پرەمەر-مينيستر اسقار مامين ەلدىڭ الەۋمەتتىك-ەكونوميكالىق دامۋى بويىنشا مينيسترلىكتەر مەن اكىمدىكتەرگە تاپسىرمالار بەردى. ونىڭ ايتۋىنشا, 6 نەگىزگى كورسەتكىش بويىنشا 9 وڭىردە ءوسىم بايقالىپ وتىر.
ولار – اقمولا, اقتوبە, اتىراۋ, شىعىس قازاقستان, قوستاناي, ماڭعىستاۋ, پاۆلودار, تۇركىستان وبلىستارى مەن الماتى قالاسى. 5 كورسەتكىش بويىنشا ەكى ءوڭىردىڭ سەرپىنى جاقسى. بۇل – قىزىلوردا مەن سولتۇستىك قازاقستان وبلىستارى. ال قاراعاندى, باتىس قازاقستان وبلىستارىنىڭ كورسەتكىشتەرى ەڭ تومەن.
«جالپى ازىق-تۇلىك ينفلياتسياسىنىڭ ءوسۋىن تەجەي الدىق. وسى باعىتتا بەلسەندى جۇمىستى جالعاستىرۋ قاجەت. مينيسترلىكتەر مەن اكىمدىكتەرگە وتاندىق ءوندىرىستى بارىنشا قولداۋدى, ينۆەستيتسيالار تارتۋدى, ەكسپورتتى دامىتۋ, حالىقتىڭ جۇمىسپەن قامتىلۋىن ساقتاۋدى جانە تۇراقتى جۇمىس ورىندارىن قۇرۋدى تاپسىرامىن. بيۋدجەت قاراجاتىن ۋاقىتىلى يگەرۋ بويىنشا دا شارا قابىلداڭىزدار» دەدى اسقار مامين.
ەلىمىزدىڭ ەكونوميكاسى سەنىمدى ءوسۋ قارقىنىن جالعاستىرۋدا. 10 ايدىڭ قورىتىندىسى بويىنشا جالپى ىشكى ءونىمنىڭ ءوسۋى 3,5 پايىزعا دەيىن جەدەلدەدى. ناقتى سەكتوردا ءوندىرىستىڭ ورنىقتى ءوسۋ قارقىنى بايقالىپ وتىر.
«ماسەلەن, وڭدەۋ ونەركاسىبىنىڭ ءوندىرىس كولەمى 5,3 پايىزعا ءوستى. ونىڭ ىشىندە ماشينا جاساۋدا 19,5 پايىزعا, سونىڭ ىشىندە اۆتوموبيل جاساۋدا 23,4, لوكوموتيۆتەر مەن ۆاگوندار وندىرىسىندە 59, قۇرىلىس ماتەريالدارىندا 9,3, فارماتسەۆتيكادا 33,6, پلاستماسسا بۇيىمدارىنىڭ وندىرىسىندە 36,5, كيىم وندىرىسىندە 11,4 پايىزعا, جيھاز وندىرىسىندە 11,8, دايىن مەتالل بۇيىمدار وندىرىسىندە 16,4 پايىزعا ءوسىم بايقالىپ وتىر» دەدى ۇكىمەت باسشىسى.
كارانتيندىك شارالاردى كەزەڭ-كەزەڭىمەن جەڭىلدەتۋدىڭ ارقاسىندا قىزمەت كورسەتۋ سەكتورىنداعى ىسكەرلىك بەلسەندىلىك 3,4 پايىزعا دەيىن قالپىنا كەلگەن, بۇل بايلانىس قىزمەتتەرى مەن ساۋدا قارقىنىنىڭ جوعارى بولۋىنا بايلانىستى.
«ينۆەستيتسيالاردىڭ ءوسۋ قارقىنى بىرتىندەپ قالپىنا كەلۋدە – ءوسىم 2,5 پايىزعا, ال تاۋ-كەن ءوندىرۋدى ەسەپتەمەگەندە 14 پايىز ءوسىپ وتىر. نەگىزگى كاپيتالعا ينۆەستيتسيالاردىڭ جوعارى ءوسىمى قۇرىلىستا, وڭدەۋ ونەركاسىبىندە, اۋىل شارۋاشىلىعىندا, ساۋدادا, جىلجىمايتىن مۇلىكپەن وپەراتسيالاردا, قارجى قىزمەتىندە بايقالىپ وتىر. قاڭتار-قازان ايلارىنىڭ قورىتىندىسى بويىنشا الماتى, جامبىل وبلىستارى مەن نۇر-سۇلتان جانە شىمكەنت قالالارىندا بارلىق نەگىزگى ماكروكورسەتكىشتەر وسكەن» دەپ اتاپ ءوتتى ا.مامين.
