جاڭا جىل قارساڭىندا شۇبار تۇرعىن ءۇي الابىنداعى قالقامان جانە ناركەسكەن كوشەلەرىنىڭ قيىلىسىندا ورنالاسقان پروبلەمالى نىساننىڭ ءبىرى «كومفورت De Luxe» تك پايدالانۋعا بەرىلدى. وسىعان بايلانىستى 3 پودەزدەن تۇراتىن تۇرعىن ءۇي كەشەنى الدىندا سالتاناتتى شارا ءوتتى. وسىناۋ قۋانىشتى كۇنى 200-دەن استام وتباسى جىلدار بويى كۇتكەن پاتەرلەرىنىڭ كىلتىن الدى.
جوسىقسىز قۇرىلىس سالۋشىلاردىڭ كىناسىنەن تۇرعىن ءۇي 2015 جىلى پروبلەمالىق دەپ تانىلىپ, 2018 جىلى نۇر-سۇلتان قالاسى اكىمدىگىنىڭ تۇرعىن ءۇي قۇرىلىسىنداعى ۇلەستىك قاتىسۋ ماسەلەلەرى جونىندەگى ۆەدومستۆوارالىق كوميسسياسىمەن «ەلوردا قۇرىلىس كومپانياسى» ۋاكىلەتتى ۇيىمىنا «نۇرلى جەر» مەملەكەتتىك باعدارلاماسى اياسىندا اياقتاۋ ۇسىنىلعان بولاتىن. وسىعان وراي, نۇر-سۇلتان قالالىق اكىمدىگى ەلورداداعى پروبلەمالىق نىسانداردىڭ قۇرىلىسىن اياقتاۋ ءۇشىن جاۋاپتى مەملەكەتتىك ورگاندار مەن ورىندالۋ مەرزىمدەرى بەلگىلەنگەن ءىس-شارالار جوسپارىن ازىرلەپ, بەكىتتى.
سالتاناتتى شارادا نۇر-سۇلتان قالاسى اكىمىنىڭ ورىنباسارى التىنبەك قايساعاليەۆ ءسوز سويلەپ, ۇلەسكەرلەردى قۇتتىقتادى. «جاڭا جىل قارساڭى سىزدەر ءۇشىن دە, ءبىز ءۇشىن دە زور قۋانىشتى بولۋدا. وسى قۋانىشپەن نۇر-سۇلتان قالاسى اكىمى التاي كولگىنوۆتىڭ اتىنان قۇتتىقتايمىن. قازىر كوپتەن ارمانداپ كۇتكەن پاتەرلەرىڭىزدىڭ كىلتىن تابىستايمىز. 200-دەن اسا وتباسىنىڭ جەتى جىل بۇرىن قۇرىلىسى باستالعان, ءتۇرلى قيىندىقتارعا تاپ بولعان باسپاناسىنا اقىرى قول جەتكىزۋى تۇڭعىش پرەزيدەنت – ەلباسى ن.نازارباەۆتىڭ, مەملەكەت باسشىسى ق.كەمەلۇلىنىڭ قولداۋىمەن, ۇكىمەت باسشىسىنىڭ قاراجات بولۋىمەن ىسكە اسىپ وتىر. قۇرىلىستىڭ بارىسىندا كوپتەگەن قيىندىق بولدى, وسى جەتىستىك مەردىگەر كومپانيا, «ەلوردا قۇرىلىس كومپانياسى», اكىمدىكپەن جانە سىزدەردىڭ قۇرىلىس كووپەراتيۆى باسشىسى, توراعاسىنىڭ ىنتىماقتاسا جۇمىس ىستەۋىنىڭ ارقاسىندا بولىپ وتىر» دەي كەلىپ, «كومفورت De Luxe» تۇرعىن ءۇي كەشەنى قۇرىلىسىنا بەلسەندى اتسالىسقان ازاماتتارعا العىس ءبىلدىردى. سالتاناتتى جاعدايدا قالا اكىمى التاي كولگىنوۆتىڭ اتىنان جەكەلەگەن ازاماتتارعا العىس حاتتار تاپسىرىلدى, ءوز كەزەگىندە ۇلەسكەرلەر دە اكىمدىككە ريزاشىلىقتارىن ءبىلدىردى.
مۇنىمەن قوسا, 2015 جىلدان بەرى پروبلەمالى نىسانعا اينالعان «ارىستان» كوپپاتەرلى تۇرعىن ءۇي كەشەنىنىڭ ا بلوگى دا قولدانىسقا بەرىلىپ, 140 وتباسىعا پاتەر كىلتى تاپسىرىلدى. نۇر-سۇلتان قالاسى اكىمىنىڭ ورىنباسارى التىنبەك قايساعاليەۆتىڭ ايتۋىنشا, بۇل نىسان قۇرىلىسىن تولىعىمەن اياقتاۋ «ەلوردا قۇرىلىس كومپانياسى» جشس-كە جۇكتەلەدى. قازىر كەشەننىڭ ينجەنەرلىك, ەلەكتر, جىلۋ جەلىلەرىن ىسكە قوسۋ بويىنشا ءتيىستى شارالار قابىلدانۋدا.
جادىرا شامۇراتوۆا
