى ارالاپ, مۇلگىگەن تىنىشتىقتا ميىمىزدى تىنىقتىردىق. بۋراباي سىلەمىندەگى قاتاركولدىڭ سۇلۋلىعىنا تامساندىق. كولدىڭ جاعاسىندا سەيىل-سەرۋەن قۇرىپ, قىزىقتى اڭگىمەلەرگە قۇلاق تۇردىك. قۇرداستاردىڭ قالجىڭى, تابيعاتتىڭ تىلسىمى, ارىپتەستەردىڭ ءازىلى جانىمىزدى جادىراتتى. تامىلجىعان تامىزدىڭ كەشىندە دەمالىسىمىز اسەم انمەن, كۇمبىرلەگەن كۇيمەن, كورگەن جاندى ەلىكتىرىپ اكەتەتىن بيمەن جالعاستى. جەڭىسكە جەتكەن كوماندالاردىڭ ماراپاتتاۋ ءراسىمى, قوناقتار مەن ارىپتەستەردىڭ قۇتتىقتاۋلارى, دالادا جەگەن ءدامدى اس, تۇنگى وتتىڭ اينالاسىندا وتىرىپ ۇجىم بولىپ شىرقاعان حيت اندەر ءدۇيىم جۇرتتىڭ كوڭىلىن كوككە كوتەردى. دەمالىس ايماعىنان اۋەلەگەن اندەر قاتاركولدىڭ اسپانىندا قالىقتاپ, توڭىرەككە تۇگەل تاراپ جاتتى.
بۇل كۇندەر ءبىزدىڭ ۇجىم بولىپ جاقسى جۇمىس ىستەۋمەن قاتار, جاقسى دەمالا الاتىنىمىزدى كورسەتتى. عاجايىپ دەمالىستان كۇش-قۋات, جاعىمدى ەنەرگيا جيناپ قايتتىق. ۇجىمنىڭ اۋىزبىرلىگى مەن قارىم-قاتىناسى (كوممۋنيكاتسياسى) نىعايىپ, ىنتىماعى مەن بەرەكەسى ارتىپ, كورپوراتيۆتىك رۋحىمىز بيىكتەي ءتۇستى!
