ارىستان قالىس قالعان جوق

كەشە ەلوردا اكىمدىگىندە ارىس قالاسىن قالپىنا كەلتىرۋگە قاتىسقان نۇر-سۇلتان قالاسى شتابىنىڭ مۇشەلەرى قۇرمەتتەلدى. باس قالا باسشىسى التاي كولگىنوۆتىڭ ماراپاتىن ونىڭ ورىنباسارى نۇرلان نۇركەنوۆ تاپسىردى.– ارىس قالاسىندا ەڭ اۋقىمدى جۇمىس نۇر-سۇلتان شاھارىنا تاپسىرىلدى. ەلوردالىقتار ارىستا №9 سەكتوردا ەڭبەك ەتتى. وندا 500-دەن استام جەكە ۇيگە كۇردەلى جوندەۋ جۇرگىزىلدى. جاڭادان 160 ءۇي سالىندى. 54 كوپپاتەرلى تۇرعىن ءۇي جوندەلدى. قۇرىلىسشىلار جاڭا 3 كوپپاتەرلى ءۇيدى تۇرعىزدى. بۇعان قوسا, تۇرعىندارعا قۇجاتتاردى راسىمدەۋ, قالپىنا كەلتىرۋ بويىنشا قانشاما كومەك پەن زاڭگەرلىك كەڭەس بەردى. سول جۇمىس ءۇشىن بىزگە باستى باعانى جاڭا ۇيلەرىنە, جوندەلگەن باسپانالارىنا كىرگەن حالىق بەردى. ارىستىقتار ەلوردالىق شتابقا كوپتەگەن بەينەجولداۋ مەن حات جىبەرۋ ارقىلى العىس ايتتى. بۇل ىسكە ءبىر جۇدىرىق بولىپ جۇمىلا كىرىسكەن بۇل – بارشامىزدىڭ ەڭبەگى. جالعىز ادام تۇك تە بىتىرە الماۋشى ەدى, – دەدى ن.نۇركەنوۆ.
قالا باسشىسى التاي سەيدىرۇلى­نىڭ دا نۇر-سۇلتان قالاسى شتابىنىڭ مۇشەلەرىنە العىسى شەكسىز ەكەنىن ايتقان ورىنباسارى بۇل جۇمىس اكىمنىڭ باقىلاۋىندا بولعانىن, شتاب جەتەكشىسى رەتىندە ونىمەن كۇندە بايلانىستا بولعانىن جەتكىزدى.
– التاي سەيدىرۇلى بىرنەشە رەت ارىسقا كەلىپ, اتقارىلعان جۇمىس­تارمەن تانىستى, تۇرعىندارمەن كەزدەستى, ۇكىمەت باسشىسىمەن بىرگە قارجىلاندىرۋ ماسەلەلەرىن شەشتى. قارجى دۇرىس بولىنبەسە, ەشتەڭە بىتىرە الماس ەدىك. ارىس ءبارىمىزدى بىرىكتىردى. قايدا جۇرسەك تە, ارادا قانشا ۋاقىت وتسە دە بۇل ەشقاشان ۇمىتىلمايدى. 47-50 گرادۋس ىستىقتا, قاۋىپتى جاعدايدا تاڭنان قارا كەشكە دەيىن ەڭبەكتەندىك. وكىنىشكە قاراي, بارشامىز ۇيىمىزگە امان-ەسەن ورالا المادىق. دوسىمىز, ارىپتەسىمىز ەرمەك ­تۇيتەبەكوۆتەن قاپىدا ايىرىلدىق. بىرنەشە اپتا بۇرىن قالا اكىمى ونىڭ جۇبايىن قابىلداپ, ەرمەككە دۇنيەدەن وزعان سوڭ بەرىلگەن مەملەكەتتىك ماراپاتتى تاپسىردى. مارقۇمنىڭ ارتىندا بالا-شاعاسى قالدى. ولار كامەلەتكە تولعانشا قامقورلىق كورسەتۋ – بارشامىزدىڭ مىندەتىمىز, – دەدى ن.نۇركەنوۆ.
ءسوزىنىڭ سوڭىندا قالا باسشىسىنىڭ ورىنباسارى شتاب مۇشەلەرىن جاڭا جىلمەن قۇتتىقتاپ, اماندىق, تىنىشتىق, بارلىق جاقسىلىقتاردى تىلەدى.