1 قىركۇيەك – ءبىلىم كۇنى!
كوپتەن كۇتكەن العاشقى قوڭىراۋ مەرەكەسى دە كەلىپ جەتتى. بۇگىن استانا قالاسىندا 129 مىڭعا جۋىق وقۋشى مەكتەپكە باردى. ال العاش رەت مەكتەپ تابالدىرىعىن اتتايتىن بالدىرعانداردىڭ سانى 21 مىڭعا جۋىقتايدى.
-بۇگىن قالانىڭ بارلىق مەكتەبىندە بىركەلكى «مەن – ەلىمنىڭ پاتريوتىمىن!» اتتى ساباق وتەدى. بۇل ءدارىس تاۋەلسىزدىگىمىزدىڭ 25 جىلدىعىنا ارنالادى.
-بيىلعى وقۋ جىلىندا ءبىرىنشى سىنىپتار عانا بەس كۇندىك وقۋ جۇيەسىمەن ءبىلىم الادى. بالالار 1 قىركۇيەكتەن
1 ماۋسىمعا دەيىن 35 اپتا وقيدى.
-ءبىرىنشى سىنىپقا «جاراتىلىستانۋ» جانە «كوركەم ەڭبەك» پاندەرى ەنگىزىلسە, 5-7 سىنىپتار «روبوتوتەحنيكا» ەلەكتيۆتى كۋرسىن وقيتىن بولادى.
– ايتپاقشى, بيىل ەلوردالىق وقۋشىلار وقۋلىق ىزدەپ, اۋرەگە تۇسكەن جوق. سىنىپ جەتەكشىلەرى 10 تامىزدان باستاپ ءتيىستى وقۋلىقتاردى بالالارعا تاراتا باستادى.
-باستاۋىش سىنىپ وقۋشىلارىن ىستىق تاماقپەن قامتاماسىز ەتۋ ماسەلەسى دە شەشىلگەن. وسى وقۋ جىلىندا 65 مىڭنان استام وقۋشى تەگىن تۇسكى اسپەن قامتاماسىز ەتىلمەك.
-بيىل جىل سوڭىنا دەيىن №26 مەكتەپتە, كوررەكتسيالىق مەكتەپ-ينتەرناتىندا, №17, 22 مەكتەپتەرگە جاپسارلاس سالىنعان عيماراتتاردا بىرىڭعاي فورما ەنگىزىلەدى دەگەن جوسپار بار.
-وتكەن وقۋ جىلى ەلوردالىقتار ءۇشىن ناتيجەلى بولدى. ۇلتتىق ءبىرىڭعاي تەستىلەۋدىڭ قورىتىندىسى بويىنشا ءۇش مەكتەپ قازاقستانداعى مامانداندىرىلعان ۇزدىك وندىقتىڭ قاتارىنا ەندى. ولاردىڭ ىشىندە №82 «دارىن» مامانداندىرىلعان ليتسەيى, №9 «زەردە» دارىندى بالالارعا ارنالعان مەكتەپ پەن دارىندى قىزدارعا ارنالعان قازاق-تۇرىك ليتسەيى بار.
-قالادا تالانتتى وقۋشىلاردىڭ قابىلەتىن ءارى قاراي شىڭداۋعا ارنالعان بەس مەكتەپ ىستەيدى. جوعارىدا اتالعان ءۇش ءبىلىم وشاعىنان باسقا, ولاردىڭ ساپىنان ۇلدارعا ارنالعان قازاق-تۇرىك ليتسەيى مەن دارىندىلارعا ارنالعان
№81 Astana English School مەكتەبىن كورۋگە بولادى.
– بيىلعى جاڭا وقۋ جىلىندا ءبىلىم سالاسىنداعى جەتىستىگىمىز بۇدان دا ەسەلەنىپ, وقۋشىلارىمىز تالاي سايىستاردان الدا كەلەدى دەگەن ءۇمىتىمىز بار.