م.وتەمىسوۆ اتىنداعى وقۋشىلار سارايىندا الەۋمەتتىك جاعدايى تومەن وتباسىلاردان شىققان بالالارعا ەلوردا اكىمىنىڭ اتىنان جاڭا جىلدىق سىيلىقتاردى دەربەس جەتكىزۋ بويىنشا «جاڭا جىلدىق ساپار» ەكسپرەسس-ەستافەتاسى باستالدى.
ەستافەتانىڭ سالتاناتتى اشىلۋىن ءداستۇر بويىنشا اياز اتا مەن اقشا قار, ەل تاۋەلسىزدىگىنىڭ 30 جىلدىعىن بەينەلەيتىن ەرتەگى كەيىپكەرلەرى مەن 30 اعايىندى ايازدار قورشاپ الدى. اتا-اناسىنىڭ قامقورلىعىنسىز قالعان, از قامتىلعان جانە كوپبالالى وتباسىلاردان شىققان, ەرەكشە ءبىلىم الۋ قاجەتتىلىگى, مۇگەدەكتىگى بار بالالار, سونداي-اق وقۋدا, سپورتتا, شىعارماشىلىق پەن قوعامدىق ومىردە جەتىستىككە جەتكەن دارىندى جاستار نۇر-
سۇلتان قالاسى اكىمىنىڭ اتىنان كيىم ساتىپ الۋعا 50 مىڭ تەڭگەگە سەرتيفيكات, تاتتىلەر, ۇستەل ويىنىن جانە قۇتتىقتاۋ حاتى تۇرىندەگى جاڭا جىلدىق سىيلىقتار الدى. جاڭا جىلدىق سىيلىقتاردى اياز اتا مەن اقشا قار جەتكىزدى. سىيلىقتاردى جەتكىزۋ قالا بويىنشا «جاڭا جىلدىق رەيس» تۇرىندە ءوتتى. قازاقستان پرەزيدەنتى مەن ەلوردا اكىمىنىڭ اتىنان بارلىعى 800 استانالىق بالا جاڭا جىلدىق سىيلىقتارعا يە بولدى.
«جاڭا جىلدىق مەرەكەلەر – بالالارىمىزدىڭ عاجايىپتار مەن سيقىرلارعا سەنەتىن كەزى. بالالارىمىزعا ارناپ «جاڭا جىلدىق ساپار» ەكسپرەسس-ەستافەتاسىن ۇيىمداستىردىق. مەملەكەت باسشىسى مەن اكىمدىكتىڭ اتىنان الەۋمەتتىك جاعدايى تومەن وتباسىلاردان شىققان 600 بالاعا سىيلىقتار مەن اقشالاي سەرتيفيكاتتار تاپسىرىلدى. سونىمەن قاتار اۋدان اكىمدىكتەرى بالالاردى كەلە جاتقان جاڭا جىل مەرەكەسىمەن قۇتتىقتاۋدا.
بۇگىن ارىپتەستەرىمىزبەن بىرگە «مامانداندىرىلعان بالالار ۇيىنە» باردىق. جاڭا جىل قارساڭىندا بالالارعا ەرەكشە كوڭىل كۇي سىيلاعانىمىز ءجون. بالالارعا ارنالعان مەرەكەلىك ءىس-شارا ۇيىمداستىرىلدى. ادەتتەگىدەي, اياز اتا قۇتتىقتاپ, بالالارعا سىيلىقتار ۇيلەستىردى.
بۇل بالالار ءۇيىنىڭ ەرەكشەلىگى – وندا وڭالتۋ قىزمەتتەرى دە كورسەتىلەدى. ۇيىمدا كۇردەلى جوندەۋ جۇرگىزىلدى, ماتەريالدىق-تەحنيكالىق بازا جاڭارتىلدى. 2022 جىلعى قاڭتاردان باستاپ پەداگوگتاردىڭ, ونىڭ ىشىندە ارنايى مەكەمەلەردە جۇمىس ىستەيتىن مامانداردىڭ جالاقىسى 20 پايىزدان استام كوتەرىلەدى» دەدى نۇر-سۇلتان قالاسىنىڭ اكىمى التاي كولگىنوۆ ەلوردادا ءوتىپ جاتقان جاڭا جىلدىق ءىس-شارالار جايىندا.
