قازاقستان حالقىنىڭ بىرلىگى كۇنى ەلوردادا ءسان-سالتاناتىمەن اتالىپ ءوتتى. قالا اكىمدىگىنىڭ الدىنداعى ورتالىق الاڭعا جينالعان ءدۇيىم جۇرت كەڭ-بايتاق وتانىمىزدى مەكەندەگەن جۇزدەن استام ۇلتتار مەن ۇلىستاردىڭ ءداستۇرلى دوستىعىن دارىپتەگەن كونتسەرتتى تاماشالادى. ەلوردالىقتارمەن بىرگە تاتۋلىق تويىن تاماشالاۋعا قر پرەمەر-ءمينيسترى كارىم ءماسىموۆ پەن استانا قالاسىنىڭ اكىمى يمانعالي تاسماعامبەتوۆ كەلدى.
استانا تۇركى دۇنيەسىنىڭ مادەني استاناسى دەپ جاريالانعانى بەلگىلى. بىرلىك مەرەكەسىنىڭ بيىلعى ەرەكشەلىگى دە سول, ناۋرىز مەيرامىنان كەيىنگى ەلدەگى كۇللى ۇلتتارمەن بىرلەسىپ توي¬لايتىن اتاۋلى كۇن وسى – 1 مامىر مەرەكەسى. سوندىقتان, ۇلتارالىق تاتۋلىقتى تۋ ەتكەن قازاقستان ءۇشىن بۇل مەيرامنىڭ ماڭىزى زور.
الاڭداعى كونتسەرت «دۇنيە-دۋمان» دەگەن اتاۋمەن ءوتتى. ءا دەگەننەن مىڭ بۇرالعان بيشىلەر شىعىپ, قازاقتىڭ بيىمەن كونتسەرتتى باستاپ بەردى. ودان سوڭ جينالعان جۇرت نەمىستەردىڭ «ۆيدەرگەبۋرت», دۇڭعانداردىڭ «حۋ¬ەيتسزۋ», قىرعىزداردىڭ «قىرعىزستان- استانا», ۋكرايندەردىڭ «وبەرەگ», پولياكتاردىڭ «پولياكي», بەلارۋستاردىڭ «زلاتا», گرۋزيندەردىڭ «كولحەتي», ارميانداردىڭ «ۆان», ازەربايجانداردىڭ «حازار», تۇرىكتەردىڭ «احىسكا», تاتارلار مەن باشقۇرتتاردىڭ «تان», سونداي-اق ۇيعىر, تۇركىمەن, تاجىك, كورەي وكىلدەرىنىڭ ونەرلەرىن تاماشالادى.
بۇعان قوسا, وسى ەتنو-مادەني بىرلەستىكتەردىڭ ۇيىمداستىرۋىمەن ورتالىق الاڭدا كورمە ءوتتى. قاز- قاتار تىگىلگەن 16 شاتىرعا باس سۇققان قوناقتار ءار ۇلتتىڭ تاريحى مەن تۇرمىسىمەن تانىسىپ, ونەرىن تاما¬شالاپ, داستارحانىنان ءدام تاتتى.
سونداي-اق الاڭدا بالالارعا ارنالعان ويىن قالاشىقتارى مەن سپورت الاڭقايلارى جۇمىس ىستەپ تۇردى. ساۋدا-ساتتىق ۇيىمداستىرىلدى. مۇنداي بۇقارالىق مەرەكەلەۋ قارجى مينيسترلىگىنىڭ قارسى بەتىندەگى الاڭدا, م.وتەمىسوۆ اتىنداعى وقۋشىلار سارايىنىڭ الدىندا جانە ەلوردا ساياباعىندا دا ءوتتى.
اينۇر شوشاەۆا
