استانادا «رۋحاني جاڭعىرۋ» باعدارلاماسى اياسىندا اقىن, فيلوسوف, اعارتۋشى شاكارىم قۇدايبەردىۇلىنىڭ تۋعانىنا 160 جىل تولۋىنا جانە ەلوردانىڭ 20 جىلدىعىنا ارنالعان قازاقستاننىڭ ەڭبەك سىڭىرگەن قايراتكەرى ورازعالي سەيىتقازىنىڭ «جاساي بەر, كيەلى سەمەي» اتتى جەكە شىعارماشىلىق كونتسەرتى ءوتتى. ل.گۋميلەۆ اتىنداعى ەۋرازيا ۇلتتىق ۋنيۆەرسيتەتى جانىنداعى «كاۋسار» مادەني-تانىمدىق بىرلەستىگى ۇيىمداستىرعان كەشتە ۇلى ابايدان باستاپ, ايبەك بەكبوسىنعا دەيىنگى قاسيەتتى شىڭعىستاۋ توپىراعىنان تۇلەپ ۇشقان كۇيشى, كومپوزيتورلاردىڭ تۋىندىلارى شالقىدى.
شىندىعىندا سەمەي توپىراعىنىڭ قازاق رۋحانياتىنا بەرگەنى مول. اباي ەلىنىڭ قازاقتىڭ رۋحاني مەككەسى دەپ اتالۋى تەگىننەن-تەگىن ەمەس. باسقاسىن ايتپاعاندا, سول ەلدەن شىققان تالاي تۇلعا ءان-اۋەن الەمىنە سارا جول سالىپ, ۇلتتىق مۋزىكامىزدى بايىتتى.
ماسەلەن, ءشامشى قالداياقوۆتى قازاق ءۆالسىنىڭ كورولى دەپ اتايمىز. قاسيەتى دە, قاسىرەتى دە كوپ سارجال جەرىندە تۋىپ, قىرىق جاستىڭ قىرقاسىنان ەندى اسا بەرگەندە ۇزىلگەن بەكەن جاماقاەۆتى دا وسىلاي اتاۋعا ابدەن بولادى. كەشتە ءسوز العان اكادەميك سەيىت قاسقاباسوۆ وسىعان ەمەۋرىن بايقاتتى. وسىدان جارتى عاسىرداي بۇرىن سەمەي جەرىندە قۇرىلعان «قالامقاس» ءان-بي ءانسامبلى كەزىندە بۇكىل وداقتى دۇرىلدەتتى. وسى انسامبلدەن جانىبەك كارمەنوۆ, بايان ساعىمباەۆا قاناتتاندى.
ال كەش يەسى ورازعالي سەيىتقازى قۇرمانعازى اتىنداعى كونسەرۆاتوريانىڭ پريما-قوبىز سىنىبىن فاتيما بالعاەۆادان, قىلقوبىز سىنىبىن داۋلەت مىقتىباەۆتان ءبىتىردى. بۇعان قوسا, تۇرعىت وسمانوۆتان ديريجەرلىكتى, لاتيف حاميديدەن مۋزىكالىق شىعارمالاردى وركەسترگە ءتۇسىرۋدىڭ قىر-سىرىن ۇيرەندى. 1974 جىلدان بەرى سەمەي جەرىندە جەمىستى ەڭبەك ەتىپ كەلەدى. وسى جىلدار ارالىعىندا قازاق ۇلتتىق اسپاپتار وركەسترىنە, ۇرمەلى اسپاپتار وركەسترىنە, سيمفونيالىق وركەسترگە, حورعا, جەكەلەگەن مۋزىكالىق اسپاپتارعا ارناپ تالاي شىعارمانى لايىقتادى. ۇستاز رەتىندە ءۇش ادىستەمەلىك وقۋلىق, وننان استام كۇي, وتىزدان استام ءان جازدى. ورازعالي سەيىتقازى تۋرالى بۇل مالىمەتتەردىڭ ءبارىن كەش تىزگىنىن ۇستاعان «كاۋسار» مادەني-تانىمدىق بىرلەستىگىنىڭ جەتەكشىسى, قازاقستاننىڭ ەڭبەك سىڭىرگەن ءارتىسى, ونەرتانۋ پروفەسسورى كەنجەعالي مىرجىقبايدان ەستىدىك.
تازا ۇلتتىق سيپاتتا وتكەن كونتسەرت كورەرمەننىڭ جانسارايىن اشىپ, حالىق دەمالىپ قالدى. كەزىندە تسەلينوگراد وبلىستىق كوميتەتىنىڭ ەكىنشى حاتشىسى بولعان سەيىتقازى نۇرپەيىسوۆ پەن ۇلاعاتتى ۇستاز رۋزيا ساعاديەۆانىڭ كەش سوڭىندا رۋحتانىپ سويلەگەن سوزدەرى سوعان انىق كوز جەتكىزدى.
