بيىل – وسى اقمولا ءوڭىرىنىڭ تۋماسى, ۇلى وتان سوعىسىنىڭ قاھارمانى, «داڭق» وردەنىنىڭ تولىق يەگەرى المۇقان سەمبينوۆتىڭ تۋعانىنا 100 جىل. وسىعان بايلانىستى ەلوردانىڭ ارداگەرلەر كەڭەسى توراعاسىنىڭ ورىنباسارى مۇرات ىرگەباەۆ استانا قالالىق مەملەكەتتىك ءارحيۆىنىڭ باسشىسى جانگەلدى بيمولدينمەن كەزدەسىپ, باتىردىڭ عاسىرلىق مەرەيتويىنا ارنالعان ءىس-شارانى وتكىزۋ بارىسىن تالقىلادى. ەلوردا ارحيۆىندەگى مايدانگەرگە قاتىستى قۇجاتتار تانىستىرىلدى.
المۇقان سەمبينوۆ 1924 جىلدىڭ 21 ساۋىرىندە اقمولا وبلىسى جاڭابىرلىك اۋىلىندا تۋعان. 1942 جىلدىڭ اقپانىندا قىزىل اسكەر قاتارىنا شاقىرىلىپ, 1210-اتقىشتار پولكىنىڭ بارلاۋشىلار ۆزۆودىنا قوسىلىپ, سوعىستىڭ سوڭىنا دەيىن العى شەپتە سوعىسقان. 1-ءىنشى جانە 3-بەلارۋس مايدانىندا قاتارداعى جاۋىنگەردەن بارلاۋشىلار ۆزۆودىنىڭ كومانديرىنە دەيىن ءوستى. 1944 جىلدىڭ جازىندا بەلارۋس جەرىندە دنەپر وزەنىنەن العاشقىلاردىڭ ءبىرى بولىپ ءوتىپ, بىحوۆ قالاسىن ازات ەتۋ ءۇشىن بولعان شايقاستا ەرەن ەرلىگىمەن كوزگە ءتۇسىپ, ءىىى دارەجەلى «داڭق» وردەنىمەن, سوڭىنان «قىزىل جۇلدىز» وردەنىمەن ماراپاتتالدى. 1944 جىلدىڭ جازىندا كۋليش ەلدى مەكەنى ماڭىندا بولعان ۇرىستا ەرلىك كورسەتكەنى ءۇشىن ءىى دارەجەلى «داڭق» وردەنىن يەلەندى. ال سوعىستىڭ اياقتالۋىنا از كۇن قالعاندا, 1945 جىلدىڭ 17 ساۋىرىندە ودراداعى فرانكفۋرت قالاسىنان وڭتۇستىك-باتىسقا قاراي ورنالاسقان ميۋللروزە ەلدى مەكەنىندەگى شايقاستا المۇقان سەمبينوۆ 9 ءفاشيستتى تۇتقىنعا الدى. ءوزى جارالانسا دا, بولىمشەگە باسشىلىق ەتۋدى توقتاتقان جوق. 22 ساۋىردە, 26 ساۋىردەگى ۇرىستاردا دا سەمبينوۆ ەرلىكپەن كورىندى. 1945 جىلدىڭ 15 مامىرىنداعى كسرو جوعارعى كەڭەسى القاسى جارلىعىمەن سەمبينوۆ ءى دارەجەلى «داڭق» وردەنىمەن ماراپاتتالىپ, وسى وردەننىڭ تولىق يەگەرى اتاندى.
سوعىستى المۇقان سەمبينوۆ ەلبا وزەنىندەگى رۋدولشتادت قالاسىندا اياقتادى. 1945 جىلدىڭ جەلتوقسانىندا اسكەردەن بوساپ, اقمولا قالاسىنا ورالدى. قالالىق پارتيا كوميتەتىنىڭ نۇسقاۋشىسى, قالالىق كومسومول كوميتەتىنىڭ ءبىرىنشى حاتشىسى بولىپ جۇمىس ىستەدى. قازىرگى «استانالىق» ساياباقتا بولعان بالالار تەمىرجولى كەزىندە سەمبينوۆتىڭ باستاماسىمەن سالىندى.
جوعارى پارتيا مەكتەبىن, 1951 جىلى اباي اتىنداعى الماتى پەداگوگيكا ينستيتۋتىن ءبىتىردى. تاريحشى ماماندىعىن الىپ شىعىپ, سول جىلدارى تسەلينوگرادتا جاڭا اشىلعان قۇرىلىس تەحنيكۋمىنىڭ ەڭ العاشقى ديرەكتورى بولدى. اقمولا-پاۆلودار تەمىرجولى قۇرىلىسى ساياسي ءبولىم جەتەكشىسىنىڭ ورىنباسارى, ال ءومىرىنىڭ سوڭعى جىلدارى كولىك جولدارى مينيسترلىگىنىڭ وقۋ كومبيناتىن باسقاردى. باتىر نەبارى 48 جاسىندا, 1972 جىلدىڭ 10 اقپانىندا ومىردەن وزدى. بۇگىندە استانا قالاسىندا ونىڭ اتىمەن اتالاتىن كوشە بار
