«استانا» فۋتبول كلۋبى ەۋروپا ليگاسىنىڭ ءۇشىنشى ىرىكتەۋ كەزەڭىنە ءوتتى. ءبىزدىڭ فۋتبولشىلار ءوز الاڭىمىزدا وتكەن العاشقى ماتچتا تەل-اۆيۆ قالاسىنىڭ «حاپوەل» كومانداسىنا جاۋاپسىز ءۇش دوپ سوعىپ, قارىمتا ويىنعا سەنىمدى اتتانعانى تۋرالى بۇعان دەيىن ايتقانبىز. ەندى ءۇمىتىمىز اقتالىپ وتىر.
لارناكاداعى «انتونيس پاپادوپۋلوس» ستاديونىندا وتكەن كەزدەسۋدە ەلوردالىق كوماندا الاڭ يەلەرى بولىپ سانالاتىن «حاپوەل» كلۋبىنىڭ فۋتبولشىلارىنان 1:0 ۇتىلىپ قالسا دا, العاشقى ويىننىڭ قورىتىندىسىن قوسا ەسەپتەگەندە 3:1 ەسەبىمەن كەلەسى كەزەڭگە ءوتتى.
ءبىرىنشى تايمدا گول سوعا الماعان قارسىلاستار ويىننىڭ ەكىنشى بولىمىندە دە اسا بەلسەنە قويمادى. دەگەنمەن 58-مينۋتتا لۋكاس اففيني تورەشى بەلگىلەگەن 11 مەترلىكتەن ءمۇلت كەتپەي, يزرايلدىكتەردى العا شىعاردى. وسىدان كەيىن كەزەك-كەزەك شابۋىلداردان ەش ناتيجە شىقپاي, 90 مينۋت بىتكەنشە ەسەپ وزگەرىسسىز قالدى.
كەيىن بەلگىلى بولعانداي, «استانانىڭ» كەلەسى قارسىلاسى – سولتۇستىك يرلانديانىڭ بەلفاست قالاسىنا تيەسىلى «لينفيلد» كومانداسىن جولدا قالدىرعان (2:0, 0:1) شۆەتسيالىق «ايك».
«ايك» رەسمي تۇردە ستوكگولم قالاسىندا سوناۋ 19 عاسىردىڭ اياق جاعىندا, ياعني 1891 جىلى قۇرىلعان كلۋب بولىپ سانالادى. قازىرگى ۋاقىتتا ولار شۆەتسيانىڭ ەڭ مىقتى ۇجىمدارىنىڭ ءبىرى ەكەنى داۋسىز. وسىعان دەيىن ۋەفا اياسىنداعى تۋرنيرلەردىڭ توپتىق كەزەڭىنە بىرنەشە رەت وتكەن كوماندانىڭ ساپىندا كوستا-ريكا قۇراماسىنىڭ ويىنشىسى سەلسو بورحەس ونەر كورسەتەدى.
سونىمەن قاتار, قازاقستاندىق باسقا دا كلۋبتار ەۋروتۋرنير جولىندا قارىمتا كەزدەسۋلەرىن وتكىزدى. العاشقى ويىندى سىرت الاڭدا 1:0 ەسەبىمەن ءوز پايداسىنا شەشكەن «اقتوبە» تبليسي قالاسىنان كەلگەن «دينامونى» تاس-تالقان ەتسە, ليتۆادا تەڭ ويناعان قاراعاندىلىق «شاحتەر» دا كلايپەدا قالاسىنان كەلگەن «اتالانتاستى» ايامادى. قازاقستاندىق قوس كوماندا وسىلايشا قارسىلاستارىنا جاۋاپسىز ءۇش گول سوعىپ, ۋەفا چەمپيوندار ليگاسىنىڭ جانە ەۋروپا ليگاسىنىڭ ءۇشىنشى كەزەڭىنە ءوتىپ وتىر. تەك الماتىلىق «قايرات» قانا دانيالىق «ەسبەرگ» كومانداسىنا جول بەرىپ, جارىستى جارتى جولدان اياقتادى. جالپى ەسەپ – 1:2. بىراق سوڭعى جىلدارى قازاقستان فۋتبولىندا ىلگەرىلەۋ بار ەكەنىن بايقاپ تا, بايقاتىپ تا ءجۇرمىز. وتاندىق كلۋبتاردىڭ بيىلعى قارقىنىنا قاراپ وتىرىپ, بۇلاردىڭ ءبارىن قاراعاندىلىق «شاحتەردىڭ» بىلتىرعى جەتىستىگىنىڭ زاڭدى جالعاسى دەپ تۇسىنۋگە بولاتىنداي.
نۇريسلام قۇسپانعالي
