سوڭعى مالىمەتتەر بويىنشا, ەلىمىزدە سۋ تاسقىنىنا بايلانىستى قازاقستاننىڭ 10 وبلىسىندا توتەنشە جاعداي رەجيمى جاريالاندى. قازىر اقتوبە, اتىراۋ, پاۆلودار, اقمولا, قوستاناي جانە سولتۇستىك قازاقستان وبلىستارىندا 3702 ءۇي سۋ استىندا قالدى. ەل بويىنشا سۋ تاسقىنى باستالعاننان بەرى 72 مىڭنان استام ادام قۇتقارىلىپ, قاۋىپسىز جەرگە كوشىرىلدى, ونىڭ 17 مىڭعا جۋىعى – بالالار. قازىرگى ۋاقىتتا ۋاقىتشا ورنالاستىرۋ ورتالىقتارىندا 14 460 ادام بولسا, ونىڭ 7 269-ى – بالالار.
سۋ تاسقىنىنان زارداپ شەككەن ايماقتارداعى ادامداردىڭ قاۋىپسىزدىگىن قامتاماسىز ەتۋ, ولاردىڭ كەرەك-جاراعىن شەشۋ باعىتىندا اۋقىمدى جۇمىس اتقارىلىپ جاتىر. توسىننان كەلگەن الاپات اپاتقا بارشا ەلوردالىقتار ءۇن قوسۋدا. بۇگىنگى كۇندە ەلوردادا 9 گۋمانيتارلىق كومەك قابىلداۋ پۋنكتى بار, جيناۋعا 30-عا جۋىق ەرىكتى ۇيىم اتسالىسىپ جاتىر. كۇن سايىن 200-دەن استام ەرىكتى قاجەتتى زاتتاردى سۇرىپتاپ, جونەلتەدى. نيەت بىلدىرۋشىلەر جىلى كيىم-كەشەك, ازىق-تۇلىك, ءدارى-دارمەك, العاشقى قاجەتتىلىك زاتتارىن اكەلىپ جاتىر. سونىمەن قاتار ۇكىمەتتىك ەمەس ۇيىمدار وكىلدەرىنىڭ مالىمەتىنشە, بىرنەشە كۇن ىشىندە 7 تونناعا جۋىق العاشقى قاجەتتى تۇرمىستىق زاتتار جينالىپ, جۇك كولىگى اقتوبە قالاسىنا اتتاندى. گۋمانيتارلىق كومەك جيناۋ جۇمىسىنا ماقسۇت نارىكباەۆ ۋنيۆەرسيتەتى, ل.ن.گۋميلەۆ اتىنداعى ەۇۋ, نازارباەۆ ۋنيۆەرسيتەتى, ESIL ۋنيۆەرسيتەتى سىندى ەلوردانىڭ جوعارى وقۋ ورىندارى دا قوسىلدى. كومەك كورسەتكەن وزگە ۇيىمداردىڭ قاتارىندا The one قوناقۇيى, «اسەم», «راحمەت», «شاپاعات» ساۋدا ۇيلەرى جانە باسقا دا بيزنەس قۇرىلىمدارىنىڭ وكىلدەرى دە بار.
استانالىق قازاقستان حالقى اسسامبلەياسى دا «جۇرەكتەن جۇرەككە» قايىرىمدىلىق اكتسياسىن وتكىزدى. «قوعامدىق كەلىسىم» قوعامدىق ۇيىمى ەتنومادەني بىرلەستىكتەرمەن, كاسىپكەرلەرمەن, قحا جاستار قاناتىنىڭ ۆولونتەرلەرىمەن جانە ونىڭ بەلسەندىلەرىمەن بىرلەسىپ, اقمولا جانە قاراعاندى وبلىستارىنىڭ تۇرعىندارىنا گۋمانيتارلىق كومەك جونەلتتى. قحا جانىنان قۇرىلعان, مەتسەنات حاسان ءشارىپوۆ توراعالىق ەتەتىن قالالىق شتاب گۋمانيتارلىق كومەكتى جيناۋ, جۇكتەردى قابىلداۋ جانە ءتۇسىرۋ جۇمىستارىن ۇيلەستىردى.
– تابيعي سۋ تاسقىنىنان زارداپ شەككەندەرگە قازاقستان حالقى اسسامبلەياسى مەن ەتنومادەني ورتالىقتار اتىنان قولداۋ كورسەتەمىز. وڭىرلەردە توتەنشە جاعداي جاريالانا سالىسىمەن گۋمانيتارلىق كومەك جينادىق» دەدى حاسان ءشارىپوۆ.
بۇگىنگى تاڭدا اسسامبلەيا مۇشەلەرى مەن ەرىكتىلەر جالپى سوماسى 5 ميلليون 200 مىڭ تەڭگەگە كومەك كورسەتتى. دوستىق ءۇيى الاڭىنان 3 جۇك كولىگى قاجەتتى تاۋارلار, ونىڭ ىشىندە 1,5 توننا ۇن جونەلتىلدى.
سونداي-اق بۇل ماڭىزدى ىسكە جالپى قۇنى 100 000 تەڭگەنىڭ ازىق-تۇلىك ونىمدەرىن جەتكىزگەن «استانا» بالالار فۋتبول كلۋبىنىڭ مۇشەلەرى بالالار دا ءوز ۇلەستەرىن قوستى.
«امانات» پارتياسىنىڭ استانا قالالىق فيليالى «جاستار رۋحى» جاستار قاناتىمەن, «استانا جاستارى» قب ەرىكتىلەرىمەن, قالالىق ءماسليحات دەپۋتاتتارىمەن, قوعام قايراتكەرلەرىمەن, ۇكىمەتتىك ەمەس ۇيىمداردىڭ وكىلدەرىمەن, شاعىن, ورتا جانە ءىرى كاسىپورىندار زارداپ شەككەندەرگە 250 تونناعا جۋىق گۋمانيتارلىق كومەك جينادى. قوستاناي وبلىسىندا قازاقستان جاستار كونگرەسىنىڭ ۆولونتەرلەرى ەرىكتىلەردىڭ جۇمىسىن ۇيلەستىرىپ, استانادان گۋمانيتارلىق كومەكتىڭ جەتكىزىلۋىن قامتاماسىز ەتۋدە.
قازاقستان مۇسىلماندارى ءدىني باسقارماسى «زەكەت جانە قايىرىمدىلىق» قورى وكىلدەرى سۋ تاسقىنىنان زارداپ شەككەن اقتوبە وبلىسىنا بارىپ, سۋ باسقان ايماق تۇرعىندارىنا 500 دانا رەزەڭكە ەتىك, 2500 دانا قاپ, 2000 دانا جورگەك, 2000 دانا كورپە-توسەك, 2 قايىق, قايىققا 3 قوزعالتقىش, جارىق قۇرىلعىسىنا 2 قوزعالتقىش ت.ب. تۇرمىستىق زاتتاردى جەتكىزدى. سونداي-اق اقتوبە قالاسىندا 1000, ويىل اۋدانىندا 300, قوبدا اۋدانىندا 200 ادامعا ىستىق تاماق بەرىلدى.
ەرلان داكەنوۆ,
ەركەعالي راحماديەۆ اتىنداعى مەملەكەتتىك اكادەميالىق فيلارمونياسىنىڭ ديرەكتورى, استانا قالاسى ءماسليحاتىنىڭ دەپۋتاتى:
«جاعداي وتە قيىن بولسا دا, ءبىز قيىندىقتى مىندەتتى تۇردە ەڭسەرەمىز» دەدى مەملەكەت باسشىسى بۇگىنگى ۇندەۋىندە. قازاقستان حالقى 80 جىلدان بەرگى ەڭ ءىرى تابيعي اپاتقا بەتپە-بەت كەلىپ وتىر. قانداي قيىن-قىستاۋ كەزەڭ بولسا دا, ۇنەمى ءبىر تۋدىڭ استىنا جينالاتىن ەلىمىز, بۇل جولى دا بۇرا تارتپاي, ءبىر جۇدىرىقتاي جۇمىلاتىنى انىق. ەل تىزگىنىن ۇستاعان تۇلعالار, توتەنشە جاعدايلار مينيسترلىگى, ىشكى ىستەر مينيسترلىگى, ۇلتتىق ۇلان, قارۋلى كۇشتەر جانە ۇلتتىق قاۋىپسىزدىك كوميتەتىنىڭ ماماندارى جاعدايدى رەتتەۋگە اتسالىسۋدا. ورىن العان سۋ تاسقىنى پرەزيدەنتتىڭ ەرەكشە باقىلاۋىندا ەكەنىن دە ۇمىتپاعان ابزال. «جۇمىلا كوتەرگەن جۇك جەڭىل». گۇل دە قار استىندا ماڭگى جاتپايدى. سىن ساعاتتا سابىر ساقتاپ, اللادان جاردەم تىلەيمىز! جاراتقان حالقىمىزعا جار بولسىن!».
