ەلوردا حالقىنىڭ سانى جىلدان-جىلعا ءوسىپ كەلەدى. سايكەسىنشە الەۋمەتتىك وسال توپتاعى ازاماتتارىن قامتاماسىز ەتىپ, الەۋمەتتىك قولداۋ باعىتىندا جاسالاتىن جەڭىلدىكتەر دە كوبەيدى. بۇعان بيۋدجەتتەن اجەپتاۋىر قاراجات قاراستىرىلعان.
بيىلعى جىلى نۇر-سۇلتان قالاسىندا الەۋمەتتىك قولداۋ اياسىندا 159 مىڭ ادام قامتىلدى. ونىڭ ىشىندە 25 مىڭى – مۇمكىندىگى شەكتەۋلى جاندار, 80 مىڭى – زەينەتكەرلەر, كوپبالالى جانە از قامتىلعان وتباسىلار دا بار.
نۇر-سۇلتان قالاسىنىڭ جۇمىسپەن قامتۋ جانە حالىقتى الەۋمەتتىك قورعاۋ باسقارماسىنىڭ باسشىسى ساۋلە نۇرعوجينانىڭ ايتۋىنشا ەلوردا ازاماتتارىنىڭ الەۋمەتتىك جاعدايىنا ەرەكشە نازار اۋدارىلادى. سونىڭ ىشىندە الەۋمەتتىك وسال توپتارعا جاتاتىن ازاماتتار تەگىن جولاقىمەن قامتاماسىز ەتىلگەن. بيىل اتاۋلى الەۋمەتتىك كومەكتىڭ جاڭا فورماتى ەنگىزىلدى. از قامتىلعان وتباسىلار مەملەكەتتەن الەۋمەتتىك كومەك الادى. مۇمكىندىگى شەكتەۋلى ادامدار ءۇشىن قايتا قالپىنا كەلتىرۋ, ياعني رەابيليتاتسيالىق ەم تەگىن جۇرگىزىلەدى. نۇر-سۇلتان قالاسىنىڭ جۇمىسپەن قامتۋ باسقارماسى ارقىلى مۇمكىندىگى شەكتەۋلى, مۇگەدەك بالالارعا قىزمەت كورسەتۋ قاراستىرىلعان, اسىرەسە, ۇكىمەتتىك ەمەس ۇيىمدار «وردا», «اسىل ميراس», ت. ب. ومىردە كەزدەسەتىن ءارتۇرلى قيىن جاعدايلارعا تاپ بولعان ادامدارعا قول ۇشىن سوزىپ, كومەك كورسەتەدى. سونداي-اق تامىز ايىندا نۇر-سۇلتاندا «جانۇيا» وتباسىلىق ورتالىعى اشىلدى.
«جانۇيا» ورتالىعى – مۇمكىندىكتەر الاڭى
ورتالىقتىڭ «Open space» الاڭىندا ەلوردالىقتار جۇمىس تابۋ, بيزنەس اشۋ, ءوزىن تولعاندىرعان الەۋمەتتىك ماسەلە بويىنشا اقپارات پەن كەڭەس الادى. 12 مەملەكەتتىك جانە كۆازيمەملەكەتتىك سەكتور جۇمىس ىستەيتىن ورتالىقتىڭ ماماندارى ااك الۋ, كاسىپتىك وقۋدان ءوتۋ, جۇمىسقا ورنالاستىرۋ, جاپپاي وقىتۋ باعدارلاماسىنا قاتىسۋ, بالاباقشاعا كەزەككە قويۋ, قامقورشىلىقتى ورناتۋ, جاردەماقىلاردىڭ بارلىق تۇرلەرىن جانە ت. ب. الۋ ماسەلەلەرى بويىنشا قىزمەت كورسەتەدى. «جانۇيا» ورتالىعىنىڭ باستامالارىن جوعارى باعالاعان مەملەكەت باسشىسى قاسىم-جومارت توقاەۆ اتالعان مەكەمەنىڭ تاجىريبەسىن ەلىمىزدىڭ بارلىق ايماقتارىندا ىسكە اسىرۋ كەرەك ەكەنىن ايتتى. اشىلعان كۇننەن باستاپ ورتالىققا 7130 ادام جۇگىنگەن, 15327 ءوتىنىشىن 11669-نا جۇيەلى كەڭەس بەرىلدى. ونىڭ ىشىندە 3556 ماسەلە ءوز شەشىمىن تاپتى.
قولداۋدىڭ تاعى ءبىر ءتيىمدى باعىتى – جالپىعا بىردەي ءبىلىم بەرۋ قورى ارقىلى «مەكتەپكە جول» ناۋقانى اياسىندا الەۋمەتتىك كومەك كورسەتۋ بولىپ تابىلادى. جالپىعا مىندەتتى وقۋ باعدارلاماسىنىڭ ارقاسىندا وقۋشىلارعا مەكتەپ فورماسىن الۋعا ارقايسىسى 30 مىڭ تەڭگەدەن 12,8 مىڭ سەرتيفيكات بەرىلدى.
ءۇش ەسەگە ۇلعايتىلادى
مەملەكەت تاراپىنان مۇقتاجدارعا تۇرعىن ءۇي كومەگىن كورسەتۋ بويىنشا بەلسەندى شارالار قابىلدانۋدا. «بەرەكەلى باسپانا» باعدارلاماسى اياسىندا كەزەكتە تۇرعاندارعا 298 پاتەر بەرىلدى. ولاردىڭ اراسىندا 150 كوپبالالى وتباسى بار. «باقىتتى وتباسى» تۇرعىن ءۇي باعدارلاماسى شەڭبەرىندە 414 ءوتىنىم ماقۇلداندى. «نۇرلى ەرتىس» باعدارلاماسى استانالىقتار ءۇشىن ۇلكەن سۇرانىسقا يە بولىپ, جىل باسىنان بەرى ەكىباستۇزعا جالپى سانى 1161 ادام بولاتىن 222 وتباسى قونىس اۋداردى. بۇدان باسقا, «ەڭبەك» ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋ مەملەكەتتىك باعدارلاماسى بويىنشا سولتۇستىك قازاقستان وبلىسىنا 62 وتباسى كوشىرىلدى. بۇگىنگى تاڭدا وتىنىمدەردى قابىلداۋ قالا اكىمدىگىنىڭ تۇرعىن ءۇي قورىندا جالعاسۋدا. كەلەر جىلى تۇرعىن ءۇي قۇرىلىسى ءۇش ەسەگە ۇلعايتىلادى دەپ كۇتىلۋدە.
كوپبالالى انالارعا ەلوردالىق بيزنەسمەندەر دە بارىنشا قولداۋ كورسەتۋدە. شوب پەن مەتسەناتتاردىڭ كۇشىمەن 1742 وتباسى 133,1 ملن تەڭگەگە ازىق-تۇلىك كورزيناسىن, قاتتى وتىن, كيىم, اياق كيىم جانە قارجىلىق كومەك الدى. سونداي-اق ولاردىڭ تۇرعىن ۇيلەرىنە 1 004 ۋلى گاز بەن ءتۇتىننىڭ جوعارى دەڭگەيىن حابارلايتىن اۆتونومدى داتچيكتەر ورناتىلدى. مادەني ءىس-شارالارمەن 8500 كوپبالالى وتباسى قامتىلدى.
جادىرا مۇراتبەكوۆا
