بۇگىن ەلباسى حالىقارالىق ايەلدەر كۇنىنە وراي قازاقستاننىڭ ايەلدەر قاۋىمى وكىلدەرىمەن «كوكتەم شۋاعى» اتتى كەزدەسۋ وتكىزدى, دەپ حابارلايدى اقوردانىڭ ءباسپاسوز قىزمەتى.
كەزدەسۋگە ەكونوميكانىڭ, مادەنيەتتىڭ, الەۋمەتتىك سالانىڭ جانە مەملەكەتتىك قىزمەتتىڭ ءتۇرلى سەكتورلارىنىڭ وكىلدەرى قاتىستى.
مەملەكەت باسشىسى ايەلدەردى الدا كەلە جاتقان حالىقارالىق ايەلدەر كۇنىمەن قۇتتىقتادى.
– سىزدەر ارقىلى مەن ەلىمىزدىڭ بارلىق ايەلدەر قاۋىمىن قۇتتىقتاپ, دەنساۋلىق, وتباسىندا باقىت جانە تاتۋلىق تىلەيمىن. ەكونوميكانىڭ ءتۇرلى سالالارىندا, اسىرەسە اعارتۋ, دەنساۋلىق ساقتاۋ, مادەنيەت, بيزنەستە جۇمىسپەن قامتىلعانداردىڭ 52%-ىنان استامىن ايەلدەر قۇرايدى. ولار دەپۋتاتتاردىڭ, باسشىلاردىڭ اراسىندا دا كوپ, ال مەملەكەتتىك قىزمەتشىلەردىڭ تەڭ جارتىسىنان استامى – ايەلدەر. وسىلايشا ولار كوپتەگەن شەشىمدەردى قابىلداۋعا اتسالىسادى. سول ءۇشىن مەنىڭ العىسىمدى قابىل الىڭىزدار, – دەدى نۇرسۇلتان نازارباەۆ.
قازاقستان پرەزيدەنتى ايەلدەر ءبىزدىڭ ەلدە اسەم قالپىمەن باسىم كوپشىلىك بولىپ وتىرعانىن اتاپ ءوتتى.
– تاۋەلسىزدىك جىلدارىندا ەلىمىزدە 7 ميلليونداي بالا دۇنيەگە كەلدى. بۇگىندە قازاقستاندا كۇن سايىن مىڭنان اسا ءسابي ومىرگە كەلىپ جاتادى. قازىر كوپ بالالى انالار سانى – جارتى ميلليون, بۇل – ناعىز ەرلىك. بۇكىل الەۋمەتتىك بلوك نازىك ايەلدەردىڭ ۇلەسىندە. ولار مەديتسينا قىزمەتكەرلەرىنىڭ 75%-ىن قامتيدى, – دەدى مەملەكەت باسشىسى.
قازاقستان پرەزيدەنتى گەندەرلىك قاتىناس بويىنشا رەسپۋبليكا جەتەكشى ورىنداردىڭ بىرىنە يە ەكەنىن ايتىپ ءوتتى. ايەلدەردىڭ وندىرىستەگى جالپى ۇلتتىق ونىمگە قوسقان ۇلەسى 40%-عا جۋىقتايدى. ايەلدەر ماڭىزدى مەملەكەتتىك قىزمەتتەر اتقارادى, 550 مىڭ قازاقستاندىق ايەل شاعىن جانە ورتا بيزنەسكە باسشىلىق ەتەدى.
نۇرسۇلتان نازارباەۆ جاقىندا ماحاببات بەكبوسىنوۆانى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ ءتورايىمى قىزمەتىنە تاعايىنداعانىن ايتتى. قازاقستان پرەزيدەنتى ونىڭ تانىمال دارىگەر ەكەنىن جانە وتە كۇردەلى مەديتسينالىق وتالار جاساۋعا تىكەلەي قاتىساتىنىن اتاپ ءوتتى.
مەملەكەت باسشىسى «قازاقستان – 2050» ستراتەگياسىن ىسكە اسىرۋدا ايەلدەردىڭ ءرولى ەرەكشە ەكەنىنە توقتالدى.
– ءبىز ساياسي تۇراقتىلىقتى, سەنىمدى, دوستىقتى, ەلىمىزدە تۇرىپ جاتقان ادامداردىڭ بارلىعىنىڭ تەڭقۇقىلىعىن ساقتايمىز. قازاقستان بۇل رەتتە بىرەگەي «ارال» بولىپ قالا بەرمەك. بۇل – ءبىزدىڭ ورتاق قازىنامىز, ءبىز وعان بىرگە قول جەتكىزدىك, – دەدى قازاقستان پرەزيدەنتى.
قر باس پروكۋراتۋراسى قۇقىقتىق ستاتيستيكا جانە ارناۋلى ەسەپ كوميتەتىنىڭ ءتورايىمى, گەنەرال ساۋلە ايتپاەۆا 2013 جىلعى 6 مامىر ءوز ومىرىندەگى ەڭ ماڭىزدى كۇن بولىپ تابىلاتىنىن اتاپ ءوتتى.
– سول كۇنى ءسىز ماعان گەنەرال پوگونىن تاپسىردىڭىز, مەن قازاقستان تاريحىندا ايەلدەر اراسىندا تۇڭعىش گەنەرال اتاندىم. وسىلايشا, ءسىز قۇقىق قورعاۋ ورگاندارىندا قىزمەت اتقاراتىن 90 مىڭنان استام ايەلدى جىگەرلەندىردىڭىز, – دەدى س.ايتپاەۆا.
«24KZ» تەلەارناسىنىڭ پروديۋسەرى ەكاتەرينا موركوۆينا ارنا ءبىر جىلدان استام ۋاقىت بۇرىن مەملەكەت باسشىسىنىڭ تاپسىرماسىمەن اشىلعانىن, وسى قىسقا مەرزىم ىشىندە ونىڭ كورەرمەندەرىنىڭ سانى شامامەن 6 ميلليون ادامعا كوبەيگەنىن ءمالىم ەتتى.
«ادەمى-اي plus» جشس پرەزيدەنتى باحارگۇل تولەگەن مەملەكەت باسشىسىنىڭ شاقىرۋىمەن تاريحي وتانىنا كوشىپ كەلگەندەردىڭ ءبىرى ەكەنىن ايتتى.
– مەن ۇلتتىق كادەسىيلار جاسايتىن كاسىپورىن اشتىم, وندا 45 ادام جۇمىس ىستەيدى. ءسىزدىڭ بيزنەستى دامىتۋعا جاعداي جاساۋ جونىندەگى تۇبەگەيلى شارالار جونىندەگى تاياۋداعى شەشىمىڭىز ءبىز ءۇشىن شەكسىز كومەك بولىپ سانالادى. ءبىز بۇل حاباردى قۋانىشپەن قابىل الدىق, – دەدى ب.تولەگەن.
«قازاقستان ۋكرايندارىنىڭ راداسى» رەسپۋبليكالىق بىرلەستىگى توراعاسىنىڭ ءبىرىنشى ورىنباسارى تامارا شيرمەر قازاقستان حالقى اسسامبلەياسى قۇرامىندا 12 جىل جۇمىس ىستەپ كەلە جاتقانىن اتاپ ءوتتى.
– وكىنىشكە قاراي, مەنىڭ تاريحي وتانىمدا – ۋكراينادا قايعىلى وقيعا ورىن الدى. تارتىپسىزدىكتەر ەلدى ونداعان جىلعا ارتقا شەگىندىردى. بولاشاق ەكى-ءۇش بۋىندى تەك پروبلەمالار كۇتىپ تۇر. بىزدە ءسىزدىڭ ساياساتىڭىزدىڭ ارقاسىندا بەيبىتشىلىك پەن كەلىسىم ورنىققان. مۇنى باسقا ەلدەردە كيكىلجىڭدەر ءورشي تۇسكەن كەزدە ەرەكشە باعالاي باستايسىڭ, – دەدى ت.شيرمەر.
سوچي-2014 XXII قىسقى وليمپيادالىق ويىندارىنىڭ مانەرلەپ سىرعاناۋدان قولا جۇلدەگەرى دەنيس تەننىڭ اناسى وكسانا تەن ءوزىنىڭ ارمانى ورىندالىپ, ۇلىنىڭ وليمپيادا تۇعىرىنا كوتەرىلىپ, كوككە اۋەلەگەن قازاقستان تۋىنا ماقتانىشپەن قاراعان ءساتى تۋرالى اڭگىمەلەدى.
وندىرىستىك قۇرىلعىلاردى پايدالانۋ جانە جوندەۋ توكارى مايرا امانوۆا 25 جىلدان بەرى ەرلەرمەن بىرگە جۇمىس ىستەپ كەلە جاتقانىنا توقتالدى. ول ءوز ارىپتەستەرىنىڭ اتىنان ءوندىرىس جۇمىسكەرلەرىنىڭ ەڭبەكاقىسىن ارتتىرعانى ءۇشىن العىس ايتتى.
«استانا-وپەرا» بالەت تەاترىنىڭ جەتەكشى ءسوليسى, قازاقستان رەسپۋبليكاسىنىڭ ەڭبەك سىڭىرگەن قايراتكەرى ءمادينا باسپاەۆا تەاتردىڭ سالىنۋى ميلليونداعان ادامداردىڭ ارمانىن ورىنداعانىن جەتكىزدى.
– قازاقستان ەندى بارلىق قازىنا, بارلىق مادەني مۇرا شوعىرلاناتىن ونەردىڭ جەرۇيىعىنا اينالدى. مۇنداي كلاسسيكالىق تەاترلار 21-عاسىردا ەۋرازيادا سالىنعان ەمەس, – دەدى م.باسپاەۆا.
«ورلەۋ» جۇمىسقا ورنالاستىرۋ اگەنتتىگىنىڭ ديرەكتورى ءمادينا ساۋىتبەكوۆا كومپانيا 600-دەن استام اۋىل تۇرعىنىنا جۇمىس تابۋعا كومەكتەسكەنىن, ولاردىڭ 360-ى جاس مامان ەكەنىن حابارلادى.
كوكشەتاۋ قالاسىنداعى فيزيكا-ماتەماتيكا باعىتىنداعى نازارباەۆ زياتكەرلىك مەكتەبىنىڭ قىزمەتكەرى اليونا يۋماكۋلوۆا قازاق ءتىلى ءوزى ءۇشىن تۋعان ءتىلى بولىپ سانالاتىنىن جانە ءوزىنىڭ ءبىلىمى بولاشاققا جول اشۋعا مۇمكىندىك بەرەتىنىن ايتىپ بەردى.
ماگيسترانت انار بايمىرزاەۆا سىبايلاس جەمقورلىقپەن كۇرەستىڭ ماتەماتيكالىق مودەلىنىڭ ازىرلەنىمى تۋرالى اڭگىمەلەپ, وسى كەلەڭسىزدىككە قارسى تۇرۋعا ءوز ۇلەسىن قوسۋعا ءۇمىت ارتاتىنىن جەتكىزدى.
«Mimioriki» كاسىپورىنىنىڭ اتقارۋشى ديرەكتورى يننا اپەنكو كومپانيا شىعاراتىن بالالار كيىمى بۇگىندە ۇلكەن سۇرانىسقا يە ەكەنىن ايتتى.
– بىلتىر ءسىز بىزگە «التىن ساپا» سىيلىعىن تاپسىردىڭىز. بۇل – ءبىزدىڭ ەڭبەگىمىزگە بەرىلگەن ەڭ جوعارى باعا, – دەدى ي.اپەنكو.
ەۋرازيالىق ينتەگراتسيا ينستيتۋتىنىڭ ديرەكتورى جانارگۇل قۇسمانعاليەۆا مەملەكەت باسشىسىنىڭ ەۋرازيالىق ەكونوميكالىق وداق قۇرۋ تۋرالى يدەياسىنا تەك ينتەرنەتتىڭ وزىندە 8 ميلليوننان استام جاريالانىم ارنالعانىن اتاپ ءوتتى.
– الەمدىك وتىز كوشباسشىنىڭ قاتارىنا كىرەتىن ەلدەردىڭ بارلىعى دا بەلسەندى ىقپالداستىق ۇدەرىستەرىنىڭ ارقاسىندا عانا باقۋاتتى بولىپ وتىر. بۇگىندە ىقپالداستىق – تابىستى ءارى قاۋىپسىز مەملەكەتتىڭ ەڭ باستى كىلتى, – دەدى ج.قۇسمانعاليەۆا.
اتىراۋ قالاسىنىڭ ىشكى ىستەر باسقارماسىنىڭ كوشى-قون پوليتسياسى ءبولىمىنىڭ باستىعى گۇلجان لۇقمانوۆا قۇقىق قورعاۋ ورگاندارىنداعى جالپى ەڭبەك ءوتىلى ءجۇز جىلدى قۇرايتىن زاڭگەرلەر اۋلەتىنىڭ وكىلى ەكەندىگىن ايتتى. وسى جىلدار ىشىندە بۇل اۋلەت 200-دەن استام قىلمىستىڭ الدىن الىپ, 100-دەن اسا قىلمىستى اشقان.
«Korme-Expo» جشس باس ديرەكتورى باقىتكۇل قۇرمانوۆا EXPO-2017 كورمەسى سياقتى وقيعانىڭ ماڭىزىنا نازار اۋداردى.
– زاماناۋي تەحنولوگيالىق جانە يننوۆاتسيالىق پاۆيلوندار سالىناتىن بولادى. ولاردىڭ جوبالارى «جاسىل» تەحنولوگيالار سالاسىنداعى ساۋلەتشىلەر مەن ساراپشىلاردى الدەن-اق تامساندىرىپ وتىر, – دەدى ب.قۇرمانوۆا.
ال 7 بالا تاربيەلەپ وتىرعانىن ايتقان نۇرگۇل مۇساەۆا مەملەكەتتىڭ انا مەن بالاعا كوڭىل ءبولىپ وتىرعانى ءۇشىن بارلىق قازاقستاندىق انالاردىڭ اتىنان العىسىن ءبىلدىردى.
قر بعم ۇلتتىق بيوتەحنولوگيا ورتالىعىنىڭ ءتىن جاسۋشالار زەرتحاناسىنىڭ جەتەكشى عىلىمي قىزمەتكەرى عازيزا دانلىباەۆا ءوزى ازىرلەگەن «جاساندى تەرى» دەگەن اتقا يە بولعان جاسۋشالىق تەراپيانىڭ يننوۆاتسيالىق ءادىسى تۋرالى ايتىپ ءوتتى.
– پاتەنت الىندى, كلينيكالىق سىناق ءجۇرىپ جاتىر, قازىردىڭ وزىندە كۇيىك شالعان 40 ناۋقاس ءساتتى ەمدەلدى, – دەدى ع. دانلىباەۆا.
ساعات شەبەرى, اتا-باباسىنان بەرى ساعاتشى ماۆليۋدا شيرحانوۆا اكەسىنىڭ ميلليوننان اسا ساعات جوندەگەنىن اڭگىمەلەدى.
– مەن اكەمنىڭ جولىن قۋدىم, قازىردىڭ وزىندە 350 مىڭنان استام ساعات جوندەدىم. مەن قازاقستاننىڭ ءدال ۋاقىتى – 2050 ەكەنىن ۇنەمى ايتامىن, – دەدى ول.
دەنساۋلىق ساقتاۋ ءمينيسترى ساليدات قايىربەكوۆا «قازاقستان-2050» ستراتەگياسىنىڭ اياسىندا سالانى ۇزاقمەرزىمدى دامىتۋدىڭ جوسپارىن ازىرلەۋ جۇمىستارى باستالعانىن حابارلادى.
– ەلىمىزدىڭ مەديتسينا قىزمەتكەرلەرىنىڭ الدىنا قويىلعان بارلىق مىندەتتەردىڭ ورىندالاتىندىعىنا ءسىزدى سەندىرگىم كەلەدى, – دەدى س.قايىربەكوۆا.
پرەمەر-ءمينيستردىڭ ورىنباسارى گۇلشارا ابدىقالىقوۆا بارلىق مەملەكەتتىك جانە سالالىق باعدارلامالارعا ايەلدەر قاۋىمىنىڭ قاتىسۋى ەسكەرىلگەنىن اتاپ ءوتتى. ول وسىنداي جولمەن باعدارلامالارعا جاستار دا تارتىلادى دەپ ءۇمىت ارتاتىندىعىن جەتكىزدى.
پارلامەنت دەپۋتاتى زۋحرا ساياپوۆا قازاقستان حالقى اسسامبلەياسى بۇكىل الەمدە كەلىسىم مەن تۇراقتىلىق ايماعىن قۇرۋعا تالپىنىپ وتىرعانىن اتاپ ايتتى.
ايەلدەر ءىسى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا ءتورايىمى ماحاببات بەكبوسىنوۆا قازاقستاننىڭ گەندەرلىك تەڭدىك تۇرعىسىنان 32-ورىندا ەكەنىن حابارلادى.
– ءبىز كەلەسى كەزدەسۋگە دەيىن ەلىمىز گەندەرلىك تۇرعىدان دامىعان ەلدەردىڭ وتىزدىعىنا كىرۋى ءۇشىن بار كۇش-جىگەرىمىزدى جۇمسايمىز, – دەدى م.بەكبوسىنوۆا.
«قازاقفيلم» كينوستۋدياسىنىڭ اكتەرى مايا ۆەرونسكايا, الپينيزمنەن حالىقارالىق سپورت دارەجەدەگى شەبەرى سۆەتلانا شاريپوۆا, ءانشى, قازاقستاننىڭ ەڭبەك سىڭىرگەن قايراتكەرى تولقىن زابيروۆا, تسيرك ءارتىسى, ارىستان ۇيرەتۋشى تۋنگالاگ وسەلباەۆا, سونداي-اق ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ 3 كۋرس ستۋدەنتى پەريزات جولداسوۆا مەملەكەت باسشىسىنا وزدەرىنىڭ جەتكەن جەتىستىكتەرى تۋرالى ايتىپ, مۇنىڭ ءبارى ەلىمىزدەگى تاتۋلىق پەن كەلىسىم ساياساتىنىڭ ارقاسىندا مۇمكىن بولعانىن اتاپ ءوتتى.
قورىتىندى سوزىندە نۇرسۇلتان نازارباەۆ بارلىق مەملەكەتتىك باعدارلامالار حالىقتىڭ ءال-اۋقاتىن جاقسارتۋ ءۇشىن جۇزەگە اسىرىلىپ جاتقانىنا توقتالدى.
– بۇگىندە قازاقستاندا شاعىن جانە ورتا بيزنەس بەلسەندى دامۋدا. بۇل سەكتوردا 800 مىڭ كاسىپورىن جۇمىس ىستەيدى, 2,5 ميلليونعا جۋىق قازاقستاندىق ەڭبەكپەن قامتىلعان. ولار ەلدىڭ ىشكى جالپى ءونىمىنىڭ 20-25 پايىزىن قامتاماسىز ەتىپ وتىر, ءبىزدىڭ مىندەتىمىز – بۇل كورسەتكىشتى 30-50 پايىزعا دەيىن جەتكىزۋ. ول داعدارىس قۇبىلىستارىن ەڭسەرە الاتىن ورنىقتى ەكونوميكا قالىپتاستىرادى. ەگەر 2002 جىلى كاسىپكەر ايەلدەردى قولداۋعا 150 ميلليون تەڭگە بولىنسە, بۇل سان 2013 جىلى 7 ەسە ءوسىپ, 1 ميلليارد تەڭگەدەن استى, ال بارلىق بانكتىك نەسيەلەردىڭ 38 پايىزى كاسىپكەر ايەلدەرگە بەرىلدى, – دەدى مەملەكەت باسشىسى.
بۇدان بولەك, نۇرسۇلتان نازارباەۆ «جۇمىسپەن قامتۋ-2020» جول كارتاسى جۇزەگە اسىرىلعان ءۇش جىل ىشىندە 230 مىڭنان استام ادام جۇمىسقا ورنالاستىرىلعانىن اتاپ ءوتتى. بۇل ورايدا مۇمكىندىگى شەكتەۋلى ادامداردى جۇمىسپەن قامتۋ ماسەلەلەرىنە باسا نازار اۋدارىلىپ وتىر.
– تەك بىلتىردىڭ وزىندە وسى ساناتتاعى 4470 ازامات جۇمىسقا ورنالاستىرىلدى. مەنىڭ قازاقستان حالقىنا جولداۋىمدا بەرىلگەن تاپسىرمام بويىنشا, مۇگەدەكتەردى قولداۋعا ارنالعان جاڭا شارالار ازىرلەنۋدە. سونداي-اق, جاسى 50-دەن اسقان ادامدارعا كومەكتەسۋگە باعىتتالعان «باستاما 50 پليۋس» كەشەندى جوسپارى بەكىتىلدى, – دەدى مەملەكەت باسشىسى.
قازاقستان پرەزيدەنتى اتا-اناسىز قالعان, بالالار ۇيىندە تاربيەلەنىپ جاتقان بۇلدىرشىندەرگە ەرەكشە نازار اۋداردى. نۇرسۇلتان نازارباەۆ بارلىق قازاقستاندىقتارعا باستاماشىلىق تانىتىپ, سونداي بالالاردى ءوز وتباسىلارىندا تاربيەلەۋ ءۇشىن الۋ جونىندە ءسوز ارنادى.
مەملەكەت باسشىسى مەملەكەتتىڭ ماڭىزدى مىندەتى – قازاقستاندىقتاردىڭ ءال-اۋقاتىن ودان ءارى ارتتىرۋ ەكەنىنە توقتالدى.
– جولداۋدا مەن ۇكىمەتكە 2015 جىلعى 1 شىلدەدەن باستاپ ازاماتتىق قىزمەتشىلەرگە ەڭبەكاقى تولەۋدىڭ جاڭا ۇلگىسىن ەنگىزۋدى تاپسىردىم. ول دەنساۋلىق ساقتاۋ, ءبىلىم بەرۋ, الەۋمەتتىك قورعاۋ سالالارى قىزمەتكەرلەرىنىڭ جالاقىسىنىڭ ۇلعايتىلۋىن قامتاماسىز ەتۋگە ءتيىس. ەگەر ازاماتتىق قىزمەتشىلەردىڭ جالاقىسىنىڭ جالپى ءوسىمىن جيناقتاي كەلسەك, ول قىزمەت سالاسىنىڭ ەرەكشەلىگىنە سايكەس 36-دان 52 پايىزعا دەيىنگى مولشەردى قۇرايدى. ال ازاماتتارىمىزدى باسپانامەن قامتاماسىز ەتۋ جونىندە ايتساق, تەك بىلتىردىڭ وزىندە 6,8 ميلليون شارشى مەتر پايدالانۋعا بەرىلدى, – دەدى نۇرسۇلتان نازارباەۆ.
ءبىلىم بەرۋ سالاسىندا, مەملەكەت باسشىسى ايتقانداي, مەكتەپكە دەيىنگى بالالار مەكەمەلەرىنىڭ قۇرىلىسى جالعاسۋدا, ءۇش اۋىسىممەن وقىتۋدى توقتاتۋ شارالارى جاسالىپ جاتىر. 2013 جىلى 124 مەكتەپ سالىندى, بيىل تاعى 45 مىڭ ورىنعا ارنالعان 73 مەكتەپتى پايدالانۋعا بەرۋ جوسپارلانىپ وتىر.
سونداي-اق, نۇرسۇلتان نازارباەۆ دەنساۋلىق ساقتاۋ جۇيەسى نىعايىپ كەلە جاتقانىن, ال ەلدە ءومىر ءسۇرۋ ۇزاقتىعى 72 جاسقا دەيىن ۇلعايعانىن ايتتى.
– قازاقستاندا جۇرەك, باۋىر, بۇيرەك, ءوت, سۇيەك كەمىگىن الماستىرۋ سەكىلدى بىرەگەي وتالار تەگىن جاسالادى. بۇرىن مۇنداي وتالاردى قازاقستاندىقتار تەك شەتەلدە جانە قىرۋار اقشاعا عانا جاساتا الاتىن. 2013 جىلدىڭ وزىندە عانا 168 دەنساۋلىق ساقتاۋ نىسانى سالىندى, بيىل تاعى سونشا نىسان اشىلادى, – دەدى مەملەكەت باسشىسى.
قازاقستان پرەزيدەنتى ءوز قىزمەتىنىڭ نەگىزگى مىندەتى ءاربىر قازاقستاندىقتىڭ ءومىرىن باقۋاتتى ەتۋگە, ەلدە بەيبىتشىلىك پەن توزىمدىلىكتى ساقتاۋ ەكەندىگىنە تاعى ءبىر رەت نازار اۋدارتىپ, قازاقستاننىڭ بارلىق ەر-ازاماتتارىن ايەلدەردى قۇرمەتتەۋگە جانە باعالاۋعا, ولاردىڭ بەرىك تىرەگى بولۋعا شاقىردى.
كەزدەسۋدىڭ سوڭىندا قازاقستان پرەزيدەنتى كوپ بالالى انا ن.مۇساەۆاعا «التىن القا» بەلگىسىن تاپسىردى.
