قازىرگى تاڭدا تاۋەلسىز مەملەكەتىمىزدىڭ دامۋشى جانە دامىعان ەلدەردەن ەرەكشەلىگى – قوعامداعى ءدىننىڭ نىعايۋى مەن ەلدەگى ءدىني احۋالدىڭ تۇراقتى بولۋى.
ءبىزدىڭ مەملەكەتىمىز كوپۇلتتى, دەموكراتيالىق مەملەكەت بولعاندىقتان, ءدىن ماسەلەسى جونىندە بارلىق ازاماتتارعا قاي دىنگە كىرۋىنە, قانداي دىندە بولۋىنا ەركىندىك بەرىلگەن. وسىعان وراي, ەلىمىزدىڭ جارقىن بولاشاعىن قالاۋشى جاس ۇرپاقتارىمىزدىڭ ساناسىن ۋلاپ جاتقان جات اعىمداردىڭ ءمان-ماعىناسىن, اسەر ەتۋ جولدارى مەن تيگىزەر زياندارى دا از ەمەس. قازىرگى كەزدە جاستار مۇنداي ءدىني اعىمداردان وتە ساق بولۋى كەرەك. سەبەبى مۇنداي دىندەرگە كىرگەن ادام قايتادان شىعۋى وتە قيىن. ويتكەنى وزدەرىنە تاۋەلدى ەتىپ, ادام ساناسىن تەرەڭىنەن ۋلايدى.
ءداستۇرلى دىنىمىزبەن مۇلدەم ۇيلەسپەيتىن كەيبىر سان الۋان پىكىرلەر مەن ۇستانىمداردىڭ سالدارىنان تۋىندايتىن ءتۇرلى كەلەڭسىز ماسەلەلەر الاڭداتادى.
بۇگىندە اسىل دىنىمىزبەن مۇلدەم جاناسپايتىن جات اعىمدار جەتەگىندە كەتكەن قانشاما قانداستارىمىز وتباسى مۇشەلەرىنەن, ءۇي-مەنشىكتەرىنەن ايىرىلىپ, ءتۇرلى پسيحيكالىق اۋرۋلارعا شالدىعىپ, ءوز-وزىنە قول سالىپ, بالالارىنا ءتيىستى مەديتسينالىق ەكپە ەكتىرۋدەن باس تارتىپ, مەكتەپتەگى ساباقتارىن تاستاپ, مەكتەپ جاسىنداعى ۇل-قىزداردىڭ مۋزىكا تىڭداۋىنا قارسىلىق ءبىلدىرىپ, مەملەكەتتىك ءانۇراندى تىڭداۋدى جانە تۋعا قۇرمەت كورسەتۋدى حارام دەپ جاتقاندارىن دا جوققا شىعارۋعا بولمايدى.
سوڭعى ۋاقىتتا كەيبىر وتباسىلاردا اكەسى ءبىر ءدىندى, بالاسى ءبىر ءدىندى, اناسى ءبىر ءدىندى ۇستاناتىن حالگە كەلدىك. وسىنداي وتباسىلاردا كيكىلجىڭ تۋاتىن بولسا, اركىم ءوز جاقتاستارىن ماسەلەگە ارالاستىرىپ, ارتى بىتپەس جانجالعا ۇلاسىپ كەتۋى مۇمكىن. قوعامعا ىرىتكى سالاتىن ءداستۇرلى ەمەس, تەرىس پيعىلداعى, دەسترۋكتيۆتىك ءدىني اعىمداردان ساقتانۋدىڭ جولدارىن جاستاردىڭ ساناسىنا ۇعىندىرۋ قاجەت.
بىرىنشىدەن, مەملەكەتتىڭ ىشكى قاۋىپسىزدىگىنە زيان تيگىزەتىنىن ءبىلۋى كەرەك. قايسى ءبىر سەكتانى الاتىن بولساق, ەشبىرى قازاقتىڭ مۇڭىن مۇڭداپ, كۇيىن كۇيتتەۋ ءۇشىن كەلمەگەنى انىق. ءتۇرلى سەكتانىڭ جەتەگىنە كەتۋ ارقىلى وتباسىن ويرانداتىپ, قوعامدى شۋلاتىپ, تىڭشىلىق, ەكسترەميستىك, تەررورلىق ءىس-ارەكەت جاساپ, مەملەكەتتىڭ ىشكى قاۋىپسىزدىگىنە وراسان زيانىن تيگىزۋى مۇمكىن.
دامىعان نەمەسە دامۋ ۇستىندەگى تىنىش جاتقان ءبىر ەلدى توقىراۋعا جىبەرۋدىڭ ءبىر ءتاسىلى – ءتۇرلى ءدىني اعىمدار ارقىلى قوعام ىشىندە ىرىتكى تۋدىرۋ. ماسەلەن, يسلام الەمىنىڭ تاريحىنا قاراساق, دۇشپاندارى مايداندا جەڭە الماعان سوڭ مۇسىلمانداردى السىرەتۋ ءۇشىن ءتۇرلى تەرىس اعىمداردى قولدان جاساپ, مۇسىلمان جاماعاتىن ءبىر-بىرىمەن ارازداتىپ, ىنتىماق پەن بىرلىكتى ىدىراتىپ, مەملەكەتتى السىرەتكەن.
ەڭ دۇرىسى, جاستارىمىز ءوزىمىزدىڭ ءداستۇلى يسلام دىنىندەگى شاريعات بويىنشا جۇرسە ەشقاشان اداسپايدى, تەرىس جولعا تۇسپەيدى.
بولاشاق – جاستاردىڭ قولىندا. جاستارىمىزدى يماندىلىققا, اتا-بابالارىمىزدىڭ عاسىرلار بويى ۇستانىپ كەلگەن اسىل ءدىنىمىز يسلامعا باۋلىساق, ءتۇرلى جات اعىمداردىڭ جەتەگىندە كەتپەيتىن بولادى. سونىمەن قاتار يماندى جاس وتانىن, ەلىن, جەرىن ءسۇيەتىن, سالت-ءداستۇرىن, ءتىلىن, مادەنيەتىن بەرىك ۇستايتىن بولادى.
پايعامبارىمىز مۇحاممەد (س.ع.س.): «وتاندى ءسۇيۋ – يماننان» دەگەن. ماڭگىلىك ەلدىڭ تىرەگى – قۇندىلىقتارىندا. سول قۇندىلىقتاردىڭ ءبىرى – ءداستۇرلى ءدىنىمىز.
ءدىننىڭ ادامزات تاريحىندا الاتىن ورنى ەرەكشە. ءدىن – قوعامنىڭ رۋحاني ءومىرىنىڭ ماڭىزدى سالاسى. بۇل ماندە ءدىن قاي حالىقتىڭ بولماسىن مادەنيەتىنىڭ رۋحاني نەگىزى ەكەنىن ەسكەرۋىمىز كەرەك.
«اعاش ءتۇزۋ ءوسۋ ءۇشىن وعان كوشەت كەزىندە كومەكتەسۋگە بولادى, ال ۇلكەن اعاش بولعاندا, ونى تۇزەتە المايسىڭ» دەپ دانا حالقىمىز بەكەر ايتپاعان. جاستايىنان بويىنا ىزگىلىك, يماندىلىق, وتانسۇيگىشتىك, كىشىپەيىلدىلىك, ادالدىق سەكىلدى قاسيەتتەردى ءسىڭىرۋ مەن تاربيەلەۋدە وتباسى ماڭىزدى ءرول اتقارادى. «ۇيادا نە كورسەڭ, ۇشقاندا سونى ىلەرسىڭ» دەگەندەي, بالانى بالاباقشادان باستاپ تۇلعا رەتىندە قالىپتاستىرۋعا, مەكتەپ قابىرعاسىندا ءتىلىمىزدى, مادەنيەتىمىزدى قاستەرلەۋگە, جوعارى وقۋ ورىندارىندا ۇلتتىق قۇندىلىقتارىمىزدى دارىپتەۋگە ۇيرەتۋىمىز قاجەت. تەك سوندا عانا وسىنداي تەرىس پيعىلدى ءدىني اعىمدارعا بوگەت قويا الامىز. ءداستۇرلى دىندەردىڭ قۇندىلىقتارى مەن قاسيەتىن ءتۇسىندىرۋ جانە ءدىني سەنىمدەردى ناسيحاتتاۋ ارقىلى تەرىس پيعىلدى ءدىني اعىمداردان, ءدىني تەرروريزم مەن ەكسترەميزمنەن ساقتاي الامىز. جاس ۇرپاقتىڭ ساناسىنا جانە قوعامعا ىرىتكى سالاتىن ءداستۇرلى ەمەس, تەرىس پيعىلداعى, دەسترۋكتيۆتىك ءدىني اعىمداردان ساقتانۋدىڭ جولدارىن جاستاردىڭ ساناسىنا ۇعىندىرۋ قاجەت.
