كورەيلەر جاقىنداسا ءتۇستى
سولتۇستىك كورەيا مەن وڭتۇستىك كورەيا ەلدەرىنىڭ اسكەرلەرى شەكارالاس ايماقتى تازارتۋعا كىرىستى.
وڭتۇستىك كورەيا قورعانىس مينيسترلىگىنىڭ مالىمەتىنە سايكەس, اسكەري قىزمەتكەرلەر پانمۋدجوننىڭ دەميليتاريزاتسيالانعان ايماعىندا جەر ءۇستى مينالارىن الىپ تاستاۋعا كىرىستى. جارىلعىش قۇرىلعىلار 20 كۇن ىشىندە جويىلادى.
Associated Press اگەنتتىگىنىڭ حابارلاۋىنشا, وڭتۇستىككورەيالىقتار ەكى شەكارا ايماعىن تازارتقان. ال سولتۇستىك كورەيانىڭ قاي كەزەڭگە جەتكەنى ازىرگە بەلگىسىز. شەكارانى جارىلعىش زاتتاردان تازارتۋ ماسەلەسى 18-20 قىركۇيەك كۇنى پحەنياندا وتكەن كورەيلەر اراسىنداعى سامميتتە تالقىلانىپتى. بۇعان قوسا, الداعى ۋاقىتتا كورەي ەلدەرىنىڭ اراسىندا تەمىرجول قاتىنايتىن بولادى.
ءۇندىستان اقش-تان ۇرىكپەيدى
ءۇندىستان بيلىگى رەسەيدەن س-400 قارۋىن ساتىپ الۋىنا بايلانىستى اقش تاراپى سانكتسيا سالۋى مۇمكىن ەكەنىن بولجاپ وتىر. الايدا بۇعان قاراماستان, بۇل ساۋدا الداعى ۋاقىتتا جالعاسا بەرمەك.
– ءبىز امەريكادان تەحنولوگيا ساتىپ الۋ ءۇشىن بايلانىس ورناتقانىمىزبەن تاۋەلسىز ساياساتتى ۇستانامىز. الداعى ۋاقىتتا اقش-پەن تۇسىنىسپەۋشىلىك بولۋى مۇمكىن ەكەندىگىنە قاراماستان, رەسەيدەن س-400 كەشەنىن ساتىپ الۋدى توقتاتپايمىز, – دەدى ءۇندىستان قورعانىس شتابىنىڭ باسشىسى بيپين راۆات.
وتكەن اپتادا رەسەي مەن ءۇندىستان س-400 كەشەنىن جەتكىزۋ تۋرالى كەلىسىمشارتقا قول قويعان بولاتىن. جاڭا بەس زىمىراننىڭ قۇنى 5,43 ملرد دوللاردى قۇرايدى.
اۋا تازالايتىن اۆتوبۋس
ۇلىبريتانيادا «جاسىل» جوبا – اۋا تازالايتىن اۆتوبۋستار جۇرە باستادى.
قالالىق قوعامدىق كولىكتەردىڭ اسەرىنەن قورشاعان ورتانىڭ لاستانۋى پروبلەماسىن شەشۋ ءۇشىن بۇل باستامانى Go-Ahead كومپانياسى قولعا العان. الدىمەن جوبانى ەڭ لاستانعان قالالاردىڭ ءبىرى ساۋتگەمپتوندا ەكسپەريمەنت رەتىندە ىسكە قوسقان. ەرەكشە اۆتوبۋستاردىڭ توبەسىنە ارنايى سۇزگى جاسالدى. اۆتوبۋس قوزعالا باستاعاندا جۇمىس ىستەيتىن سۇزگىش زياندى زاتتاردى ۇستاپ قالىپ, سىرتقا تازا اۋا شىعارادى. جوبالاۋشىلار مۇنداي اۆتوبۋستار 10 مەتر بيىكتىككە دەيىنگى اۋانى تازارتاتىنىن ايتادى. وسىنداي قۇرىلعىنى ساۋتگەمپتوننىڭ اۆتوبۋس پاركتەرى تۇگەل ورناتسا, شاھار اۋاسى جىلىنا بىرنەشە رەت تازارماق.
