قايناعان قازاننىڭ ىشىندە, تاريحي وقيعالاردىڭ ەپيتسەنترىندە بەلسەندىلىكپەن تىڭعىلىقتى جۇمىس ىستەگەندىكتەن بولار, جاڭا ەلوردامىز – استانا قالاسىنىڭ ءتاي-ءتاي باسقان ءاربىر قادامى, استانا قالاسىنىڭ نەگىزىن قالاۋشى, ونىڭ باس ارحيتەكتورى نۇرسۇلتان نازارباەۆتىڭ جانقيارلىق ەڭبەكتەرى مەنىڭ جۇرەگىمدە ساقتالعان, كۇنى كەشەگىدەي كوز الدىمدا.
1999 جىلدىڭ 12 قازانى كۇنى قالانىڭ وڭتۇستىك-شىعىس ايماعىندا جاڭا ساياباققا اعاشتار وتىرعىزۋ جۇمىستارى ۇيىمداستىرىلدى. ءدال سول كۇنى نۇرلان بالعىمباەۆ باسقارعان ۇكىمەت وتستاۆكاعا كەتىپ, ورنىنا قاسىم-جومارت توقاەۆ باستاعان جاڭا ۇكىمەت قۇرامى سايلاندى. جاڭا باقتى سالۋعا ەلباسى وزىمەن بىرگە جاڭا تاعايىندالعان ۇكىمەت مۇشەلەرىن, مينيسترلەردى, پارلامەنتتىڭ قوس پالاتاسىنىڭ دەپۋتاتتارىن, قالا باسشىلارىن ەرتىپ كەلدى. نۇرسۇلتان ءابىشۇلى ءوز قولىمەن جاس تال وتىرعىزىپ, وعان سۋ قۇيدى. سالدەن كەيىن پرەزيدەنتتى جۋرناليستەر قاۋىمى قورشاپ الىپ, سۇراقتارىن بۇرقىراتىپ قويا باستادى. مەن استانا قالاسىنىڭ ءباسپاسوز حاتشىسى رەتىندە بۇل بريفينگتى جۇرگىزىپ تۇردىم.
ەلباسى جاڭا ساياباقتىڭ بولاشاعىن قالاي كورەتىنىن جاقسىلاپ ايتىپ بەردى. بۇل باق جاس استانامىز سەكىلدى جاسىل جەلەككە بولەنىپ, ادامدار دەمالاتىن, بالالار اسىر سالىپ وينايتىن قۇتتى مەكەنگە اينالاتىنىن تىلگە تيەك ەتتى. كەنەتتەن جۋرناليستەردىڭ ءبىرى كۇتپەگەن توسىن سۇراق قويدى: «ساياباق قالاي اتالاتىن بولادى؟ ونىڭ اتى بولا ما؟»
– «ارينە, بولادى. سەندەر ۇسىنىس جاساڭدار, مەن قولدايمىن» دەپ مەملەكەت باسشىسى الگى سۇراق قويعان جۋرناليسكە بايىپپەن تىكە قارادى. ساۋال قويعانىمەن, وندايدى كۇتپەگەن ارىپتەس باۋىرىمىزدىڭ ءلام-ميم دەپ جاۋاپ قاتۋعا مۇرشاسى بولماي, ابدىراپ قالدى. پاۋزا بولدىرماۋ ءۇشىن اڭگىمەگە مەن ارالاستىم. سول مەزەتتە مەنىڭ اۋزىما مىناداي ءسوز ءتۇستى: «نۇر اعا! مەندە ۇسىنىس بار. ءسىز ءبىرىنشى تالىن وتىرعىزعان ساياباققا «جەرۇيىق» دەگەن ات لايىق سياقتى؟ سولاي اتاساق قالاي بولادى؟» ەلباسىعا ۇسىنىسىم بىردەن ۇنادى.
«ءبىزدىڭ ابىز بابامىز, فيلوسوف, جيھانكەز, اتى اڭىزعا اينالعان اسان قايعى وسى سارىارقانى تاڭداپ, «جەرۇيىق» جەر دەپ اتاعان. مەن قولدايمىن. مەن قولدايمىن» دەپ نۇراعا ەكى مارتە قايتالادى.
پرەزيدەنت كۇتپەگەن جەردەن مەنىڭ ۇسىنىسىمدى قولدادى! «ەۋرازيا» ساۋدا ورتالىعىنىڭ جانىنداعى ساياباق سول ساتتەن باستاپ «جەرۇيىق» دەپ اتالدى. بۇل مىسال ءبىزدىڭ پرەزيدەنتىمىزدىڭ وزىندىك سيپاتىن, ونىڭ دەموكراتياشىلدىعىن, كەز كەلگەن يگى باستامانى, يدەيانى قولدايتىنىن دالەلدەيدى.نۇرسۇلتان نازارباەۆتىڭ ساياسي كورەگەندىگى, باتىلدىعى جانە قاي ىستە دە تەرەڭ ويلايتىندىعى تۋرالى ايتقاندا, ءسابيت مۇقانوۆتىڭ «اققان جۇلدىز» اتتى رومانىنداعى ءبىر ەپيزود ەرىكسىز ەسكە تۇسەدى.
– «ابىلاي حان جەتپىس جاسقا دەيىن جەتىپ, اۋىرىپ قالادى, وزىنە سەنىمدى بۇقار جىراۋدى شاقىرتادى.
– ورىندالماعان ارماندارىڭىز بەن نيەتتەرىڭىز بار ما؟ – دەپ سۇرادى قارت دانىشپان. ابىلاي وكىنە وتىرىپ, بىلاي دەدى:
– كوپ قان توگىلدى, ەگەر مەن ونى توكپەگەندە, وندا ونى مەنىڭ جاۋلارىم توگەر ەدى;
مەنىڭ حالقىم جەر-اناعا بەتىمەن بۇرىلىپ ۇلگەرمەدى, مەن قالا تۇرعىزىپ ۇلگەرمەدىم;
حالىقتى بىرىكتىرىپ ۇلگەرمەدىم, وندا جىكشىلدەر كوپ بولىپ شىقتى…»
وسى ديالوگ بولعان ۋاقىت پەن جانە قازىرگى ۋاقىت اراسىنا پاراللەلدەر جۇرگىزۋگە بولا ما ەكەن؟ پاراساتتى سانا مۇندايدىڭ ابدەن مۇمكىن ەكەندىگىن ايتادى. مۇمكىن ابىلايدىڭ ەجەلگى ارماندارىنىڭ پرەزيدەنتىمىز نۇرسۇلتان نازارباەۆتىڭ ناقتى ىستەرىندە كورىنۋىنىڭ سەبەبى وسى شىعار. ءبىزدىڭ قوعام بۇگىن بەيبىتشىلىك پەن تۇسىنىستىكتە ءومىر سۇرەدى جانە ارقاشان دوستىق كورشىلىك قاتىناسقا, اسپانىمىزدىڭ اشىق بولۋىنا, تاياۋ جانە الىس شەتەلدەرمەن ىنتىماقتاستىققا, ساياسي-ەكونوميكالىق جانە الەۋمەتتىك پروبلەمالاردىڭ دۇرىس شەشىلۋىنە كۇش سالىپ كەلەدى.
مىنا جاعدايدى ەرەكشە اتاپ ايتقىم كەلىپ وتىر. قازاقستان رەسپۋبليكاسىنىڭ تۇڭعىش پرەزيدەنتى – ەلباسىمىز ءوزىنىڭ كورەگەندىگىمەن, كۇش-جىگەرىمەن, پاراساتتىلىعىمەن جانە ۇلكەن ستراتەگ باسشى رەتىندە سان عاسىرلىق تاريحى بار ءوز حالقىن تۇڭعىش رەت ءبىرتۇتاس ەل رەتىندە بىرىكتىرە الدى جانە ەسىل وزەنىنىڭ جانىنان سۋ جاڭا ەلوردا – استانا قالاسىن تۇرعىزدى. ابىلاي حاننىڭ ارمانىن جۇزەگە تولىعىمەن اسىردى.وتپەلى كەزەڭدە ەل استاناسىن اۋىستىرۋ قاجەت پە ەدى؟ وسى سەكىلدى سۇراقتاردىڭ بارلىعىنا ن.نازارباەۆ ءوزىنىڭ «ەۋرازيا جۇرەگىندە» اتتى كىتابىندا بىلاي دەپ جاۋاپ بەردى:
«…مەن استانانى اۋىستىرۋدىڭ قازاقستاندى جاڭا تاۋەلسىز مەملەكەت رەتىندە نىعايتۋدا ماڭىزدى ءرول اتقاراتىنىنا سەنىمدى بولدىم.بىرىنشىدەن, استانانى اۋىستىرۋ العاشىندا ءبىز ءۇشىن گەوساياسي تۇرعىدان قازاقستاندى نىعايتۋعا باعىتتالعان قادام رەتىندە قاراستىرىلدى. وسى ارقىلى ءبىز بەيبىت سىرتقى ساياساتىمىزدىڭ كوپ قىرلى سيپاتىن راستايمىز.ەكىنشىدەن, ءبىزدىڭ تاڭداۋىمىزدا قاۋىپسىزدىك تە ماڭىزدى ءرول اتقاردى. بۇل جاعدايدا تاۋەلسىز مەملەكەتتىڭ استاناسى سىرتقى شەكارادان قاشىق, مۇمكىندىگىنشە ەلدىڭ ورتالىعىندا بولۋى قاجەت.سونىمەن قاتار, بىرقاتار ساراپشىلاردىڭ سول ۋاقىتتا ورتا ازيا ايماعىنداعى شيەلەنىس كۇشەيە تۇسەدى دەگەن جورامالىن دا ەسكەرۋ قاجەت بولدى.وسىعان بايلانىستى, مەملەكەتتىك جوعارعى ورگاندار قىزمەتىنىڭ قاۋىپسىزدىگىن, ايماقتاعى جاعداي كۇردەلەنە تۇسكەن جاعدايدا ولاردىڭ قىزمەتىنىڭ تيىمدىلىگىن قامتاماسىز ەتۋ ماڭىزدى بولدى.
كەيىن وسى ايماقتاعى وقيعالار كورسەتكەندەي, ءبىزدىڭ كۇدىگىمىز نەگىزسىز بولماي شىقتى.ۇشىنشىدەن, استانانى كوشىرۋ قازاقستان ەكونوميكاسىن ودان ءارى دامىتۋ بارىسىندا ءتيىمدى بولاتىن ەدى.وسىنىڭ ارقاسىندا, رەسپۋبليكا تەرريتورياسىندا حالىقتى جانە وندىرىستىك كۇشتى بىرجاقتى جايعاستىرۋدى بىرتىندەپ جەڭۋ, ورتالىق جانە سولتۇستىك ايماقتاردا يننوۆاتسيالىق جانە عىلىمي وندىرىستەردى, پروگرەسسيۆتى اۋىل شارۋاشىلىعى ماشينالارىن جاساۋدى جانە قايتا وڭدەۋ مەن اۋىلشارۋاشىلىق يندۋسترياسىنىڭ كەڭ جەلىسىن تۇراقتى دامىتۋ مۇمكىن بولادى. بۇل ءوز كەزەگىندە قازاقستاننىڭ ونەركاسىپتىك دامۋىن ارتتىرادى, ەڭبەك رەسۋرستارىن ءتيىمدى پايدالانۋدى جانە حالىقتى جۇمىسپەن قامتۋدى قامتاماسىز ەتەدى.
تورتىنشىدەن, بۇل قادام ەلدەگى تۇراقتىلىق پەن ۇلتارالىق تاتۋلىقتىڭ نىعايۋى جاعىنان وتە ءتيىمدى. استانانى حالىق قۇرامى بويىنشا كوپ ۇلتتى ايماققا اۋىستىرۋ پوليەتنيكالىق مەملەكەتتى قۇرۋدا, قازاقستاندا تۇراتىن بارلىق ەتنيكالىق توپتار اراسىنداعى دوستاستىق پەن تۇسىنىستىكتى ساقتاۋعا جانە ونى ارتتىرۋعا وڭ اسەر ەتەتىن ەدى.مەن پارلامەنت مىنبەسىنەن دەپۋتاتتاردى ۋاقىت وتە كەلە قازاقستاننىڭ جاڭا استاناسى قوعامدىق-ساياسي جانە ءىرى عىلىمي, مادەني جانە ىسكەرلىك ورتالىعى بولاتىندىعىنا سەندىردىم.استانانى اۋىستىرۋ الماتى ءۇشىن دە ءتيىمدى بولادى. وسى قادام ارقىلى ءبىز قالاعا قايتا تۋىلۋ مۇمكىندىگىن بەرگەندەي بولامىز.
بوساتىلاتىن الاڭداردى يندۋستريانى, ءتۋريزمدى, دەمالىس پەن سپورتتى دامىتۋ ءۇشىن كەڭىنەن پايدالانۋعا بولادى. بۇل قالا شارۋاشىلىعىنىڭ ەڭ پايدالى سالالارى ءۇشىن ءتيىمدى. سونىمەن قاتار, ۇلكەن مەگاپوليستەن ۇلكەن اۋىرتپالىقتار الىناتىن بولادى, ەكولوگياسى جاقسارادى.
الماتى مەملەكەتتىڭ جانە بارشا ايماقتىڭ ەكونوميكالىق جانە قوعامدىق-ساياسي ومىرىنە اسەر ەتەتىن, قازاقستاننىڭ, بۇكىل ورتا ازيانىڭ ءىرى ىسكەرلىك, قارجى, عىلىمي جانە مادەني ورتالىعى بولىپ قالا بەرەدى. ويتكەنى الماتى كوپتەگەن رەسپۋبليكالىق جانە حالىقارالىق كوممۋنيكاتسيانىڭ توعىسۋ ورتالىعى بولىپ تابىلادى.
مەنىڭ سوزدەرىم بويىنشا قىزۋ پىكىرتالاستار بولدى, ولار كۇن بويىنا سوزىلدى. رەسپۋبليكانىڭ جوعارعى كەڭەسى مەنىڭ وپپونەنتتەرىمنىڭ قارسىلىعىنا قاراماستان كوپشىلىك داۋىسپەن شەشىم قابىلدادى: قازاقستان استاناسى اقمولاعا كوشىرىلەدى. وسى شەشىمدى قابىلداۋ ءۇش جىلدان اسا ۋاقىتقا سوزىلعان استانانى كوشىرۋ پروتسەسىندە اياقتالعان نۇكتە بولدى.ءبىزدىڭ حح عاسىردىڭ اياعىندا وسىنداي تاريحي شەشىم قابىلداۋىمىزدىڭ, ەلدىڭ جەكە مۇددەسىنەن شىعا وتىرىپ, ۇلكەن ساياسي جانە سالتتىق ماعىناسى بار. ول ەركىن جانە تاۋەلسىز بولعان ەگەمەن ەل حالقىنىڭ ەركىندىك بەينەسى بولدى.قالالاردا دا ادامدار سەكىلدى ءوز تاعدىرى بار. ولاردىڭ ارقايسىسىندا – ءوزىنىڭ اتى مەن قايتالانباس ءومىربايانى, ونى دۇنيەدەگى باسقا ەشقانداي قالامەن شاتاستىرمايتىن وزىندىك ەرەكشە سيپاتى مەن بەلگىلەرى بار.
ءبىزدىڭ استانا – بۇل ءبىزدىڭ ستراتەگيالىق ويلارىمىز بەن نيەتتەرىمىزدىڭ كۆينتەسسەنتسياسى».ءوز تاريحىندا بۇگىن ءبىز تۇراتىن قالانىڭ اتاۋى بىرنەشە رەت وزگەردى: 1830-1832 جىلدارى – اقمولا; 1832-1961 جىلدارى – اكمولينسك; 1961-1992 جىلدارى – تسەلينوگراد; 1992-1998 جىلدارى – اقمولا, ال 1998 جىلدان باستاپ – استانا.قالانىڭ جاڭا اتاۋى بىرنەشە نەگىزدەمەلەرگە بايلانىستى قاجەت بولدى: «استانا» ءسوزىنىڭ ايقىن ماعىناسى بار. قالا اتاۋى جاعىمدى ەستىلەدى جانە مەملەكەتتىك تىلدە دە, نەگىزگى حالىقارالىق تىلدەردە دە ماعىناسىن ەش وزگەرتپەيدى. اقىر سوڭىندا, ونىڭ ءوزى – قالا سيمۆولى.
قازىر ءبىزدىڭ استانامىز – اسەم ءارى بىرەگەي. وڭتۇستىك پەن سولتۇستىكتى, شىعىس پەن باتىستى بىرىكتىرەتىن جولدار توعىسىنداعى استانا ەۋرازيا جۇرەگى بولدى. ول ۋاقىت وتكەن سايىن تاڭ قالارلىقتاي وزگەرىپ وتىرادى. مۇندا دۇنيە ءجۇزىنىڭ ۇزدىك ارحيتەكتورلارى وراسان زور جوبالارىن استانانىڭ قايتالانباس بەينەسىن جاساۋدا وزدەرىنىڭ كەرەمەت وي-جوسپارلارىن جۇزەگە اسىرۋدا.
استانانى اۋىستىرۋ تۋرالى تۇبەگەيلى شەشىم قابىلدانار كەزدە ونىڭ قانشالىقتى مويىندالعاندىعىن انىقتاۋ قيىن ەكەندىگىن دۇنيەجۇزىلىك تاجىريبە كورسەتىپ وتىر. ءبىراز ۋاقىت وتكەننەن كەيىن عانا وسى قادامنىڭ دۇرىس-بۇرىستىعى انىقتالادى. كورول ەكىنشى فيليپپ ءوزىنىڭ اكىمشىلىك اپپاراتىن مادريدكە مامىراجاي جىلدارى جاي اۋىستىرعان جوق. ول بۋرگاس, ۆاليادوليد جانە دون كيحوتتاردىڭ وتانى تولەدو سەكىلدى استانالىق قالالارىن تاستاپ, مەملەكەت ورتالىعىن كوشىردى. ءۇندىستان ءوز استاناسىن كالكۋتتادان نيۋ-دەليگە كوشىردى. 1923 جىلى تۇركيا استاناسىن ستامبۋلدان – انكاراعا, پاكىستان 1971 جىلى التى ميلليون حالقى بار قالا كاراچيدەن تۇرعىنى جەتى ءجۇز مىڭ يسلامابادقا اۋىستىردى. قىتاي ءوز استاناسىن التى رەت وزگەرتتى. سونىمەن قاتار, ءالى بىردە-ءبىر مەملەكەت ءوزىنىڭ استاناسىن اۋىستىرعاننان كەيىن بۇرىنعى استاناسىنا قايتا ورالعان ەمەس. ءبىر عانا ەرەكشە جاعداي – ەكى عاسىردان كەيىن رەسەي استاناسىنىڭ پەتەربۋرگتەن ماسكەۋگە اۋىسۋى.
1998 جىلدىڭ قاڭتار ايىندا ازيا, افريكا جانە ەۋروپانىڭ جەتەكشى ارحيتەكتورلارى استانا باس جوسپارىنىڭ جوباسىن تالقىلاۋ ءۇشىن جينالدى. ولار استانانىڭ تەرريتوريالىق دامۋىنىڭ قۇرىلىستىق تۇجىرىمداماسىن قاراپ, وزدەرىنىڭ ەسكەرتۋلەرىن ايتتى. استانانىڭ ەڭ ۇزدىك باس قۇرىلىسى بايقاۋىندا, ءوز ۋاقىتىندا مالايزيا مەن لاتىن امەريكاسىندا بىرقاتار جوبالاردى جۇزەگە اسىرعان تانىمال جاپون ساۋلەتشىسى كيسە كۋروكاۆا جەڭىپ شىقتى.
استانا! جاڭا اتاۋ بىرنەشە سەبەپتەر بويىنشا قولايلى. بىرىنشىدەن, ونىڭ ءبىر ماعىنالى تۇسىنىگى جانە ناقتى بەلگىلەنگەن ءمانى بار. ەكىنشىدەن, ول قانداي دا ءبىر كەلەڭسىز ساياسي جانە تاريحي تالداۋعا ۇشىراعان جوق. ۇشىنشىدەن, ول قالا سيپاتىن جاقسى بەينەلەيدى. تورتىنشىدەن, قالانىڭ جاڭا اتاۋى جاقسى ەستىلەدى جانە مەملەكەتتىك تىلدە دە, نەگىزگى حالىقارالىق تىلدەردە دە ماعىناسىن ەش وزگەرتپەيدى. ول 1998 جىلدىڭ 10 ماۋسىمىندا استانانىڭ تۇساۋكەسەرى بارىسىندا قالا سيمۆولى بولدى جانە استانالاردىڭ دۇنيەجۇزىلىك تىزىمىنە ەنگىزىلدى.
1998 جىلدىڭ 9 ماۋسىمىندا تۇركى تىلدەس ەلدەر باسشىلارىنىڭ بەسىنشى ءسامميتى استانادا جوعارعى دەڭگەيدە ءوتتى. وعان ازەربايجان پرەزيدەنتى گ.اليەۆ, قازاقستان پرەزيدەنتى ن.نازارباەۆ, قىرعىزستان پرەزيدەنتى ا.اقاەۆ, تۇركيادان س.دەميرەل, وزبەكستاننان ي.كاريموۆ جانە باسقالارى قاتىستى.ال 1998 جىلدىڭ 10 ماۋسىم كۇنى تاۋەلسىز قازاقستان رەسپۋبليكاسىنىڭ ەلورداسى رەتىندە استانا قالاسىنىڭ حالىقارالىق تۇساۋكەسەرى دۇركىرەپ ءوتتى. مەن سونىڭ جۋان ورتاسىندا بولعان, ءتىرى كۋاگەرلەردىڭ ءبىرىمىن.
دۋمان-توي باعدارلاماسىنا سايكەس ورتالىق ستاديوندا تەاترلاندىرىلعان كورىنىستەر, قالانىڭ نەگىزگى الاڭىندا قازاقستاندىق جانە شەتەل ەسترادا شەبەرلەرىنىڭ كونتسەرتى, حالىقتىڭ مەرەكەلىك شەرۋى بولدى. استانانىڭ تۇساۋكەسەرىنە كەلگەن ەلباسىلار مەملەكەت باسشىلارى اللەياسىنىڭ ءبىرىنشى تالدارىن وتىرعىزدى. پرەزيدەنتىمىز بولاشاق وتان قورعاۋشىلار مونۋمەنتىنىڭ تاسىن قالادى. ال تۇندە تۇساۋكەسەر تويىنىڭ شارىقتاۋ تۇسىندا نۇرسۇلتان نازارباەۆ عارىشكەر تالعات مۇساباەۆپەن سويلەسىپ, عارىشتا ۇشىپ جۇرگەن وعان بىلاي دەدى: «سەن ءبىر تابان جاقىن ءجۇرسىڭ عوي. اللا تاعالادان ءبىزدىڭ جاس ەلوردامىز – استانا قالاسى مەن تۋعان حالقىمىزعا ساتتىلىك تىلە. جاراتۋشى يەمىز بىزگە وڭ باتاسىن بەرسىن» دەپ تىلەك ايتتى. سول ساتتە بۇكىل الەم, بارلىق قازاقستاندىقتار قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆ پەن عارىشكەر تالعات مۇساباەۆتىڭ دۋەتپەن ايتقان ءانىن ەستىدى. ول ءبىر مەزگىلدە بۇكىل جەر شارىندا جانە عارىش كەڭىستىگىندە ايتىلعان جەڭىس ولەڭى بولدى. ايتا كەتەيىن, ءدال وسىنداي كەرەمەت وقيعا بۇرىن-سوڭدى ەش جەردە ەشقاشان بولعان ەمەس. ءيا, سول كۇنى بارشامىز ۇمىتىلمايتىن, ەستەن كەتپەيتىن تاريحي وقيعاعا كۋا بولىپ, الەمنىڭ تۇكپىر-تۇكپىرىنەن كەلگەن قوناقتارمەن بىرگە قۋانىش سەزىمىنە بولەندىك, ناعىز ادامي باقىتقا كەنەلدىك.
ءدال بۇگىن ءبىزدىڭ استانا قالاسىنىڭ داڭعىلدارى, كوشەلەرى, اسەم عيماراتتارى, كەشەندەرى, تۇرعىن ۇيلەرى, دەمالىس ورىندارى, ارحيتەكتۋراسى تاڭعاجايىپ كۇيگە بولەنگەن. قاراي بەرگىڭ كەلەدى. ءيا, قازاقتىڭ كەڭ دالاسى سارىارقانىڭ تورىندەگى اسەم قالا – استانامىز گۇلدەنىپ, قۇلپىرىپ تۇر. استانانى كورگەن سايىن كوڭىلىمدى قۋانىش, جۇرەگىمدى ماقتانىش سەزىمى كەرنەيدى. مەن, قازاقتىڭ قاراپايىم ازاماتى, استانامەن بۇكىل الەمگە ماقتانامىن. مەن جاڭا ەلوردامىز – استانا قالاسىنا قىزمەت ىستەۋدەن استە شارشامايمىن, جالىقپايمىن. قولىمنان كەلگەن ءىس-شارالاردى جۇزەگە اسىرا بەرەمىن. شىعارماشىلىعىممەن قاتار, ءوزىم ۇيىمداستىرىپ سالعان, اتى اڭىزعا اينالعان تۇلپار «قۇلاگەر» ەسكەرتكىشىنىڭ قاسىنان, ۇلت مادەنيەتىنىڭ شىنايى جاناشىرى مارات نابيەۆ دوسىم ەكەۋمىز «ۇلى دالا داڭقى» مۇراجايىن سالۋدى قولعا الدىق. ماڭىزى زور بۇل جوبانى ءبىز ەلباسىمىز نۇرسۇلتان نازارباەۆ سالعان استانا قالاسىنىڭ 20 جىلدىعىنا جانە «استانا ەكسپو-2017» حالىقارالىق كورمەسىنە ارنايمىز.
وسە بەر, ورلەي بەر, استانا!
سادىبەك تۇگەل,
قر ەڭبەك سىڭىرگەن قايراتكەرى, استانا قالاسى اكىمىنىڭ تۇڭعىش ءباسپاسوز حاتشىسى
