ەلوردادا قازاقستان مۇسىلماندارى ءدىني باسقارماسى ايەل-قىزدار سەكتورىنىڭ ۇيىمداستىرۋىمەن مۇسىلمان ايەلدەرىنىڭ ءىى رەسپۋبليكالىق «اسەم كيىم – ايەل اجارى» ءساندى كيىم بايقاۋى ءوتتى. ءىس-شارانىڭ ماقساتى – ايەل-قىزدارعا شاريعات پەن داستۇرىمىزگە ساي, قازىرگى زامان تالابىنا وراي ورامال مەن مۇسىلمانشا كيىم ۇلگىلەرىن ناسيحاتتاۋ بولدى.
– اسىل ءدىنىمىز يسلامدا ايەلگە ايرىقشا مارتەبە بەرىلگەن. يماندىلىق, ىزەتتىلىك, قايىرىمدىلىق, جاناشىرلىق جولىن ۇستانعان حالقىمىز قىز-كەلىنشەكتى قۇرمەتتەۋدىڭ ۇلگىسىن كورسەتكەن. قىزدى قۇرمەتتەۋگە كەلگەندە ونى ءتىپتى تورگە شىعارعان, ال تاربيەسىنە كەلگەندە قىزدى قىرىق ۇيدەن تىيعان. وسى تىيىمنىڭ ءبارى ايەلدىڭ يمانى مەن قۇرمەتىن, ارى مەن ۇياتىن قورعايدى. راسىندا, قازاق حالقىندا: «ايەل – ءبىر قولىمەن بەسىكتى تەربەتسە, ەكىنشى قولىمەن الەمدى تەربەتەدى» دەگەن ناقىل ءسوز بار. مۇنىڭ ماعىناسى وتە تەرەڭ. ويتكەنى كەز كەلگەن ادامنىڭ اناسى – ونىڭ العاشقى مەدرەسەسى. ادام بالاسى العاشقى تاربيەنى اناسىنان العاندىقتان, بۇل رەتتە سىزدەرگە جۇكتەلەر مىندەت اسا ۇلكەن. اللا جار بولسىن, – دەدى بايقاۋعا قاتىسقان قازاقستان مۇسىلماندارى ءدىني باسقارماسىنىڭ توراعاسى, باس ءمۇفتي ناۋرىزباي قاجى تاعانۇلى.
بايقاۋدا وبلىس-وڭىردەن كەلگەن جيىرماعا جۋىق ديزاينەردىڭ 200-دەن استام مۇسىلمانشا كيىم ۇلگىلەرى كورسەتىلدى. بايقاۋ سوڭىندا جەڭىمپازدار ارنايى سىيلىقتارمەن ماراپاتتالدى.
