كەشە قالالىق اكىمدىكتە «قازاقستانداعى 100 جاڭا ەسىم» جوباسىنىڭ ەكىنشى كەزەڭىنە قاتىسۋشىلاردى شاقىرۋ ماقساتىندا ءباسپاسوز-ءماسليحاتى ءوتتى.
شاراعا «استانا جاستارى» ورتالىعى كمم ديرەكتورى ۇكىباي نۇرپەيىسوۆ پەن «قازاقستان ستۋدەنتتەرىنىڭ اليانسى» رەسپۋبليكالىق ستۋدەنتتەر قوزعالىسىنىڭ جەتەكشىسى ءىلياس تۇستىكباەۆ قاتىسىپ, بيىلعى جوبانىڭ ەرەكشەلىكتەرى جايىندا بايانداپ بەردى.
«100 جاڭا ەسىم» جوباسى قازاقستاندا ەرەكشە تالانتتى جانە تۇلعالىق سيپاتقا يە ادامداردى ىزدەپ, جوباعا بەلسەنە قاتىسۋعا شاقىرادى. اتالعان جوبا كاسىبي سالادا جەتىستىككە جەتكەن, وزگەگە ۇلگى بولاتىن ادامدارعا ارنالعان. وسىمەن ەكىنشى جىل ۇيىمداستىرىلىپ وتىرعان جوبانىڭ وتكەن جىلعىدان وزگەشەلىگى ۇمىتكەر بىلتىرعىداي ءوزىن-ءوزى ۇسىنا المايدى. ولار تەك ۇيىم اتىنان ۇسىنىلادى. سونىمەن قاتار بيىل ۇكىمەتتىك ەمەس ۇيىمدار وكىلدەرىنە باسىمدىق بەرىلمەك. سول سياقتى وتكەن جىلعى ىرىكتەۋ كەزەڭىنەن وتپەي قالعان ۇمىتكەرلەر بيىل تاعى دا ءوتىنىم بەرۋگە قۇقىلى.
– ءبىز استاناداعى جوعارى وقۋ ورىندارى مەن كوللەدج-مەكتەپتەرگە الدىن الا حات جازعان بولاتىنبىز. ازىرگە مەكەمەگە 50 ۇمىتكەردەن ءوتىنىش ءتۇستى. ءوتىنىش قازان ايىنا دەيىن قابىلدانادى. جوبا جەڭىمپازدارىن جىل سوڭىنا دەيىن اقپارات جانە كوممۋنيكاتسيالار مينيسترلىگى جانىنداعى كوميسسيا انىقتايتىن بولادى, – دەيدى ۇكىباي نۇرپەيىسوۆ.
