نۇر-سۇلتان قالاسىنداعى «ءۇمىت» توموتەراپيا جانە يادرولىق مەديتسينا اۋرۋحاناسى كەشەنىندە ىسكە قوسىلعان «TomoTherapy» اپپاراتى – اقش-تا جاسالعان بىرەگەي قوندىرعى. الەمدە مۇنداي 180 عانا اپپارات بار. سونىڭ ءبىرى ورتالىق ازيا ەلدەرى اراسىندا تەك ءبىزدىڭ ەلوردامىزدا جۇمىس ىستەپ تۇر.
قازاقستاندا ءولىم-ءجىتىم سەبەپتەرىنىڭ جىكتەلۋ قۇرىلىمىندا ونكولوگيالىق ناۋقاستان قايتىس بولاتىندار سانى ەكىنشى ورىندا تۇر. جىل سايىن قاتەرلى ىسىك اۋرۋىنان 17 مىڭ ادام كوز جۇمادى, ولاردىڭ 40 پايىزى – ەڭبەككە قابىلەتتى جاستاعىلار. ءبىزدىڭ ەلىمىز ءۇشىن راك كەسەلىمەن كۇرەس – كوكەيتەستى ماسەلەلەردىڭ ءبىرى بولىپ تۇر.
ەلىمىزدە كەڭىنەن جۇرگىزىلىپ جاتقان ۇلتتىق سكرينينگتىك باعدارلاما قاتەرلى ىسىكتىڭ ەندى پايدا بولا باستاعان كەزىندە انىقتاۋعا مۇمكىندىك بەرەدى. بىراق ونكوناۋقاستاردى تولىقتاي ەمدەپ جازۋ 80%-عا دەيىن جوعارى تەحنولوگيالىق ەمدەۋ تاسىلدەرىن, ونىڭ ىشىندە توموتەراپيانى قولدانعان كەزدە عانا جاقسى ناتيجە بەرەتىنىن الەمدىك تاجىريبە كورسەتتى. مۇنداي مۇمكىندىككە نۇر-سۇلتان قالاسىنداعى «ءۇمىت» توموتەراپيا جانە يادرولىق مەديتسينا اۋرۋحانا كەشەنى» جشس دا يە بولدى.
– اۋرۋحانا كەشەنىندە ونكولوگيالىق ناۋقاستاردى «TomoTherapy HD» جابدىعىن قولدانا وتىرىپ, جاڭا زاماناۋي توموتەراپيا ءتاسىلى بويىنشا ەمدەيدى. «دامۋ» قورى «بيزنەستىڭ جول كارتاسى – 2020» مەملەكەتتىك باعدارلاماسى بويىنشا جوبانى جۇزەگە اسىرۋ ءۇشىن بانكتەن الىنعان كرەديت مولشەرلەمەسىن سۋبسيديالادى, – دەدى نۇر-سۇلتان قالاسىنىڭ «دامۋ» كاسىپكەرلىكتى دامىتۋ قورىنىڭ ديرەكتورى نۇرسۇلتان ابدوللا.
ەرجان شاياحمەتوۆ,«ءۇمىت» كەشەنىنىڭ ديرەكتورى:
– بۇل – وتە «اقىلدى» تەحنولوگيا. بىرنەشە ماشينانىڭ فۋنكتسياسىن (كيبەرپىشاق, گامما-پىشاق) اتقارادى. باس ميى ىسىگىنىڭ, كورۋ ءتىنىنىڭ, وكپە جانە باسقا ورگانداردىڭ راك اۋرۋىن ەمدەۋ كەزىندە ساۋ جاسۋشالارعا زاقىم كەلمەيدى جانە ناۋقاستى قۇلان-تازا ەمدەپ جازادى. ەمدەۋ پروتسەدۋراسى ناۋقاستى اۋىرسىندىرمايدى, 10-15 مينۋتقا ەسەپتەلگەن. تەك ابدەن اسقىنىپ كەتكەن, 4 دارەجەدەگى راك توموتەراپياسى ۇزاعىراققا سوزىلادى.
توموتەراپيا ورتالىعى مەملەكەتتىك-جەكەمەنشىك ارىپتەستىك اياسىندا قۇرىلدى. قىمبات جابدىق قر ينۆەستيتسيا جانە ينفراقۇرىلىمدىق دامۋ مينيسترلىگىنىڭ, «دامۋ» كاسىپكەرلىكتى دامىتۋ قورىنىڭ جانە «بايتەرەك» ۇلتتىق حولدينگىنىڭ قولداۋىمەن ساتىپ الىنعان.
– توموتەراپيا – بۇل ءبىر اپپاراتتا جەلىلىك كۇشەيتكى مەن كومپيۋتەرلىك توموگرافتىڭ ۇيلەسىمى نەگىزىندە ونكولوگيالىق كەسەلدەردى ەمدەيتىن وزىق ءتاسىل, – دەدى «ءۇمىت» كەشەنىنىڭ ديرەكتورى ەرجان شاياحمەتوۆ. – ەگەر مەملەكەت تاراپىنان قولداۋ بولماعاندا ءبىز مۇنداي جابدىقتى ساتىپ الا الماۋشى ەدىك.
الەمدە مۇنداي 180 عانا اپپارات بار. ول اقش-تا جاسالعان. جابدىقتىڭ كوپشىلىگى امەريكا اۋماعىندا شوعىرلانعان. ورتالىق ازيادا تەك نۇر-سۇلتان قالاسىندا عانا. تمد اۋماعىندا – ماسكەۋدە ونىڭ ەسكى ۇلگىسى, سوسىن قازان قالاسىندا جاڭا ۇلگىسى ورناتىلعان. ەلورداداعى جابدىق – سوڭعى مودەل. ونىڭ قۇنى 5 ملن دوللار تۇرادى.
بۇگىنگى كۇنگە دەيىن «ءۇمىت» توموتەراپيا جانە يادرولىق مەديتسينا اۋرۋحانا كەشەنىندە 160 ناۋقاس ەمدەلىپ شىقتى. قازىر 21 ادام ەم-دوم الىپ جاتىر, 9 ناۋقاس تەكسەرۋدەن وتۋدە. تاعى 18 مۇقتاج جان كەزەگىن كۇتىپ ءجۇر. سونىمەن بىرگە قىتايدان, رەسەيدەن, باسقا جاقىن كورشى مەملەكەتتەردەن ەمدەلۋگە ءوتىنىش تۇسىرگەندەر از ەمەس. ورتالىقتىڭ دارىگەرلەرى اقش-تا, ءۇندىستاندا, فرانتسيادا, كاتاردا وقىپ, بىلىكتىلىكتەرىن جەتىلدىرىپ كەلگەن.
– بايقاعانىمىزداي, بىرەگەي قوندىرعى ءاربىر پاتسيەنتتىڭ جەكە قاجەتتىلىكتەرىنە سايكەس جانە جوعارى ساپالى ساۋلەلەندىرەدى. ساۋلەلەنۋدىڭ قاجەتتى دوزاسىن شىعارۋدىڭ بىرەگەي سپيرالدى رەجيمى كۇردەلى, اسقىنعان, سونداي-اق قولجەتىمدىلىگى قيىن تۇستا ورنالاسقان ىسىكتەردى ەمدەپ-جازۋعا مۇمكىندىك بەرەدى. ساۋلەلەنۋدىڭ اسەرى ساۋ تىندەردى زاقىمدامايدى. بۇل ەمدەلۋشىلەردىڭ ءتۇرلى ساناتتارى ءۇشىن ساۋلەلىك تەراپيانى قولدانۋ اياسىن كەڭەيتەدى.
ە.شاياحمەتوۆتىڭ ايتۋىنشا, توموتەراپيا ءتاسىلىن قولدانۋ ارقىلى بولاشاقتا راكتىڭ بارلىق تۇرلەرىن ەمدەۋدە جاقسى ناتيجەلەرگە قول جەتكىزۋگە بولادى. ءتىپتى قازىرگى كۇنى راديوساۋلەلەندىرۋ جابدىعى نەمەسە وتا جاساۋ ارقىلى سىلىپ تاستاۋ قيىنعا تۇسەتىن نەمەسە ەمدەۋدىڭ باسقا تاسىلدەرى ناتيجە بەرمەگەن قاتەرلى ىسىكتەردى ەمدەپ-جازۋ مۇمكىندىگى اشىلىپ وتىر.
