نۇر-سۇلتان قالاسىنىڭ ءماسليحاتىندا ەلوردانىڭ 2022-2024 جىلدارعا ارنالعان بيۋدجەتى جوباسىن تالقىلاۋ جالعاسىپ جاتىر. قالالىق ەكونوميكا جانە بيۋدجەتتىك جوسپارلاۋ باسقارماسىنىڭ باسشىسى قايسار ماڭقاراەۆتىڭ مالىمدەۋىنشە, الداعى ءۇش جىلدىق بيۋدجەتتىڭ شىعىس بولىگى 1 ترلن 208 ملرد تەڭگەنى قۇراپ وتىر. وسى جولى ءماسليحاتتىڭ الەۋمەتتىك-مادەني دامۋ ماسەلەلەرى جونىندەگى تۇراقتى كوميسسيانىڭ وتىرىسىندا الەۋمەتتىك سالاعا ءبولۋ جوسپارلانعان قارجى تۋرالى باياندالدى.
دەنە شىنىقتىرۋ جانە سپورت باسقارماسىنا كەلەر ءۇش جىلعا 30 ملرد 180 ملن تەڭگە بولىنبەك. سونىڭ ىشىندە 2022 جىلى 7 ملرد 960 ملن تەڭگە قاراستىرىلعان. بۇل قارجى سپورت سالاسىنداعى مەملەكەتتىك ساياساتتى جۇرگىزۋگە, جەرگىلىكتى دەڭگەيدە سپورتتىق شارالاردى وتكىزۋگە, ءارتۇرلى سپورت تۇرلەرى بويىنشا ەل قۇراماسىنا كىرەتىن سپورتشىلاردى رەسپۋبليكالىق جانە حالىقارالىق جارىستارعا دايارلاۋعا, ت.ب. جۇمىستارعا جۇمسالماق.
قوعامدىق دەنساۋلىق ساقتاۋ باسقارماسىنا 2022-2024 جىلدارعا 18 ملرد 340 ملن تەڭگە قاراستىرىلىپ وتىر. وسى قاراجات دارىگەر مامانداردىڭ بىلىكتىلىگىن ارتتىرۋعا, كادرلاردى قايتا دايارلاۋعا, انا مەن بالانى قورعاۋ قىزمەتتەرىنە, ۆاكتسينالار مەن باسقا دا مەديتسينالىق پرەپاراتتاردى ساتىپ الىپ, ساقتاۋعا, باسقا دا ماڭىزدى ىستەرگە باعىتتالماق.
جۇمىسپەن قامتۋ جانە الەۋمەتتىك قورعاۋ باسقارماسىنىڭ الداعى ءۇش جىلدىق بيۋدجەتى الدىن الا جوسپار بويىنشا 42 ملرد 265 ملن تەڭگەنى قۇراپ وتىر. ونىڭ ىشىنە قارتتار مەن مۇمكىندىگى شەكتەۋلى جاندارعا مەديتسينالىق-الەۋمەتتىك مەكەمەلەر مەن ۇيىمداردا ارنايى الەۋمەتتىك قىزمەت كورسەتۋ, حالىقتى جۇمىسپەن قامتۋ, اتاۋلى الەۋمەتتىك كومەك تولەۋ, تۇرعىن ءۇي كومەگىن بەرۋ سياقتى وسى سالاداعى كوپتەگەن جۇمىستار كىرىپ وتىر.
ءبىلىم باسقارماسىنا 2022-2024 جىلدارعا 316 ملرد 664 ملن تەڭگە قاراستىرىلعان. مادەنيەت باسقارماسىنا الداعى ءۇش جىلعا 21 ملرد 554,9 ملن تەڭگە بولىنبەك. سونىڭ ىشىندە 2022 جىلى تەاتر جانە مۋزىكا ونەرىن قولداۋعا 3 ملرد 30 ملن تەڭگە, كەلەسى جىلعا كىتاپحانالار قىزمەتىنە 216,2 ملن تەڭگە, الەۋمەتتىك ماڭىزدى جانە مادەني شارالاردى وتكىزۋگە 1 ملرد 797 ملن تەڭگە قاراستىرىلىپ وتىر.
تىلدەردى دامىتۋ جانە ارحيۆ ءىسى باسقارماسىنا الداعى ءۇش جىلعا 1 ملرد 728 ملن تەڭگە ءبولۋ جوسپارلانعان. وسى قارجىدان 2022 جىلى مەملەكەتتىك ءتىل مەن قازاقستان حالقىنىڭ باسقا دا تىلدەرىن دامىتۋعا 254 ملن تەڭگە قاراستىرىلعان.
وسىنىڭ ءبارىن ايتقان ەكونوميكا جانە بيۋدجەتتىك جوسپارلاۋ باسقارماسىنىڭ باسشىسى قايسار ماڭقاراەۆتىڭ نەگىزگى بايانداماسىنان كەيىن قوسىمشا بايانداماشىلار – ءتيىستى باسقارمالاردىڭ باسشىلارى ءسوز الدى. قالالىق ءماسليحات دەپۋتاتتارى ولارعا سۇراقتاردى قويىپ, بيۋدجەتكە پىكىرلەرىن جەتكىزدى. الداعى ءۇش جىلدىق بيۋدجەتتى تالقىلاۋ بۇگىن دە جالعاسادى. وتىرىستا اۋدانداردىڭ اكىمدىكتەرى مەن باسقا دا باسقارمالاردىڭ بيۋدجەتى قارالادى.
