استانا قالاسى اكىمىنىڭ ءباسپاسوز قىزمەتىنىڭ حابارلاۋىنشا, اتالمىش جىلجىمالى سەنىم پۋنكتى Mercedes Sprinter اۆتوكولىگى بازاسىندا ارنايى تاپسىرىس بويىنشا جينالعان جانە بارلىق زاماناۋي جانە قاۋىپسىزدىك تالاپتارىنا سايكەستەلگەن. اۆتوكولىكتىڭ جۇمىس ورىندارى ەرگونوميكالىق كورسەتكىشتەرگە, قاۋىپتى توپ وكىلدەرىمەن جۇمىس ىستەۋ كەزىندە ايتۆ-ينفەكتسياسىن جۇقتىرۋ قاۋىپىن سەيىلتۋ ەرەكشەلىكتەرىنە ساي جابدىقتالعان. اۆتوكولىك قۇرىلىمى ەكى ماماننىڭ ءبىر مەزگىلدە قابىلداۋ جۇرگىزۋىنە جانە ايتۆ-ينفەكتسياسىنا جەدەل تەستىلەۋ جۇرگىزۋىنە مۇمكىندىك بەرەدى, سونداي-اق, جۇمىس ورىندارى جالپى جانە جەرگىلىكتى جارىقپەن, باكتەريتسيدتىك شاممەن جابدىقتالعان, قول جۋعا مۇمكىندىك قاراستىرىلعان, قىسقى ۋاقىتتا اۋانى جىلىتاتىن, ال جازعى كەزەڭدە اۋانى سالقىنداتاتىن جۇيەمەن جابدىقتالعان, سالوننىڭ ىشكى بەتتەرى وڭاي زالالسىزداندىرىلادى.
زاماناۋي جىلجىمالى سەنىم پۋنكتى ايتۆ-ينفەكتسياسىن جۇقتىرۋ قاۋپى جوعارى قاۋىپتى توپتار – ينەكتسيالىق ەسىرتكى تۇتىنۋشىلارى اراسىندا الدىن الۋ شارالارىنىڭ تيىمدىلىگىن جانە ورتالىق قىزمەتىنە قولجەتىمدىلىگىن ارتتىرۋعا سەپتىگىن تيگىزەدى. ءار ادام مۇندا شپريتستەر, مۇشەقاپتار جانە اقپاراتتىق ءبىلىم ماتەريالدارىن الۋىنا بولادى, ماماندار ءاربىر كەلۋشىگە ايتۆ-نىڭ الدىن الۋ شارالارىن جانە جۇقتىرۋ قاۋپىن ازايتۋ تۋرالى جەكە كەڭەستەر, ۋاقىتىندا ايتۆ-عا تەستىدەن ءوتۋ ماڭىزدىلىعى جونىندە تۇسىندىرمە جۇمىستارىن جۇرگىزەدى. جىل باسىنان بەرى ورتالىقتىڭ پروفيلاكتيكالىق كومەگىمەن 3095 ينەكتسيالىق ەسىرتكى تۇتىنۋشىسى قامتىلدى.
قىزمەتكەرلەر جول كەستەسىن وزدەرى انىقتايدى. جۇمىس ۋاقىتى: يەت ءۇشىن كۇن سايىن ساعات 10.00-دان 13.00-گە دەيىن.
astana.gov.kz
