اۋەسقوي فۋتبولدان استانا قالاسى اكىمىنىڭ كۋبوگى مارەسىنە جەتتى. التى ايعا سوزىلعان بۇل تۋرنيرگە 17 كوماندا قاتىستى.
«استانا-ارەنا» ستاديونىندا وتكەن جەڭىمپازداردى ماراپاتتاۋ راسىمىنە استانا قالاسى اكىمىنىڭ ورىنباسارى ەرمەك امانشاەۆ, قالالىق دەنە شىنىقتىرۋ جانە سپورت باسقارماسىنىڭ باسشىسى بەرىك مارجىقپاەۆ جانە استانا قالاسى فۋتبول فەدەراتسياسىنىڭ پرەزيدەنتى لاشىن ايماعامبەتوۆ قاتىستى.
اكىم كۋبوگىن فينالدا كوپتىڭ ىشىنەن قارا ءۇزىپ شىققان №8 بالالار مەن جاسوسپىرىمدەر سپورت مەكتەبىنىڭ كومانداسى مەن وسى ءتۋرنيردىڭ بىلتىرعى جەڭىمپازى «زەنيت» كومانداسى ساراپقا سالدى.
قوس كوماندانىڭ وسالى جوق. ەكەۋىنىڭ قۇرامىندا دا بۇرىن كاسىبي دەڭگەيدە دوپ تەپكەن مىقتىلار بارشىلىق. وتە تارتىستى وتكەن ماتچتىڭ باسىندا وسكەمەندىك ويىنشىلاردان قۇرالعان «زەنيتتىڭ» باسىمدىعى بايقالدى. ءبىرىنشى تايمدا ۇرىمتال ساتتە دانيل ستاسيۋناس ەسەپ اشتى. بۇل ناتيجەنى ەكىنشى تايمدا اندرەي پۋستوۆالوۆ ەسەلەي ءتۇستى. بىراق سپورت مەكتەبىنىڭ جىگىتتەرى بىردەن بەرىلمەي, اياعىنا دەيىن بارىن سالدى. تولاسسىز شابۋىل تەككە كەتپەي, ويىننىڭ بىتۋىنە ون مينۋتتاي ۋاقىت قالعاندا قۋانىش ابدۋاليەۆ دۋبل جاساپ, تارازى باسىن تەڭەستىرىپ كەتتى.
ءسويتىپ, ناعىز فينالعا لايىق كەزدەسۋ پەنالتيگە ۇلاسىپ, ناتيجەسىندە سپورت مەكتەبى كومانداسىنىڭ اسىعى الشىسىنان ءتۇستى.
ورىنبەك وتەمۇرات
