ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە قازاقستان جازۋشىلار وداعىنىڭ مۇشەسى, اقىن ەسەنگەلدى ءسۇيىنوۆتىڭ «ارايلى تاڭ» اتتى شىعارماشىلىق كەشى ءوتتى.
ادەبي كەشتىڭ تىزگىنىن ۇستاعان عالىم راحىمجان تۇرىسبەك قالامگەردىڭ ءومىرى مەن شىعارماشىلىعى تۋرالى ايتا كەلىپ: «ءسۇيىنوۆ ءوز ولەڭدەرىندە ءومىر كورىنىستەرىن بارىنشا شىنايى, ايشىقتى بوياۋلارمەن سۋرەتتەيدى. ول كوڭىلى ۇناتقان, جۇرەگىن تەربەگەن ساتتەردى شەبەر تىلمەن جەتكىزە بىلەدى» دەپ اتاپ كورسەتتى. سونداي-اق كەش يەسىنە قر ءبىلىم جانە عىلىم مينيسترلىگىنىڭ قۇتتىقتاۋ حاتىن وقىپ بەردى. نۇر-سۇلتان قالالىق قوعامدىق دامۋ ىستەرى باسقارماسى باسشىسىنىڭ ورىنباسارى ەرنار قاسىم اقىنعا شاھار باسشىسى التاي كولگىنوۆتىڭ العىس حاتىن تابىس ەتتى. سونىمەن بىرگە اكادەميك ۋاليحان قاليجان, پروفەسسور سەرىك نەگيموۆ, ساتيريك كوپەن امىربەك سەكىلدى ازاماتتار ءسوز الىپ, ونىڭ اقىندىعىن عانا ەمەس, جۋرناليستيكا سالاسىنداعى جازعان ەڭبەكتەرىن ايتىپ ءوتتى.
كەش بارىسىندا ستۋدەنتتەر اقىن ولەڭدەرىن جاتقا وقىپ, جينالعانداردى جىلى اسەرگە بولەدى. اۋەزدى ءان مەن كۇمبىرلەگەن كۇي دە توگىلدى. ۋنيۆەرسيتەت باسشىلىعى اقىندى «كۇلتەگىن» مەدالىمەن ماراپاتتادى.
شارا سوڭىندا ەسەنگەلدى ءسۇيىنوۆ جينالعان قاۋىمعا سوڭعى جىلدارى جازعان جاڭا ولەڭدەرىن وقىپ, قىزىقتى دا تارتىمدى كەشتى ۇيىمداستىرۋشىلارعا العىسىن ايتتى.
ۇقساس جاڭالىقتار
Leave a Reply