ءال-فارابي الەمىمەن قاۋىشۋ
الەمنىڭ «ەكىنشى ۇستازى» اتانعان ءابۋ-ناسىر ءال-فارابي بابامىزدىڭ 1150 جىلدىق مەرەيتويى اياسىندا ەلورداداعى ۇلى عالىمنىڭ ەسىمى بەرىلگەن وقۋشىلار سارايىندا «ءال-فارابي الەمى» وقۋ-تاربيە ورتالىعى اشىلدى.
جاڭا وقۋ جىلى قارساڭىندا اشىلعان ورتالىقتىڭ ماقساتى – عيبراتتى عالىمنىڭ شىعارماشىلىق مۇراسىن زەردەلەپ, ۇرپاق ساناسىنا ءسىڭىرۋ. ەندى وسى وقۋ-تاربيە ورتالىعىندا ويشىل تۇلعانىڭ سان ءتۇرلى قىرىن انىقتايتىن «ءال-فارابي جانە عىلىم», «ءال-فارابي جانە گرەك ويشىلدارى», «ءال-فارابي جانە ونەر», «ءال-فارابي جانە تاربيە», «ءال-فارابي جانە پوەزيا», «ءال-فارابي جانە شەشەندىك ونەر» بولىمدەرى جۇمىس ىستەيدى.
– بۇل باعىتتار بويىنشا وقۋشىلار عالىمنىڭ مەديتسينا, استرونوميا, ماتەماتيكا, گەومەتريا, لوگيكا, فيلوسوفيا سالاسىنداعى ەڭبەكتەرىن جيناقتاپ, ىزدەنەدى. الداعى ۋاقىتتا ءال-فارابي تۋرالى دەرەكتى فيلمدەر, تانىمدىق دۇنيەلەر دايىنداپ, ونىڭ ءومىر سۇرگەن كەزەڭىنە قاتىستى تىڭ دەرەكتەردى وسى ورتالىققا توپتاستىرىپ, عۇلامانىڭ قالدىرعان مول مۇراسىن ناسيحاتتاۋ جۇمىسىن جالعاستىرامىز, – دەدى ءال-فارابي اتىنداعى وقۋشىلار سارايىنىڭ ديرەكتورى ەربول ىرگەباي.
سونداي-اق يگىلىكتى شارا اياسىندا ۇلى فيلوسوفتىڭ ءبيۋستى قويىلىپ, وقۋشىلار سارايىنىڭ اسپاپتىق مۋزىكا ءبولىمىنىڭ وقىتۋشىلارى بەلگىلى كومپوزيتور كەنجەبەك كۇمىسبەكوۆتىڭ «فارابي سازى» تۋىندىسىن ورىندادى.