قازاقستاندىقتارعا جىل باسىنان بەرى مۇگەدەكتىك جانە اسىراۋشىسىنان ايىرىلۋ جاعدايى بويىنشا جاردەماقى تۇرىندە 292 ملرد تەڭگەدەن استام قاراجات تولەندى.
2021 جىلعى قاڭتار-قىركۇيەك ايلارى ارالىعىندا رەسپۋبليكالىق بيۋدجەتتەن مۇگەدەكتىگى بويىنشا مەملەكەتتىك الەۋمەتتىك جاردەماقى تولەۋگە 232,4 ملرد تەڭگە, اسىراۋشىسىنان ايىرىلۋ جاعدايىنا بايلانىستى مەملەكەتتىك الەۋمەتتىك جاردەماقى تولەۋگە 59,8 ملرد تەڭگە باعىتتالدى.
بيىل قىركۇيەك ايىندا رەسپۋبليكالىق بيۋدجەتتەن مۇگەدەكتىگى بويىنشا مەملەكەتتىك الەۋمەتتىك جاردەماقى تولەۋگە 25,7 ملرد تەڭگە, اسىراۋشىسىنان ايىرىلۋ جاعدايى بويىنشا مەملەكەتتىك الەۋمەتتىك جاردەماقى تولەۋگە 5,5 ملرد تەڭگە جۇمسالدى.
وسى جىلى 1 قازانداعى جاعداي بويىنشا مۇگەدەكتىگىنە بايلانىستى مەملەكەتتىك الەۋمەتتىك جاردەماقى الۋشىلاردىڭ سانى 528,1 مىڭ ادامدى, اسىراۋشىسىنان ايىرىلۋ جاعدايى بويىنشا 134,3 مىڭ ادامدى قۇرايدى.
مۇگەدەكتىك جانە اسىراۋشىسىنان ايىرىلۋ جاعدايى بويىنشا مەملەكەتتىك الەۋمەتتىك جاردەماقىلاردىڭ مولشەرى مۇگەدەكتىكتىڭ توبىنا جانە سەبەبىنە, قايتىس بولعان (قازا تاپقان) اسىراۋشىنىڭ اسىراۋىنداعى ادامدار سانىنا, سونداي-اق ءتيىستى قارجى جىلىنا ارنالعان «رەسپۋبليكالىق بيۋدجەت تۋرالى» زاڭىندا بەلگىلەنەتىن ەڭ تومەن كۇنكورىس دەڭگەيىنىڭ شاماسىنا بايلانىستى بولادى.
1 قازانداعى جاعداي بويىنشا مۇگەدەكتىگى بويىنشا مەملەكەتتىك الەۋمەتتىك جاردەماقىنىڭ ورتاشا مولشەرى 48743 تەڭگەنى, اسىراۋشىدان ايىرىلۋ جاعدايى بويىنشا مەملەكەتتىك الەۋمەتتىك جاردەماقىنىڭ ورتاشا مولشەرى 40995 تەڭگەنى قۇرادى.
