بيىلعى جاڭا وقۋ جىلى مەكتەپ وقۋشىلارى مەن ستۋدەنتتەر ءۇشىن ءداستۇرلى رەجيمدە باستالادى.
«1 قىركۇيەكتە بولاتىن ءبىلىم كۇنىنە ارنالعان سالتاناتتى ءىس-شارالار ءداستۇرلى فورماتتا, مەكتەپ اۋماعىندا 1-سىنىپ وقۋشىلارى ءۇشىن عانا ۇيىمداستىرىلادى. ولارعا سالتاناتتى تۇردە العاشقى وقۋلىعى «الىپپە» تابىستالادى» دەپ ءمالىم ەتتى ءبىلىم جانە عىلىم ءمينيسترى ا.ايماعامبەتوۆ.
ال 2 مەن 11-سىنىپ وقۋشىلارى تىكەلەي بەكىتىلگەن سىنىپتارعا بارىپ, سوندا تاقىرىپتىق سىنىپ ساعاتتارىنا قاتىسادى.
جاڭا وقۋ جىلىندا مەكتەپ فورماسى نەگىزىنەن ساقتالادى. بىراق پاندەميا جاعدايىنا بايلانىستى مەكتەپكە كلاسسيكالىق ۇلگىدەگى ىڭعايلى كيىممەن كەلۋگە دە رۇقسات بەرۋ بويىنشا شەشىم قابىلداندى.
مينيستر, ءبىر وقۋشىدان ۆيرۋس تابىلسا, بۇكىل سىنىپ قاشىقتان وقۋعا جىبەرىلەتىنىن, سونداي-اق وقۋشىنىڭ, ستۋدەنتتىڭ اتا-اناسى نەمەسە ءبىلىم الۋشىنىڭ ءوزى اۋىرىپ قالسا, وندا ودان اۋرۋدىڭ كلينيكالىق بەلگىلەرى مەن سيمپتومدارى بايقالماسا دا ءبىلىم ورداسىنا كىرگىزىلمەيتىنىن دە ءمالىم ەتتى.
ەسكە سالساق, «الىپپە» وقۋلىعى وسىدان بىرنەشە جىل بۇرىن مەكتەپ باعدارلاماسىنان الىنىپ, ونىڭ ورنىنا «ساۋات اشۋ» ءپانى ەنگىزىلگەن بولاتىن. ەندى, مىنە تالاي ۇرپاقتىڭ ساۋاتىن اشقان قاسيەتتى «الىپپە» قايتادان مەكتەپ باعدارلاماسىنا ورالاتىن بولدى.
