استانا قالاسى مەملەكەتتىك ءارحيۆىنىڭ ۇيىمداستىرۋمەن قالا اكىمدىگىنىڭ «ناز» مەملەكەتتىك بي تەاترىنىڭ نەگىزىن قالاۋشىلار, قازاقستاننىڭ مادەنيەت قايراتكەرى ەركەبۇلان اعىمباەۆ پەن تەاتردىڭ كوركەمدىك جەتەكشىسى – باس بالەتمەيستەرى, قازاقستاننىڭ ەڭبەك سىڭىرگەن قايراتكەرى قاديشا اعىمباەۆانىڭ وتباسىلىق ارحيۆ قورىن تاپسىرۋ ءىس-شاراسى ءوتتى.
استانا قالاسى مەملەكەتتىك ءارحيۆى ديرەكتورى بەرىك تورەبەكوۆ بۇل ءىستىڭ كەلەشەك ۇرپاققا ءمانى زور ەكەنىن, استانا قالاسىنىڭ مەملەكەتتىك ءارحيۆى قورلارى ءۇشىن اسا قۇندى دەرەككوزى بولىپ ەسەپتەلەتىنىن اتاپ ءوتتى.
– سارىارقا توسىنە ەلوردانىڭ كوشۋىنە بارلىق سالا ماماندارى اتسالىستى. ونەر ادامدارى دا سىرت قالعان جوق. ەركەبۇلان, قاديشا اعىمباەۆتار – استانانىڭ مادەنيەتىن كوتەرۋگە, ونىڭ ىشىندە حورەوگرافيا سالاسىن دامىتۋعا بىلەك سىبانا كىرىسكەن ازاماتتار. تىڭنان تۇرەن سالىپ, جاڭا باعىت, ۇلكەن ىزدەنىستەرگە باردى. «ناز» بي تەاترى – تەك ەل ىشىندە عانا ەمەس, دۇنيەجۇزىن ارالاپ, بىرنەشە مەملەكەتكە گاسترولدىك ساپارمەن بارىپ, قازاقتىڭ ۇلتتىق بي ونەرىن پاش ەتكەن كاسىبي ۇجىم. 1998 جىلى ىرگەتاسى قالانعان تەاتردا بۇگىندە تەاترمەن قۇرداس ونەرلى جاستار ەڭبەك ەتۋدە. شيرەك عاسىر بويى بۇل ۇجىم بيىك بەلەستەردى باعىندىرىپ كەلەدى. كەلەشەكتە عالىمدار بي ونەرىن زەرتتەگەندە, «ناز» تەاترى تۋرالى عىلىمي جۇمىستار جازعاندا, مۇراعاتتان تاۋىپ الارى ءسوزسىز, – دەدى پەداگوگيكا عىلىمدارىنىڭ دوكتورى, پروفەسسور, قازاقستاننىڭ ەڭبەگى سىڭگەن قايراتكەرى تىلەۋعالي قىشقاشباي.
ءىس-شارادا ەركەبۇلان اعىمباەۆ «ناز» تەاترىنىڭ قۇرىلۋ تاريحىن ەسكە الدى. ال قاديشا اعىمباەۆا تەاتر رەپەرتۋارىندا بي قويىلىمدارىنان بولەك, بىرنەشە حورەوگرافيالىق سپەكتاكل بارىن ايتا كەلە, رەسپۋبليكامىزدا قانشاما بي ۇجىمى بولسا دا, «نازدىڭ» وزىندىك قولتاڭباسى قالىپتاسقانىن, وسى كۇنگە دەيىن تەاتردا بيلەگەن بيشىلەر سانى 200-دەن اسقانىن, سونىڭ ىشىندە ءوز مەكتەپتەرىن اشقاندار بار ەكەنىن ايتتى. «ناز» مەمەلكەتتىك بي تەاترىنىڭ ءارحيۆيسى, ارحيۆ سالاسىنىڭ ۇزدىگى زايرا حابدۋللينا ارحيۆكە تاپسىرىلعان ماتەريالدار «اعىمباەۆتاردىڭ وتباسىلىق قورى» دەپ اتالعانمەن, تۇتاستاي «ناز» مەمەلەكەتىك بي تەاترى تاريحى مەن ونەرى تۋرالى سىر شەرتەتىنىن اتاپ ءوتتى. استانا قالاسى مەملەكەتتىك ءارحيۆى عىلىمي-زەرتتەۋ جانە اقپاراتتىق جۇمىسى قىزمەتىنىڭ باسشىسى عازيزا يساحان استانا قالاسىنىڭ قۇرىلۋ تاريحى باس قالانىڭ ونەر ۇجىمدارى تاريحىمەن اجىراعىسىز ەكەنىن ايتىپ, ەركەبۇلان مەن قاديشا اعىمباەۆتاردىڭ قۇجاتتارى ارقىلى «ناز» مەملەكەتتىك تەاترىنىڭ تاريحىن دا بىلۋگە بولاتىنىن جەتكىزدى.
تولقىن سۇلتان
