نۇر-سۇلتان قالاسىنىڭ اكىمى التاي كولگىنوۆ وسى قىزمەتىنە كىرىسكەن كۇننەن باستاپ 9 اپتا ىشىندە 300-دەن اسا ادامدى قابىلداعان. ءار ادامنىڭ ارىز-شاعىمى بويىنشا ءتيىستى جۇمىستار جۇرگىزىلۋدە.
وسى اپتادا قالا باسشىسى جۋىردا عانا اشىلعان «جانۇيا» وتباسى ينستيتۋتىن قولداۋ ورتالىعىندا ازاماتتاردى قابىلدادى. بۇل مەكەمە «ءبىر تەرەزە» قاعيداتى بويىنشا ەلوردالىقتارعا 70-تەن اسا مەملەكەتتىك قىزمەت تۇرلەرىن ۇسىنادى. تۇرعىندار اتاۋلى الەمەتتىك كومەك, ءبىلىم بەرۋ, جۇمىسقا ورنالاسۋ, كاسىپ اشۋ, تۇرعىن ءۇي باعدارلاماسىنا قاتىسۋ جانە ت.ب. ماسەلەلەر بويىنشا ساۋالدارعا جاۋاپ تابادى. ماسەلەن, وسى جولى ايەلدەر «ۆسەوبۋچ» قورى اياسىندا سەرتيفيكات الۋدىڭ تيىمدىلىگىن اتاپ ايتتى.
تۇرعىنداردىڭ كوپشىلىگىن باسپانا الۋ ماسەلەسى الاڭداتاتىنى راس. وسىعان وراي, التاي كولگىنوۆ جان-جاقتى ءتۇسىندىرىپ بەردى. ونىڭ ايتۋىنشا, ەگەر جازدا باسپانا كەزەگىندەگى ازاماتتاردىڭ سانى 46 مىڭ بولسا, قازىر ول 47,5 مىڭعا كوبەيگەن. «باسپانا ماسەلەسى ءبىر كۇندە شەشىلمەيدى. ءۇيدىڭ كەزەگىندە 47,5 مىڭ ادام تۇر. بىرنەشە تۇرعىن ءۇي باعدارلامالارى بار. سولاردىڭ ءبىرى «باقىتتى وتباسى» دەپ اتالادى. نەسيە مولشەرلەمەسى 2 پايىزدى قۇرايدى. ءبىز كەزەكسىز پاتەرلەردى ۇلەستىرە المايمىز. باسپانا العىسى كەلەتىن تۇرعىندارعا قۇجات جيناۋعا, كەڭەس الۋعا كومەكتەسەمىز. الداعى جىلى قولجەتىمدى تۇرعىن ءۇي كولەمىن 3 ەسەگە دەيىن ارتتىرامىز. بىراق كەزەكتە تۇرعانداردىڭ دا سانى ۇلعايعانىن ۇمىتپاۋعا ءتيىسپىز» دەدى ول.
