ەلوردادا تاعى ءبىر اۋلا كلۋبى اشىلدى. «سايران» تۇرعىن ءۇي كەشەنىنىڭ اۋماعىندا ورنالاسقان «سايران» اۋلا كلۋبىنىڭ زاماناۋي ۇلگىدە جاساندى گازونمەن جانە كورەرمەندەرگە ارنالعان ورىندارمەن جابدىقتالعان فۋتبول الاڭى بار.
كلۋبتى اشۋعا نۇر-سۇلتان قالاسى جاستار ساياساتى ماسەلەلەرى باسقارماسى مەن «استانا جاستارى» كوممۋنالدىق مەملەكەتتىك مەكەمەسى باستاماشىل بولدى. «سايران» قۇرىلىس كومپانياسىنىڭ ديرەكتورى تالعات كوجاحمەتوۆتىڭ ايتۋىنشا, تۇرعىن ءۇي كەشەنى اۋماعىندا اۋلا كلۋبى مەن ستاديون سالۋ جوسپارى 2009 جىلى بولعان ەكەن.
– الاڭ شاعىن فۋتبول ويناۋعا ارنالعان. ونىڭ ەنى 20 مەتر, ال ۇزىندىعى 40 مەترگە جەتەدى. كورەرمەندەرگە ارنالعان ورىنعا 200 ادام سىيادى. مۇندا شاعىن فۋتبول مەن بىرگە قول دوبىنان دا تۋرنيرلەر وتكىزۋگە بولادى. سپورتشىلارعا ارنالعان كيىم اۋىستىرۋ بولمەسى مەن دۋش كابيناسى دا بار. سونداي-اق كلۋبتا شاحمات, دويبى ويناعىسى كەلگەندەرگە دە جاعداي جاسالعان. بالالاردىڭ ويىننان قۇمارى قانباي, شاپقىلاپ جۇرەتىن شاعىندا تەلەفونعا ءۇڭىلىپ, ۇيدە جاتقانى جانعا باتادى. بۇل ورايدا جاڭا ستاديون مەن اۋلا كلۋبى ولاردى سالاۋاتتى ءومىر سالتىنا باۋلىپ, سپورت اينالىسۋىنا مول مۇمكىندىك سىيلايدى, – دەيدى ت.كوجاحمەتوۆ.
اشىلۋ سالتاناتى كەزىندە بالالار دوپپەن ءتۇرلى ءادىس-تاسىلدەر كورسەتىپ, ءوزارا جولداستىق كەزۋ وتكىزدى.
– بۇل سارىارقا اۋدانىنداعى بەسىنشى اۋلا كلۋبى. كلۋب نەگىزىنەن الەۋمەتتىك جاعدايى تومەن وتباسىلاردان شىققان بالالارعا ارنالعان. ولار مۇندا تەگىن جاتتىعا الادى. بىلىكتى جاتتىقتىرۋشىلاردى تارتۋ ارقىلى فۋتبول ۇيىرمەسىنىڭ دە جۇمىسى جولعا قويىلادى. سول ارقىلى اۋلا كلۋبتارى اراسىندا شاعىن فۋتبولدان بىرىنشىلىكتەر وتكىزىپ تۇرامىز. جىل باسىندا حالىق كوپ قونىستاعان سارىارقا اۋدانىندا 2 اۋلا كلۋب عانا بولاتىن. جىل سوڭىنا دەيىن ولاردىڭ سانىن 13-كە دەيىن جەتكىزۋ جوسپارلانىپ وتىر,– دەيدى «استانا جاستارى» كمم باسشىسى شىڭعىس تىلەۋلين.
وسىلايشا سارىارقا اۋدانىنىڭ جەتكىنشەكتەرى مول شاتتىققا كەنەلىپ, بوس ۋاقىتتارىن ءتيىمدى وتكىزۋگە مۇمكىندىك الدى.
