باستى قۇجاتتىڭ باسىمدىقتارى ءتۇسىندىرىلدى
استاناداعى «قازاقستان» ورتالىق كونتسەرت زالىندا ەلباسى ن.نازارباەۆتىڭ «قازاقستان جولى – 2050: ءبىر ماقسات, ءبىر مۇددە, ءبىر بولاشاق» اتتى جولداۋىنىڭ نەگىزگى قاعيدالارىن ءتۇسىندىرۋ جونىندەگى رەسپۋبليكالىق اقپاراتتىق-ناسيحات توبىنىڭ مۇشەلەرى ەلوردا جۇرتشىلىعىمەن كەزدەستى.
استانا قالاسى اكىمدىگىنىڭ ۇيىمداستىرۋىمەن وتكەن شاراعا قارجى ءمينيسترى, توپ جەتەكشىسى ب.سۇلتانوۆ, وڭىرلىك دامۋ مينيسترلىگى قۇرىلىس جانە تۇرعىن ءۇي-كوممۋنالدىق شارۋاشىلىق ىستەرى كوميتەتىنىڭ توراعاسى ۆ.گاليەۆ, دەنساۋلىق ساقتاۋ مينيسترلىگى اكىمشىلىك دەپارتامەنتىنىڭ ديرەكتورى ءا.جۇماعاليەۆ جانە رەسپۋبليكالىق اقپاراتتىق-ناسيحات توبىنىڭ باسقا دا مۇشەلەرى مەن جەرگىلىكتى اتقارۋشى ورگان باسشىلارى قاتىستى.
جيىندى استانا قالاسى اكىمىنىڭ ورىنباسارى ايدا بالاەۆا جۇرگىزدى.
الدىمەن ءسوز العان قارجى مينيسترى «قازاقستان-2050» ستراتەگياسى كۇننەن كۇنگە, جىلدان جىلعا ەلىمىزدى, قازاقستاندىقتاردىڭ ءومىرىن جاقسارتا تۇسەتىن ناقتى پراكتيكالىق ىستەر باعدارلاماسى بولىپ تابىلادى. بىراق قازىرگى نارىقتىق جاعدايدا ەڭبەكتەنۋ كەرەكتىگىن اركىم-اق ءتۇسىنۋى ءتيىس» دەي كەلە, ۇكىمەت بيىل ەكونوميكا ءوسىمىن 6-7 پايىز دەڭگەيىندە قامتاماسىز ەتەتىنىن, بۇل ورايدا, ۇستىمىزدەگى جىلدىڭ قورىتىندىسى بويىنشا حالىقتىڭ جان باسىنا شاققانداعى ىشكى جالپى ءونىم 14,5 مىڭ دوللاردان كەم بولمايتىنىن ايتتى.
– 2050-گە دەيىنگى جىلدار جەتى بەسجىلدىققا بولىنەدى, ولاردىڭ ارقايسىسى ورتاق ماقسات – دامىعان وتىز ەلدىڭ قاتارىنا كىرۋگە ارنالىپ وتىر, – دەدى ب.سۇلتانوۆ. – ورتاق شاڭىراعىمىزدىڭ ۇلتتىق يدەياسى – ماڭگىلىك ەل. بۇل – تاۋەلسىزدىگىمىز, قوعامىمىزداعى ۇلتتىق بىرلىك, بەيبىتشىلىك پەن كەلىسىم, ەلىمىزدىڭ ۇلتتىق قاۋىپسىزدىگى. وسى قۇندىلىقتاردىڭ ارقاسىندا ءبىز ءاردايىم جەڭىسكە جەتتىك, جەتىستىكتەرىمىزدى ەسەلەدىك.
قازاقستاننىڭ الەمدەگى ەڭ دامىعان وتىز ەلدىڭ قاتارىنا كىرۋ تۇجىرىمداماسىنداعى باسىمدىقتار تۋرالى ايتا وتىرىپ, مينيستر يننوۆاتسيالىق يندۋستريالاندىرۋ ترەندىن قالىپتاستىرۋدىڭ ماڭىزدىلىعىن, سونىمەن بىرگە شاعىن جانە ورتا كاسىپكەرلىكتى دامىتۋ قاجەتتىگىن اتاپ ءوتتى. «جاھاندىق رەيتينگكە سايكەس, قازاقستان بيزنەستى ءجۇرگىزۋگە ەڭ قولايلى جاعدايى بار ەلدەر توبىنا كىرەدى جانە ءبىز بۇل ءۇردىستى ءورىستەتە تۇسۋگە ءتيىسپىز» دەگەن ب.سۇلتانوۆ شاعىن جانە ورتا بيزنەس جاڭا يننوۆاتسيالىق كاسىپورىندار توڭىرەگىندە دامۋى كەرەكتىگىن العا تارتتى.
ال, قۇرىلىس جانە تۇرعىن ءۇي-كوممۋنالدىق شارۋاشىلىق ىستەرى كوميتەتىنىڭ توراعاسى ۆلاديسلاۆ گاليەۆ «قول جەتىمدى باسپانا-2020» باعدارلاماسى شەڭبەرىندە اتقارىلىپ جاتقان جۇمىستارعا توقتالدى.
كەزدەسۋدەن كەيىن ازاماتتاردىڭ جەكە قابىلداۋى ۇيىمداستىرىلىپ, قۇزىرەتتى ورگان باسشىلارى تۇرعىندار كوكەيىندە جۇرگەن ءتۇرلى ساۋالدارعا جاۋاپ بەردى.
گۇلبارشىن وكەشقىزى