جاھاندىق دەڭگەيدە مويىندالدى
استانا حالىقارالىق قارجى ورتالىعى (احقو) ءوز جۇمىسىن باستاعانىنا از ۋاقىت وتكەنىنە قاراماستان ەلىمىزدىڭ ينۆەستيتسيالىق دامۋىنا ەلەۋلى ۇلەس قوستى. ول بەدەلدى جاھاندىق قارجى ورتالىقتارىنىڭ يندەكسىندە (GFCI26) 104 نىساننىڭ ىشىنەن 51-ءشى ورىندى, شىعىس ەۋروپا مەن ورتالىق ازيانىڭ قارجى ورتالىقتارىنىڭ ىشىنەن ىستامبۇل, ۆارشاۆا, بۋداپەشت, ماسكەۋ, باكۋدەن وزىپ, 1-ءشى ورىندى يەلەندى. دەمەك, قازاقستاننىڭ باس قالاسى – نۇر-سۇلتان الەمنىڭ قارجى كارتاسىندا مويىندالعان, حالىقارالىق قارجى ورتالىعىنا اينالدى دەگەن ءسوز.
بيىل 25 قىركۇيەكتە احقو Asiamoney جۇلدەسىن الدى. الەمدىك دەڭگەيدەگى بەدەلدى Asiamoney باسىلىمىنىڭ ۇيعارىمى بويىنشا, احقو 2019 جىلى ورتالىق جانە شىعىس ەۋروپا, ورتالىق جانە باتىس ازيا ايماعىنداعى «بەلدەۋ جانە جول» باستاماسى اياسىندا «جىلدىڭ ۇزدىك جوباسى» اتالىمىندا ەڭ ۇزدىك دەپ تانىلدى.
نۇر-سۇلتاننىڭ كولىكتىك قولجەتىمدىلىگى ارتۋدا
كولىكتىك قولجەتىمدىلىك – بۇل كەز كەلگەن قارجى ورتالىعىنىڭ دامۋ دەڭگەيى مەن تابىستىلىعىنىڭ باستى كورسەتكىشتەرىنىڭ ءبىرى. ۇلت جوسپارىنىڭ 73-ءشى قادامىنا سايكەس, ەلىمىزدىڭ تۇڭعىش پرەزيدەنتى – ەلباسى نۇرسۇلتان نازارباەۆ قارجى ورتالىعىنىڭ كولىكتىك قولجەتىمدىلىگىن قامتاماسىز ەتۋگە تاپسىرما بەرگەنى ءمالىم. بۇگىنگى تاڭدا ۇكىمەتتىڭ قولداۋىمەن وسى جۇمىس جالعاسىن تابۋدا. ماسەلەن, بيىل ەلوردادان توكيو مەن پراگاعا اۋە رەيستەرى اشىلدى. الداعى ۋاقىتتا شانحاي, نيۋ-يورك, گونكونگ, سينگاپۋر جانە تسيۋريح سياقتى الەمدەگى اسا ءىرى قارجى ورتالىقتارىنا تىكەلەي رەيستەر اشۋ جوسپارلانعان.
300 كومپانيا تىركەلدى
قازىرگى كەزدە احقو-نىڭ قارجىلىق رەتتەگىشىنە الەمدەگى 30 ەلدەن (اقش, ۇلىبريتانيا, قىتاي, گونكونگ, سينگاپۋر, ءباا, رەسەي جانە ت.ب.) 300 كومپانيا تىركەلدى. 2020 جىلدىڭ سوڭىنا دەيىن ولاردىڭ سانى 500-گە ۇلعايادى. 2019 جىلدىڭ قاڭتار ايىنان باستاپ احقو ەكسپو-قالاشىقتىڭ س-3, س-4 پاۆيلوندارىنا ورنالاستى. احقو-نىڭ ورگاندارى مەن ۇيىمدارى س-3 پاۆيلونىنا تولىقتاي قونىستاندى. الداعى ۋاقىتتا قارجى ورتالىعىنىڭ قاتىسۋشىلارى مەن ارىپتەستەرى (ەققب, ەادب, قىتاي قۇرىلىس بانكى, سبەربانك جانە ت.ب.), قارجىلىق جانە تەحنولوگيالىق كومپانيالار س-4 پاۆيلونىن يگەرەدى. وسىلايشا, احقو, استانا حابى, حالىقارالىق جاسىل تەحنولوگيالار جانە ينۆەستيتسيالىق جوبالار ورتالىعىمەن سەرىكتەستىكتىڭ ناتيجەسىندە ەكسپو-قالاشىق قارجىلىق-تەحنولوگيالىق حابقا اينالدى. ول ءىرى ينۆەستورلارعا, قارجى ينستيتۋتتارىنا جانە تەحنولوگيالىق نىساندارعا بىرەگەي ەكوجۇيە قۇردى.
