ماۋسىمنىڭ 14-ىندە, رامازان ايىنىڭ سوڭعى كۇنىنىڭ كەشىندە ماسكەۋدەگى اتاقتى «لۋجنيكي» ستاديونىندا فۋتبولدان الەمنىڭ 21-ءشى چەمپيوناتى سورەدەن شىقتى.
ءتۋرنيردىڭ ءبىرىنشى ماتچى وينالاردان ءبىر جارىم ساعات بۇرىن يسپان قاقپاشىسى يكەر كاسيلياس پەن رەسەيلىك مودەل ناتاليا ۆوديانوۆا الەم چەمپيوناتىنىڭ باس بايگەسى – جەڭىمپازعا بەرىلەتىن كۋبوكتى تانىستىردى. سول ساتتە ستاديونداعى ديكتور رەسەي قۇراماسىنىڭ قۇرامىن اتاپ شىعىپ, جانكۇيەرلەردى كاراوكەدەن ءان سالۋعا شاقىردى. سول-اق ەكەن, ورىستىڭ حالىق ءانى – «كالينكا» قالىقتاپ الا جونەلدى. ارادا بەس مينۋت وتكەسىن ديكتور ساۋد ارابياسى ۇلتتىق كومانداسىنىڭ ستارتتىق قۇرامدا الاڭعا شىعاتىن ويىنشىلارىن تانىستىرىپ بولىپ, تاعى ءبىر اۋەندى قوسىلىپ ايتۋعا ۇندەدى. بۇل جولى ارابتىڭ حالىقتىق ءانى شىرقالدى.
وسى ساتتەردە فۋتبول الاڭىنىڭ ءجۇزى دوڭگەلەنگەن دوپتىڭ قالپىنا كەلتىرىلدى. ول چايكوۆسكيدىڭ اۋەنىن اۋەلەتىپ اكەتتى. كورەرمەندەر الدىنا برازيليا قۇراماسى ساپىندا الەمنىڭ ەكى دۇركىن چەمپيونى اتانعان اتاقتى فۋتبولشى رونالدو, بريتانيالىق ءانشى روببي ۋيليامس, رەسەيلىك وپەرا ءانشىسى ايدا گاريفۋللينا شىقتى. اعىلشىن ءسوليسى بيشىلەر مەن فريستايلەر ورتاسىندا Let Me Entertain You ءانىن سىزىلتتى. سوسىن وتتى قۇستىڭ ورتاسىنان رەسەيلىك ءانشى پايدا بولا كەتتى. ەكى ءانشى كەنەت دۋەت قۇردى. سول كەزدە الاڭعا 32 ءانشى كەلىپ, چەمپيوناتقا قاتىسۋشى ەلدەردى بەينەلەدى. ال جانكۇيەرلەرگە كورسەتىلگەن جاپىراقشادا Welcome, ياعني «قوش كەلدىڭىزدەر!» دەگەن ءبىر اۋىز ءسوز جازىلىپ تۇردى.
رەسەيدىڭ دونداعى روستوۆقا بەلگىلەنگەن الەمدىك ەلشىسى ۆيكتوريا لوپىرەۆا ءتۋرنيردىڭ رەسمي دوبىن الاڭعا الىپ كەلدى. وعان رونالدو مەن چەمپيوناتتىڭ بويتۇمارى – زابياكا سيمۆولدىق سوققى جاسادى.
چەمپيوناتتىڭ اشىلۋ سالتاناتىندا رەسەي پرەزيدەنتى ۆلاديمير پۋتين ءسوز سويلەدى. «بارلىق كوماندالارعا – تابىس, ال جانكۇيەرلەرگە ۇمىتىلماس اسەرلەر تىلەيمىن» دەدى ول.
سالتاناتقا فيفا-نىڭ پرەزيدەنتى دجانني ينفانتينو قاتىستى.
سەرىك ءپىرنازار
