كەشە قالالىق قوعامدىق كەڭەس وتىرىسىندا قالا اكىمدىگىنە قاراستى ۆەدومستۆولىق ۇيىمدار مەن مەملەكەتتىك كاسىپورىندارىندا جۇمىس ءىستەيتىن ازاماتتارعا ءبىر ميلليون تەڭگە مولشەرىندە تۇرعىن ءۇي سەرتيفيكاتتارىن بەرۋ ماسەلەسى قارالدى.
بۇل تۋرالى بايانداما جاساعان جۇمىسپەن قامتۋ جانە الەۋمەتتىك قورعاۋ باسقارماسى باسشىسىنىڭ ورىنباسارى ءانۋار سايپوۆ وسى كۇندەرى اتالمىش سەرتيفيكاتتار مۇعالىمدەرگە, دارىگەرلەرگە, الەۋمەتتىك قىزمەتكەرلەرگە, مادەنيەت جانە سپورت قىزمەتكەرلەرىنە, پوليتسەيلەرگە, مۇگەدەك بالالارى بار وتباسىلارعا, كوپبالالى انالار مەن تولىق ەمەس وتباسىلارعا بەرىلەتىنىن جەتكىزدى. وسى ماقساتقا بولىنگەن 1,5 ملرد تەڭگەگە 1,5 مىڭ سەرتيفيكات بەرۋ جوسپارلانىپ وتىر. سونىڭ ىشىندە 500 سەرتيفيكات بيۋدجەتتىك ۇيىمداردىڭ قىزمەتكەرلەرىنە تيەسىلى. قازىرگى كۇنى 242 سەرتيفيكات الەۋمەتتىك وسال توپتارعا جاتاتىن ازاماتتارعا بەرىلدى.
وتىرىستا قوعامدىق كەڭەس مۇشەسى ءاسيما بيمەندينا بۇل ساناتقا قوسىمشا ءبىلىم جانە كاسىپتىك-تەحنيكالىق, مەكتەپالدى دايارلىق پەداگوگتارىن ۇمىتپاۋدى ەسكەردى. سونداي-اق, بۇل ساناتقا عىلىمي قىزمەتكەرلەردى قوسۋ دا ۇسىنىلدى.
