ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىندەگى «كاۋسار» مادەني-تانىمدىق بىرلەستىگىنىڭ ۇيىمداستىرۋىمەن كورنەكتى ادەبيەتتانۋشى-عالىم, مەملەكەتتىك سىيلىقتىڭ لاۋرەاتى, اكادەميك سەيىت قاسقاباسوۆپەن كەزدەسۋ ءوتتى.
بۇل عيبراتقا تولى تانىمدىق كەشتى قازاقستاننىڭ ەڭبەك سىڭىرگەن ءارتىسى كەنجەعالي مىرجىقباي جۇرگىزدى. كەزدەسۋگە زيالى قاۋىم وكىلدەرىمەن بىرگە ستۋدەنتتەر, ادەبيەتتى جاقسى كورەتىن وقىرماندار جينالدى.
عىلىم جولى ەشقاشان وڭاي بولماعان. قازىرگى ادەبيەتتانۋ عىلىمىنىڭ قازىنالى قارياسى سەيىت اسقارۇلىنىڭ ءجۇرىپ وتكەن جولىنان تاعىلىمعا تولى وي تۇيۋگە بولادى. ول وتكەن عاسىردىڭ الپىسىنشى جىلدارىنىڭ سوڭىندا «قازاقتىڭ قيال-عاجايىپ ەرتەگىلەرى» دەگەن تاقىرىپتا كانديداتتىق ديسسەرتاتسيا قورعاپ, عىلىمعا تۇرەن سالدى. ۇلتتىق فولكلوردى دامىتۋعا زور ەڭبەك ءسىڭىردى. كەشەگى جاريالىلىق كەزىندە جازىقسىز جالانىڭ قۇربانى بولعان احمەت بايتۇرسىنوۆ, مىرجاقىپ دۋلاتوۆ, ماعجان جۇماباەۆ, جۇسىپبەك ايماۋىتوۆ سەكىلدى الاش ارىستارىمىزدى اقتاۋ تۋرالى قۇجاتتاردى دايىندادى. عالىم رەتىندە ونىڭ قالامىنان قازاق جانە ورىس تىلدەرىندە 10-نان استام مونوگرافيالار مەن زەرتتەۋ جيناقتارى, 500-گە جۋىق ماقالالار جارىق كوردى.
كەش بارىسىندا مىرزاتاي جولداسبەكوۆ, ءادىل احمەتوۆ, ساۋىتبەك ابدراحمانوۆ, راحمەتقاجى بەرسىمباي, نامازالى وماشۇلى, بلوك شايكەنوۆ, باۋىرجان ومارۇلى سەكىلدى بەلگىلى ازاماتتار ءسوز الىپ, اكادەميكتىڭ ەلگە جانە عىلىمعا سىڭىرگەن ەڭبەگى جايىندا پاراساتتى وي قوزعادى. ۋنيۆەرسيتەت ستۋدەنتتەرى «قىز-جىبەك», «قوزى-كورپەش-بايان سۇلۋ» جىرلارىنان ءۇزىندى وقىدى. تالانتتى ءانشى كەنجەعالي مىرجىقباي اۋەلەتىپ ءان سالدى. اقىن باقىتجان توباياق ارناۋ ولەڭىن وقىدى. ايتۋلى عالىمنىڭ ءوزى وقىرمانداردىڭ سۇراعىنا جاۋاپ بەرىپ, ءومىر جولىنان عيبراتتى اڭگىمە ءوربىتتى.
كەشتى قورىتىندىلعان اكادەميك, اتالعان ۋنيۆەرسيتەتتىڭ پرورەكتورى ديحان قامزابەكۇلى الاتاۋعا كوش تۇزەگەن عالىمنىڭ 1997 جىلدان باستاپ, ءوزى قىزمەت اتقارعان جوعارى وقۋ ورداسىنان «ەۋرازيا» عىلىمي ورتالىعىن, شىعىستانۋ فاكۋلتەتىن, ديسسەرتاتسيالىق كەڭەستى ۇيىمداستىرىپ, ۇزاق جىلدار بويى قازاق ادەبيەتى كافەدراسىن جەمىستى باسقارعانىن ايتىپ, ارداقتى ازاماتقا ۇزاق عۇمىر تىلەدى.
