جاسوسپىرىمدەر وليمپياداسى: قوس التىن, ءبىر كۇمىس, ءبىر قولا

ارگەنتينانىڭ بۋەنوس-ايرەس قالاسىندا ءوتىپ جاتقان جاسوسپىرىمدەر وليمپياداسىندا قازاقستان قۇراماسى ازىرگە ءتورت مەدالمەن 24-ورىنعا تۇراقتاپ تۇر.

ەل قورجىنىنا العاشقى التىندى دزيۋدودان بەكارىس سادۋاقاس سالدى. ول 100 كگ سالماق دارەجەسىندە سىنعا ءتۇستى. فينالدان گرۋزين يليا سۋلۋمانيدزەنى قوسىمشا ۋاقىتتا جەڭدى.
ەكىنشى التىن – كانوە ەسۋدەن الدىنا جان سالماعان دياس ءباحرادديننىڭ ەنشىسىندە. فينالدا ول وزبەك سپورتشىسى يسلومجون ابدۋسلوموۆ­پەن التىنعا تالاسقان بولاتىن. تارتىستى وتكەن جارىستا دياس 1:54.66 ۋاقىت كورسەتكىشىمەن مارەگە ءبىرىنشى بولىپ كەلدى.
ال كۇمىس جۇلدەنى دزيۋدودان مار­گاريتا گريتسەنكو الدى. ول 78 كگ سالماق دارەجەسىندە باق سىناپ, شەشۋشى كەزدەسۋدە نەمىس رافاەللا يگلعا ەسە جىبەرىپ قويدى.
سونىمەن قاتار ستەللا سۋحانوۆا كانوە ەسۋدەن سپرينت جارىسىندا قولا جۇلدەگەر اتاندى. سۋحانوۆا ءۇشىنشى ورىن ءۇشىن تالاستا نەمىس دجينا زينتتەن ءۇش سەكۋند جىلدام بولدى. ناتيجەسى – 1:54:25.
قازاقستاندىق ۆەلوسپورتشىلاردىڭ اياقالىسى قۋانتادى. ءبىزدىڭ سپورتشىلار توپتاسىپ جارىسۋ سىنىندا ەكى مارتە جەڭىمپاز اتاندى. قىزدار اراسىندا سۆەتلانا پاششەنكو مارەگە ءبىرىنشى كەلسە, ەرلەر اراسىندا گلەب برۋسەنسكيگە تەڭ كەلەر ەشكىم بولعان جوق. ازىرگە ءبىزدىڭ كوماندا جالپى ەسەپتە كوش باستاپ كەلەدى. الدا ءالى ءۇش كەزەڭ بار ەكەنىن ەستەرىڭىزگە سالامىز.
بۇل جازعى وليمپياداعا ەل نامىسىن 41 سپورتشى قورعاپ جاتىر. ولار ءجۇزۋ, بوكس, كۇرەس, دزيۋدو, باس­كەتبول, سۋعا سەكىرۋ, ترياتلون, گيمناستيكا, تەننيس, جەڭىل اتلەتيكا, كاراتە, تاەكۆوندو سىندى سپورت تۇرلەرىنەن مەدالعا تالاسادى.

بايراقتى باسەكە 18 قازاندا مارەسىنە جەتەدى.

دەرەككوزى: olimpic.kz