بيىل كوپبالالى وتباسىلاردان شىققان, جەتىم, اتا-انا قامقورلىعىنسىز قالعان بالالاردىڭ, بالالار ۇيىنەن تۇلەپ ۇشقان ازاماتتاردىڭ جوعارى وقۋ ورىندارىندا وقۋىنا بولىنەتىن قارجى كوبەيدى.
«بۇرىن بۇعان كۇنكورىس دەڭگەيىنىڭ ءۇش ەڭ تومەنگى شەگى قاراستىرىلسا, قازىر تورتكە دەيىن كوبەيدى. سوعان سايكەس, جوعارى ءبىلىم الۋعا نيەتتى وسىنداي بالالاردىڭ سانىن كوبەيتۋدى جوسپارلاپ وتىرمىز. بۇگىنگى كۇندە قۇجاتتاردى قابىلداپ جاتىرمىز. ولاردى مەكتەپتەردىڭ 44 تۇلەگى تاپسىرىپ ۇلگەردى. سونىڭ ىشىندە ءبىر ۇمىتكەر – بالا كەزىنەن مۇگەدەك, 43 تۇلەك كوپبالالى وتباسىلاردان شىققان. كەلىپ تۇسكەن ماتەريالداردى ءتيىستى كوميسسيا 25 تامىزعا دەيىن قارايدى» دەدى س. نۇرعوجينا.
وسى جىلى اتاۋلى الەۋمەتتىك كومەكتى تاعايىنداۋ فورماتى وزگەرگەنىن ايتقان ول ءتيىستى كومەك 5669 وتباسىنا بەرىلگەنىن جەتكىزدى. ونىڭ ايتۋىنشا, وتكەن جىلدىڭ سايكەس كەزەڭىندە بۇل كومەكتى
994 وتباسى عانا العان. سونداي-اق ۇيدە وقيتىن مۇمكىندىگى شەكتەۋلى بالالارعا كورسەتىلەتىن كومەك كوبەيىپ, 25250 تەڭگەگە جەتتى. ياعني, بۇرىن 6 اەك بولسا, قازىر 10 اەك بولدى. بۇعان قوسا, كوپبالالى وتباسىلار قاتتى وتىنمەن قامتىلاتىنداردىڭ ساناتىنا قوسىلدى. وعان بولىنەتىن قارجى دا 8 اەك-تەن 16 اەك-كە كوبەيدى. اقشاعا شاققاندا بۇل-40400 تەڭگە.
«كوپبالالى جانە مۇگەدەك بالا تاربيەلەپ وتىرعان وتباسىلارعا ءبىر ميلليون تەڭگەگە دەيىنگى قارجىنى قۇرايتىن تۇرعىن ءۇي سەرتيفيكاتتارىن بەرۋدى جوسپارلاپ وتىرمىز. وعان جۇزەگە اسىرىلۋى باستالعان «باقىتتى وتباسى» باعدارلاماسىنا قۇجاتتاردى تاپسىرعان وتباسىلار قاتىسا الادى. قازىر اتاۋلى الەۋمەتتىك كومەك الاتىن كوپبالالى انالارعا تەگىن ستوماتولوگيالىق قىزمەت كورسەتۋگە كونكۋرس ءجۇرىپ جاتىر» دەدى باسقارما باسشىسى.
ەڭبەك, الەۋمەتتىك قورعاۋ جانە كوشى-قون كوميتەتىنىڭ نۇر-سۇلتان قالاسى بويىنشا دەپارتامەنتى مالىمەتىنشە, قازىرگى كەزدە ەلوردادا 25719 مۇمكىندىگى شەكتەۋلى ازامات تۇرادى. سونىڭ 5316-ى – ەرەكشە قاجەتتىلىگى بار بالالار. 9 مىڭ مۇگەدەككە ساۋىقتىرۋ قىزمەتى كورسەتىلدى. مۇگەدەكتەر ارباسىمەن قامتۋ سياقتى جۇمىستار دا جۇرگىزىلىپ جاتىر. ينۆاتاكسي سانى دا 23-تەن 30 كولىككە كوبەيتىلدى. جىل سايىن وسى قىزمەت 3 مىڭنان استام ادامعا, سونىڭ ىشىندە ءبىر مىڭنان اسا بالاعا كورسەتىلەدى.
تاۋلىك بويعى جانە كۇندىزگى ارنايى الەۋمەتتىك كومەك قىزمەتىن الۋشىلاردىڭ سانى دا 2015 جىلمەن سالىستىرعاندا 17,6 پايىزعا, سونىڭ ىشىندە ۇكىمەتتىك ەمەس سەكتوردا 25 پايىزعا ءوستى. اتالمىش قىزمەتتى 1300 ادام كورسەتەدى. «شاراپات», «نۇرلى جۇرەك», «قامقور» الەۋمەتتىك قىزمەت كورسەتۋ ورتالىقتارى, قالا اكىمدىگىنىڭ الەۋمەتتىك قىزمەت كورسەتۋ ورتالىعى ادامعا تۋعانىنان قارتايعانشا قىزمەت كورسەتەدى. كەيىنگى ورتالىق اشىلعاننان ونىڭ قىزمەتىنە جۇگىنەتىن ادامدار سانى 560-تان 1196 ادامعا, ياعني ەكى ەسەدەن استامعا كوبەيدى.
«قابىلدانعان قىزمەت كورسەتۋ مودەلى ءوز ناتيجەسىن بەرىپ كەلە جاتىر. ماتەريالدىق-تەحنيكالىق بازا جاقسارىپ, الەۋمەتتىك قىزمەتكەرلەردىڭ بىلىكتىلىگى ارتتى. سونىڭ جارقىن مىسالى – سال اۋرۋىنا شالدىققان 24 بالا اياققا تۇرىپ, العاشقى قادامدارىن جاسادى. بۇدان بۇرىن بۇل مۇمكىن ەمەس ەدى» دەگەن س. نۇرعوجينا الەۋمەتتىك قىزمەت كورسەتۋ ورتالىقتارىنىڭ جاعدايى مەن ولاردا جاسالىپ جاتقان ىستەردەن حابار بەردى.
ونىڭ ايتۋىنشا, نۇر-سۇلتان قالاسى حالىقتى جۇمىسپەن قامتۋ جاعىنان ەلدە كوش باسىندا كەلەدى. مەملەكەتتىك سالالىق باعدارلامالاردى جۇزەگە اسىرۋ اياسىندا جانە جەكە باستامالار ارقاسىندا 1111 جاڭا تۇراقتى جۇمىس ورنى قۇرىلدى. سونىڭ ىشىندە, شاعىن بيزنەس سالاسىندا 10981 ورىن اشىلدى. وسى سالادا جىلدىڭ اياعىنا دەيىن 19800 جۇمىس ورنىن قۇرۋ جوسپارلانىپ وتىر.
